Kuhitila Muli Luka 23:1-56
23 Ngeci mbunga yose ya katukile naku mu tuala kuli Pilato.
2 Kaha vaputukile ku mu vangeya nguavo: “Tua uana ou yala ali naku hungumuna vakua cifuti cetu, mu ku va vindika kufueta lisimu kuli Sezale, cikuavo naua ali naku litumbula vavenya nguendi ikeye Kilistu muangana.
3 Ngeci Pilato ua muihuile nguendi: “Yove Muangana ua vaYundeya ni?” Yesu ua kumbuluile nguendi: “Yove vavenya una handekamo.”
4 Ngeci Pilato ua lekele vakuluntu va vasasendote na mbunga nguendi: “Ou yala kanja mu uanene na umo mulonga uahi.”
5 Vunoni va tualeleho ku handeka nguavo: “Ou yala ali naku songangeya vantu na vilongesa viendi mu Yundeya yose kuputukila vene ku Ngalileya, kuheta na kuno.”
6 Pilato muevuile ngoco, uehuile nga Yesu uapuile mukua Ngalileya ni kuahi.
7 Mua tantekeyele nguendi Yesu uapuile ua ku mutamba uakele na kusika Helonde, ua mu tumine kuli Helonde, uze uakele mu Yelusalema ku matangua aze.
8 Omo Helonde ua muene Yesu, ua viukilile mua kama. Mu ntsimbu ya kama, ua tondele mua kama kumona Yesu, muomu uavuile mizimbu yayingi kutuala hali ikeye, cikuavo naua ua lavelelele amone cimo citantekeyeso ce ku lingile Yesu.
9 Ngeci ua putukile ku muihula viavingi, vunoni Yesu ka mu kumbuluile.
10 Vutuhu ngoco, vakuluntu va vasasendote na vakua kusoneka, va tualeleho ku katozoka naku mu vangeya viavingi oku va na nyengua mua kama.
11 Kaha Helonde hamolika na masualale vendi, va sahuile Yesu naku mu tsopa. Va mu zikile vuzalo vua cili* kaha mu nima yaco, va mu hiluisile kuli Pilato.
12 Ngeci ha litangua lize vene, Helonde na Pilato va likuatele vusamba, muomu ku laza va lizindile.
13 Pilato ua kunguluile vakuluntu va vasasendote, vakua kusika na mbunga
14 kaha uava lekele nguendi: “Mua nji nehelele ou yala nguenu ali naku songangeya vantu. Vunoni halakanenu! Nja muihula ha meso enu, vunoni kanja mu uanene na mulonga na umo uahi ua viuma vi mua mu vangeya.
15 Ambe vene Helonde kamu uanene na mulonga, ngeci na mu hiluisa kuli yetu. Ngue mu mua mono, ou yala ka lingile na vimo viahi via na pande kutsila.
16 Ngeci mukemuo, nji mu hana kasitiku naku muecela.”
17— —
18 Vunoni mbunga yose ya tambakanene nguayo: “Tsiha ou yala kaha ecela Mbalambasa!”
19 (Mbalambasa va mu hakele mu kamenga, omo lia kualulukila nguvulu, na kutsiha vantu.)
20 Pilato ua handekele navo lukuavo naua, muomu ua tondele kuecela Yesu.
21 Kaha va putukile ku tambakana nguavo: “Mu sukike ha citi! Mu sukike ha citi!”
22 Pilato ua handekele navo lua mu citatu naua nguendi: “Omo lia vika? Vupi vuka na lingi ou yala? Kanja mu uanene na umo mulonga ua na pande kutsila. Ngeci mukemuo, nji mu hana kasitiku naku muecela.”
23 Vunoni mbunga ya tualeleho ku mu kakateya, oku itambakana nguayo va mu tsihe,* kaha mezi avo avulile.
24 Ngeci Pilato ua tavele kulinga vize viva tondele vantu.
25 Kaha uecelele Mbalambasa, uze yala uakele mu kamenga omo lia mulonga ua kualulukila nguvulu na kutsiha vantu. Vunoni uava hele Yesu, va mu linge muaya cizango cavo.
26 Mu vakele na kutuala Yesu, va kuatele umo yala ua ku Silene, lizina liendi Simone, tele atunda ku mehia. Kaha va mu tuikile citi ca kayando* linga aye na kukava Yesu mu nima.
27 Mbunga ya kama yakele naku mu kava hamolika na vampuevo, vaze vakele na kuliveta ha vintulo omo lia vusiua naku mu lila.
28 Kaha Yesu ua tengulukile na kutala vaze vampuevo nguendi: “Enu vana va Yelusalema, kati mu lile yange. Lililenu enu vavenya na vana venu.
29 Muomu tantekeyenu nguenu, matangua ali na kuiza omo vantu vaka handeka nguavo: ‘Vavezika vantsimpi na mazimo ka asemene, kaha na mavele ka a amuesele!’
