Kuhitila Muli Luka 24:1-53
24 Ha litangua lia katete mu simano, vaze vampuevo vezile ku cihilo cimene-mene, va nehele ndumbo* ya kunika vuino iva viukisile.
2 Vunoni va uanene lize livue va na litundisa ku cihilo.
3 Kaha mu va kovelelemo, ka va uanenemo muvila ua Muangana Yesu.
4 Ntsimbu va na ci likomokela evi, talenu! vamala vavali va zalele vuzalo vua ku viakula va kuimanene ku mukulo uavo.
5 Vaze vampuevo vavuile liova, kaha va talele ha mavu. Vunoni vaze vamala vava lekele nguavo: “Vika mu tondela muntu ua kuyoya ku vatsi?
6 Kuno uahiko, va na mu sangula laza. Vulukenu via mi lekele muakele ku Ngalileya,
7 nguendi Muana muntu vana pande ku mu hana mu mavoko a vakua vupi naku mu sukika ha citi kaha ha litangua lia mu citatu aka sanguka.”
8 Ngeci va vulukile mezi endi.
9 Kaha va tundile kuze ku cihilo, naku kaleka viuma viose evi ku vapostolo 11 na vakuavo vose.
10 Vampuevo vaco vapuile Maliya Mandalena, Yoana na Maliya naye ya Tiango. Kaha na vampuevo vakuavo vaze vakele hamolika navo va lekele evi viuma ku vapostolo.
11 Vunoni vakevo va muene vize viuma viva va lekele vaze vampuevo nguavo via vuheve, ngeci ka va tavele.
12 Vunoni Petulu ua katukile na kutuntila ku mbumbo. Mua sumbililemo, ua muene lika vintanga via linyu. Ngeci uaile oku alihula vika via lingikile.
13 Kaha talenu! Ha litangua lize vene, vandongesi vavali vakele na kuya kulimbo limo li va luka nguavo Emau, hakele ntunda ya kupua 11 kilometru kutunda ku Yelusalema.
14 Vakele naku simutuila kutuala ha viuma viose via solokele.
15 Ntsimbu vakele naku simutuila oku va lihoya ha viuma viaco, Yesu vene, uezile kuli vakevo na kuputuka kuenda hamo navo.
16 Vunoni ka va mu nongonuene.
17 Ngeci ua vehuile nguendi: “Vika muli naku simutuila?” Kaha vemanene oku va nazeye na vusiua.
18 Keleopa, umo uavo ua mu kumbuluile nguendi: “Vuno u ngendzi muno mu Yelusalema kaha uakala lika liove ngeci ka utantekeya viuma vi na solokamo ano matangua ni?”
19 Kaha Yesu ua vehuile nguendi: “Viuma vika?” Va mu kumbuluile nguavo: “Via Yesu mukua Nazaleta, uze uapuile kapolofeto ua ndzili mu vilinga na mezi ku meso a Njambi naku meso a vantu vose,
20 na vati vakuluntu vetu va vasasendote na vakua kusika va mu hanene kuli vakua ku sompesa linga va mu uane na mulonga ua kutsa, ngeci va mu sukikile ha citi.
21 Yetu tua kulahelele nguetu ou yala ikeye akuovola Isaleli. Vunoni lelo linapu litangua lia mu citatu tunde ha via solokelele evi viuma.
22 Vunoni naua, vamo vampuevo hakati ketu va na tu komouesa mua kama, muomu va na menekelele ku mbumbo
23 kaha muvila uendi ka vaka u uanenemo. Ngeci va na hilukile naku tuleka nguavo, va na muene vamo tungelo va na valeka nguavo, Yesu ali na muono.
24 Kaha na vamo vetu navo vaileko, vaka uanene mbumbo ngue muze vene mu va tulekele vaze vampuevo, vunoni ka va mu muene.”
25 Ngeci Yesu uava lekele nguendi: “Enu viheve na vakua mitima ya malanga, vika ka mue ku tavela vuasi viuma viose viva handekele vapolofeto!
