Kuhitila Muli Luka 20:1-47
20 Tangua limo, Yesu uakele naku longesa vantu mu tembele na kuambulula muzimbu ua cili, kaha vakuluntu va vasasendonde na vakua kusoneka hamolika na vakuluntu vezile
2 naku muihula nguavo: “Tuleke, na mpoko ika uli na kulinga evi viuma? Kaha iya na kuhana mpoko yaco?”
3 Yesu uava kumbuluile nguendi: “Nange nji mihula vimo, kaha mu nji kumbulula:
4 Mbatizimu ya Yoano ya tundile muilu ni ku vantu?”
5 Ngeci vaputukile ku lihandekesa hakati kavo nguavo: “Nga tu handeka nguetu: ‘Ya tundile muilu,’ a handeka nguendi: ‘Amba honi omo lia vika kamua mu tsilielele?’
6 Vunoni nga tu handeka naua nguetu: ‘Ya tundile ku vantu,’ mbunga yose ituasa mavue, muomu va tsiliela nguavo Yoano uapuile kapolofeto.”
7 Ngeci va mu kumbuluile nguavo ku va tantekeyele kuiko ya tundile.
8 Kaha Yesu uava lekele nguendi: “Nga ngoco ni, nange ka nji mileka kuiko nja uana mpoko ya kulinga evi viuma.”
9 Kaha ua putukile kutela vantu cino cisimo nguendi: “Umo yala ua limine lihia lia vinyu kaha ua sile lihia kuli vakua kulima. Kaha uaile vungendzi mu cifuti ceka naku kalako ntsimbu ya kama.
10 Muya puileho ntsimbu ya kutia, ua tumine ngamba yendi kuli vakua kulima linga vaka mu haneko vusuka vua mu lihia liendi lia vinyu. Vunoni vaze vakua kulima vapupile uze ngamba naku mu hiluisa mavoko-voko.
11 Kaha ua tumineko ngamba mukuavo, vunoni nendi va mupupile, va mu sahuile kaha va mu hiluisile mavoko-voko.
12 Ngeci ua tumineko naua ua mu citatu, vunoni nou naua, va mu vulumuine naku mu sekula.
13 Omo liaco, vavenya lihia lia vinyu ua handekele nguendi: ‘Vati honi nji linga? Nji tumako munange unja lema, ikeye ni halumo vaka mu singimika.’
14 Vunoni vakua kulima mu va mumuene va lihandekesele hakati kavo nguavo: ‘Ou ikeye suana. Tuyenu tu mu tsihe linga vusuana vupue vuetu.’
15 Ngeci va mu mbilile ha mbandza ya lihia naku mu tsihilaho. Kaha vavenya lihia, vati aka linga vaze vakua kulima?
16 Akeza na kutsiha vaze vakua kulima kaha aka hana lize lihia lia vinyu ku vantu veka.”
Mbunga mu vavuile ngoco, va handekele nguavo: “Ovio ku via pandele kusoloka na limo litangua liahi!”
17 Vunoni Yesu uava talele sui, naku handeka nguendi: “Vika alumbunuka aa mezi ava soneka nguavo: ‘Lize livue li va vianene vakua kutunga, likelio linapu livue lia seho lia mu mbango?’*
18 Muntu uose a kauila ha lino livue, aka sanyoka. Kaha uze i likauila, lika mu sanya.”
19 Vunoni vakua kusoneka na vakuluntu va vasasendote, mu vavuile ngoco va tondele ku mu kuata haze vene, muomu va nongonuene ngecize cisimo ca tele ca talekesele hali vakevo, vunoni vavuile liova lia vantu.
20 Mu nima yaku mu lavelela na civando, va tumine vamala va valanyene mu vusueke vaka limuese ngue vakua vuviuke linga va mu uanene mulonga ha viuma via handeka, naku mu hana kuli vakua kusika na mu mavoko a nguvulu.