30 Kaha vantu vaka putuka kuleka mincinda nguavo: ‘Tu uilenu!’ Na kuleka malundu nguavo: ‘Tu fuikenu!’
31 Nga va linga evi viuma ntsimbu muti uci tontola, amba vati cikafua mu ukoma?”
32 Kuakele naua vamo vamala vavali vapuile mihuza,* navo vava tualele linga vaka va tsihile hamolika na Yesu.
33 Kaha mu va hetele ku cihela ci va luka nguavo Cikola, va mu sukikile ha citi hamolika na vaze mihuza, umo ku cilio mukuavo ku cimosue.
34 Vunoni Yesu ua handekele nguendi: Tata, vakonekele, muomu ka va tantekeya vi vali na kulinga.” Cikuavo naua, va putukile kutaha linga va lipangele vizalo viendi.
35 Kaha vantu vemanene kuze mu kutala. Vunoni vakua kusika va putukile ku mu tsopa nguavo: “Vakuavo ua hasele ku vovola. Nga ikeye Kilistu ua Njambi, Uze iva Hangula, aliovole vavenya.”
36 Na masualale navo naua va mu tsopele. Vezile kuli ikeye naku mu hana vinyu via ku kalumuka,
37 naku handeka nguavo: “Nga u Muangana ua vaYundeya, liovole ove vavenya.”
38 Kaha helu lia mutue uendi va sonekeleho nguavo: “Ou ikeye Muangana ua vaYundeya.”
39 Kaha umo ua vaze mihuza vava sukikile hamo nendi, ua putukile ku mu tsopa nguendi: “Kati yove Kilistu? Liovole ove vavenya, netu naua?”
40 Kaha uze muhuza mukuavo ua mu tenukilile nguendi: “Nkuma ove ambe liova lia Njambi vene liahi, omo una tambula kasitiku kamolika nou yala?
41 Eyo, etu tu na fuila kutambula kasitiku omo lia viuma vi tuna lingi, vunoni ou yala ka lingile vupi na vumo vuahi.”
42 Kaha ua handekele naua nguendi: “Yesu yaka nji vulukeko omo uka kovela mu Vuangana vuove.”
43 Kaha Yesu ua mu lekele nguendi: “Mua vusunga lelo nji kuleka nguange: Uka kala nange mu Citungu.”
44 Eyi ntsimbu yapuile 12 ola.* Vunoni mu cifuti cose mua uililile milima ya kama noho 15 ola,*
45 muomu litangua kalia tuile ceke. Kaha ntanga* ya mu tembele ya tavukile hakati.
46 Kaha Yesu ua tambakanene na lizi lia kama naku handeka nguendi: “Tata, nji kundika mu mavoko ove sipilitu yange.” Mu nima ya ku handeka ngoco, ua tsile.*
47 Mukuluntu ua masualale mua muene viuma via solokele, ua putukile ku zumbangeya Njambi nguendi: “Cili vene, ou yala uapuile mukua vuviuke.”
48 Ngeci mbunga yose ya likunguluile kuze ku cihela mu va muene viuma via solokele, va hilukile ku membo avo oku va liveta ha vintulo omo lia vusiua.
49 Vose vaze va litantekeyele nendi, vemanenene ha lahako. Kaha na vaze vampuevo va mu kavele tunde ku Ngalileya, navo ku vakele, kaha va muene viuma viose evi.
50 Kua kele umo yala, uapuile mukua Mpunga, lizina liendi Yosefe. Yala uaco uapuile muntu ua cili kaha mukua vuoloke.
51 (Ou yala ka hakuilile vutumbe vua vakuavo vua kutsiha Yesu.) Uapuile ua ku Alimateya imo mbonge ya vaYundeya, kaha uakele na kulavelela Vuangana vua Njambi.
52 Yala uaco uaile kuli Pilato na kuvundila muvila ua Yesu.
53 Ngeci ua suluisile uze muvila, ua uvungilile ha ntanga ya cili ya linyu, naku ka uhaka mu cihilo ca tsokuele mu livue, cize te kanda va tsindemo na umo uahi.
54 Eli liapuile litangua lia Kulivuahesela, kaha Sapalalo yakele na kusuena mu hiehi.
55 Vunoni vaze vampuevo vezile na Yesu kutunda ku Ngalileya, navo va kavele mu nima. Kaha vaka muene cihilo civa mu hakele na vati va tulikile muvila,
56 kaha va hilukile linga vaka vuahese ndumbo* ya kunika vuino, na mazi a vueko vua cili. Vunoni lia Sapalalo va huimine, mu kuononoka lisiko.
Matota
^ Ni “vua ku viakula”
^ Ni “va mu sukike ha citi”
^ Talenu Mezi ava Lombolola
^ Ni “vambanditu; vikelemi”
^ Mu ciNgelengu “ha ola 6.”
^ Mu ciNgelengu “ha ola 9”
^ Ntanga ya tepele hondo ya kuhiana kulela na ya kulela ya mu tembele.
^ Ni “ua huimine lua ku manusuila.”
^ Ni “vihemba”