26 Kati ca tondekele Kilistu kuhita mu tuyando tuose otu naku kovela mu vumpahu vuendi ni?”
27 Ngeci ua va lumbunuinine viuma viose viva handekele mu Visoneka kutuala hali ikeye, ku putukila kuli Mosesa kuheta naku Vapolofeto vose.
28 Mu va hetele mu hiehi na limbo li vakele na kuya, Yesu ua lingile ngue atuvakana mu ku tualelelaho na vungendzi vuendi.
29 Vunoni va mulambelele linga kati aye, nguavo: “Aci kale netu kuno, muomu litangua linatoko, lili na kulahuka.” Ngeci Yesu mua vuile ngoco, uaka tumamene navo.
30 Mua tumamene navo ku mesa, ua tambuile mbolo, ua vundilile kaha ua imunguile na kuputuka ku va hanayo.
31 Haze vene, meso avo emukile, ngeci va mu nongonuene, vunoni va tungumuke, hakati kavo ka keleho naua.
32 Ngeci va lihandekesele hakati kavo nguavo: “Kati tuavuile ku mitima vo muakele naku handeka netu mu njila oku atu lumbunuina vuino Visoneka ni?”
33 Kaha ha ola ize vene, va katukile naku hiluka ku Yelusalema, vaka liuanene na vaze 11 na vakuavo vava kungulukile navo
34 vakele naku handeka nguavo: “Cili vene Muangana na sanguka na lisolola kuli Simone!”
35 Ngeci vaze vavali navo vaputukile ku handeka viuma via va solokelele mu njila, na vati va mu nongonuene omo ua munguile mbolo.
36 Ntsimbu tele va ci handeka vino viuma, Yesu ua solokele hakati kavo, kaha uava lekele nguendi: “Ciyulo cikale nenu.”
37 Vunoni vakevo vatsile cintsima vavuile liova, muomu vakele naku singanieka nguavo vali na kumona umo sipilitu.
38 Ngeci Yesu uava lekele nguendi: “Vika muli na kuvuila liova? Kaha omo lia vika muli na vimpata mu mitima yenu?
39 Talenu mavoko ange na viliato viange, yange vene. Nji kuatenu linga mu mone, muomu sipilitu kakele na muvila ua ntsitu na vitsiha, vunoni yange njili nauo ngue mu mua limuena.”
40 Kaha tele aci handeka evi viuma, uava lekesele mavoko na mikono yendi.
41 Vunoni ca va kaluuilile kutava omo lia ndzolela ya kama naku likomokela, ngeci Yesu ua vehuile nguendi: “Muliko na vimo viakulia kuno?”
42 Kaha va mu hanene mpindi ya intsi ua kuocha,
43 ngeci ua itambuile na kulia ha meso avo.
44 Kaha uava lekele nguendi: “Aa akeo mezi anja mi lekele mu njakele nenu nguange, viuma viose viva soneka kutuala hali yange mu Masiko a Mosesa, mu Visoneka via Vapolofeto na mu Visamo via pande ku lipuisamo.”
45 Ngeci uava sokoluele visinganieka viavo linga vevuisise vuino vivia lumbunukile Visoneka,
46 naku va leka nguendi: “Va soneka nguavo: Kilistu aka yanda kaha ha litangua lia mu citatu aka sanguka ku vatsi.
47 Cikuavo naua, ku hitila mu lizina liendi, va kambulula via muzimbu ua kualuluka linga va konekele vupi vua vakua vifuti viose, ku putukila vene mu Yelusalema.
48 Kaha mu kapua vakaleho va viuma evi .
49 Halakanenu! Njika mi tuma via mi kulahesele Tata. Vunoni enu kati mu tunde muno mu mbonge noho ha vaka mi zikila na ngolo ya kutunda muilu.”
50 Mu nima yaco, ua tuhukile navo mu mbonge, uaile navo naku Mbetaniya, kaha uoluele mavoko naku va vezikisa.
51 Omo uakele naku va vezikisa, va mu tepele navo kaha va mu tualele muilu.
52 Ngeci va mu tsikamenene naku hiluka ku Yelusalema na ndzolela ya kama.
53 Kaha va tualeleho kukala mu tembele mu ku sangaziala Njambi.
Matota
^ Ni “vihemba”