21 Ngeci va muihuile nguavo: “Mulongisi, tu tantekeya nguetu uka handeka naku longesa vuino kaha ka uakele na kahangu vunoni ue ku longesa njila ya Njambi mu vusunga:
22 Vuno citava tu fuete lisimu kuli Sezale ni kuahi?”
23 Vunoni Yesu ua nongonuene muheto uavo, ngeci uava lekele nguendi:
24 “Nji nehelenu imo denariu.* Cihanga ceya na lizina lieya viliho?” Va kumbuluile nguavo: “Via Sezale.”
25 Ngeci ikeye uava lekele nguendi: “Nga ngoco ni, fuetenu via Sezale kuli Sezale, vunoni via Njambi kuli Njambi.”
26 Ngeci ka va mu uanene mulonga ha viuma via handekele ku meso a vantu, vunoni va komokele cikumbululo cendi, ngeci va holokele kulu.
27 Vunoni vamo vaSanduseu, vaze vakele naku handeka nguavo cisangukilo ka ca keleko vezile naku muihula nguavo:
28 “Mulongisi, Mosesa ua tu sonekelele nguendi: ‘Nga umo yala atsa na kuseza mpuevo, vunoni ka sezele muana, muanaye na pande kuambata uze mpuevo linga a mu semeneko vana.’
29 Kuakele vamo vamala 7 vapuile vamuanaye. Ua kulivanga uambatele mpuevo, vunoni ua tsile ca kuhona vana.
30 Kaha ua mu civali
31 na ua mu citatu ua muambatele. Vose 7 valingilemo, vunoni va tsile, ca kuhona kuseza vana.
32 Mu ku manusuila, mpuevo uaco nendi ua tsile.
33 Ngeci mukemo, ha cisangukilo, uze mpuevo akapua ueya? Muomu vose 7 va muambatele.”
34 Yesu uava kumbuluile nguendi: “Vana va ku miaka ino,* vali na kuambata na kusomboka,
35 Vunoni vaze va na fuila kuka tambula muono ku matangua aku lutue na kusanguka ku vatsi, ka va kambata cipue kusomboka.
36 Na kutsa vene ku va katsi, muomu va kapua ngue tungelo. Cikuavo naua, va kapua vana va Njambi mu kupua vana va cisangukilo.
37 Vunoni ku tuala ha cisangukilo ca vatsi, Mosesa nendi ua handekeleho mu muzimbu ua ciputa, mua sanene Yehova* nguendi, ‘Njambi ya Avilahama, Njambi ya Isake na Njambi ya Yakomba.’
38 Ikeye kati Njambi ya vatsi, vunoni ya vaze vali na muono, muomu kuli ikeye* vose vali na muono.”
39 Vunoni vamo vakua kusoneka va mu kumbuluile nguavo: “Mulongisi una handeka vuino.”
40 Muomu ka vakele naua na ndzili ya ku muihula ambe cihula cikuavo.
41 Kaha Yesu ua vehuile nguendi: “Omo lia vika honi mue ku handeka nguenu Kilistu uapua muana Ndaviti?
42 Muomu Ndaviti ivene ua handekele ku livulu lia Visamo nguendi: ‘Yehova ua lekele Muangana uange nguendi: “Tumama ku livoko liange lia cilio
43 noho nji nahake vitozi vove ngue cituamo ca viliato viove.”’
44 Ngeci mukemuo, nga Ndaviti ua mu sanene nguendi, Muangana; vati honi uapua naua muanendi?”
45 Omo vantu vose vakele naku halakana, Yesu ua lekele vandongesi vendi nguendi:
46 “Zangamenu na vakua kusoneka vaze valema kuendangana na vuzalo vualaha, valema ku va meneka ha vitanda na kutumama ha vituamo via ku lutue mu visinangonga, kaha na kukala ha vihela via vukama ku vilika.
47 Ve kutuva* vupite vua vantuluue na kulinga vivundilo vialaha linga va komouese vantu, ava vakua kusoneka vaka tambula cihiso ca kama cikuma.”
Matota
^ Mu ciNgelengu “linapu mutue ua mu mbango”
^ Ni “mbongo ya palata.”
^ Talenu Mezi ava Lombolola.
^ Talenu Mizimbu ya ku Vuezako
^ Ni “ue ku vamona nguendi”
^ Mu ciNgelengu “kulia vindzivo”
