Kuhitila Muli Luka 21:1-38
21 Yesu mua anduile meso, ua muene vampite va haka vuana vuavo, mu vikasa via milambu.
2 Kaha ua muene umo ntuluue ua cihutu ahakamo tumbongo tuvali tua ndando ya indende.*
3 Ngeci ua handekele nguendi: “Nji mi leka vusunga nguange, ou ntuluue na hakamo vimbongo viavingi kuhiana vose.
4 Muomu ava vose va na hakamo vuana vua kutunda ku vupite vua vuingi, vunoni ikeye ku vuhutu vuendi, na hakamo viose via pandele ku liyoyesa navio.
5 Ha ntsimbu ikuavo, omo vantu vakele naku handeka via tembele, kutuala ha cifua ci va itungililemo, naku ivuahesa na mavue a cili na vuana vu va hanene vantu kuli Njambi,
6 ua handekele nguendi: “Kutuala ha viuma vi muli na kumona mu ntsimbu ino, matangua akeza omo ka kuka sala livue na limo liahi helu lia likuavo lintsa ka vaka uisila ha mavu.”
7 Kaha va muihuile nguavo: “Mulongisi, ntsimbu ika evi viuma vika lingika, na citantekeyeso cika ci ka muesa ngecize ha sala ha handende linga evi viuma vi soloke?
8 Yesu uava kumbuluile nguendi: “Zangamenu linga kati va mi hungumune, muomu vavengi vakeza mu lizina liange nguavo: ‘Yange vene ikeye,’ kaha nguavo: ‘Ntsimbu iva handekele vuovuno iheta.’ Kati muka va kave.
9 Cikuavo naua, mu kevua vindzita na liuayanga,* vunoni kati muka zuzuke. Muomu evi viuma, via pande kulivanga kusoloka, vunoni ku kotoka ka ci kezila haze vene.”
10 Kaha ua va lekele nguendi: “Cifuti ci ka katukila cifuti, na vuangana vu ka katukila vuangana.
11 Kuka kala mandunduma akama, kaha ku vihela via ku liseza-seza, kuka kala ndzala na misongo ya ku litambuisa. Vantu vaka mona viuma via kuvuisa liova na vitantekeyeso via kama via kutunda muilu.
12 “Vunoni ntsimbu kanda evi viuma visoloke, vantu vaka mi kuata naku mi yandesa. Vaka mi tuala mu visinangonga na mu tumenga, kaha vaka mi tuala ku meso a vamiangana na vanguvulu omo lizina liange.
13 Evi vi ka mi hana vukovelelo vua ku va hana vukaleho.
14 Ngeci mukemuo, kati mu livange ku livuahesela mu mutima uenu kutuala ha vati mu ka lihakuila.
15 Muomu nji ka mi hana mezi na mana akulinga ambe vitozi venu, ka vaka hasa ku aluisa ni ku apaya.
16 Cikuavo naua, visemi venu, vamuanoko, vavusoko na vavusamba, vaka mienda vungungu na kutsiha vamo hakati kenu.
17 Kaha vantu vose vaka mi zinda omo lia lizina liange.
18 Vunoni kakuesi cinkambu na cimo cahi ca ku mitue yenu ci ka nonga.
19 Nga mu kolesa, mu kovoka.*
20 “Vunoni, omo muka mona, vilombo via masualale vi na zengeleka Yelusalema, tantekeyenu nguenu kunonga cayo cili mu hiehi.
21 Ngeci vaze vali mu Yundeya, va putuke kutinina ku mincinda kaha vaze vali mu Yelusalema, va tundemo, na vaze vali ku mehia kati va kovelemo.
22 Muomu matangua aco, akapua a kumuesa vuoloke* linga viuma viose viva soneka vi lipuisemo.
23 Ngongo ya vaze vaka kala na mazimo na kuamuesa ku matangua aco! Muomu mu cifuti muka kala lamba ya kama kaha vutenu vukeza ha vantu.
24 Kaha vaka lundumuka ku mukuale naku va tuala ku vundzinda ku vifuti viose. Yelusalema vaka iliatangela kuli vakua vifuti noho vintsimbu viva tumbikila vakua vifuti vinahu.
25 “Cikuavo naua, kuka kala citantekeyeso ku litangua, ngonde na vintongonosi. Kaha hano ha mavu, vantu vaka huya-huya,* ka vaka tantekeya via kulinga omo lia kucuma na vutenu vua kalunga ndonga.
26 Vantu vaka lezumuka na liova mu ku lavelela viuma vi keza ha mavu hose, muomu vindzili via muilu, vi ka linika.
27 Kaha vaka mona Muana muntu eza ha liselua, na ngolo na vumpahu vua kama.
28 Vunoni mu vi ka putuka kusoloka evi viuma, katukenu na kuandula mitue yenu, muomu kuovoka cenu cili mu hiehi.”
29 Kaha uava telele cimo cisimo nguendi: “Talenu muti ua mukuyu na miti ikuavo yose.
30 Nga mu imona ituikilila, mua tantekeya nguenu ntondue ili mu hiehi.
31 Na vuno vene, omo mu mona kusoloka ca viuma viose evi, tantekeyenu nguenu Vuangana vua Njambi vuli mu hiehi.
32 Nji mi leka vusunga nguange, ou muyati ka ukahua, kuvanga viuma viose vi na soloka.
33 Melu na mavu vi ka hita, vunoni mezi ange ka aka hiti.
34 “Liniungenu, linga mitima yenu kati ilemuue na kulia mua kama, kunua mua kama, na visoti via muono, kutina lize litangua lia ku mi tungumune
35 ngue ngandzo. Muomu litangua liaco likeza ku vantu vose vakala hano ha mavu.
36 Ngeci mukemuo, tualelenuho kuvingila naku lambelela ntsimbu yose, linga mu ka hase kuovoka ku viuma viose evi vi ka soloka, kaha naua muka hase kuimana ku meso a Muana muntu.”
37 Ku mutanya, uakele naku longesa mu tembele, vunoni ku vutsiki, uakele na kuya naku ka kosela ku Muncinda ua Olivela.
38 Kaha cimene ku cimene, vantu vose vakele na kuya kuli ikeye mu tembele mu kumu halakana.
Matota
^ Mu ciNgelengu “vilepton vivali.”
^ Ni “ku lipindisa; mbunja”
^ Mu ciNgelengu “mu kovola miono yenu.”
^ Ni “a kulinguila”
^ Ni “ku sakalala”
