Kuhitila Muli Luka 4:1-44
4 Kaha Yesu ua sulile na sipilitu santu, ua tundile ku Yondau, kaha sipilitu ya mu tualele mu likango
2 muze mua ka kele matangua 40, kaha Ndiavu ua muesekele. Mu kulinga mu ntsimbu ize Yesu kalile na vimo viahi, ngeci mu ahuile aze matangua, uavuile ndzala.
3 Ngeci Ndiavu ua mu lekele nguendi: “Nga u muana Njambi, leka eli livue lihimpuke mbolo.”
4 Vunoni Yesu ua mu kumbuluile nguendi: “Va soneka nguavo, ‘Muntu ka pandele ku yoyela lika ha mbolo.’”
5 Kaha ua mu tualele helu, naku mu muesa mavuangana ose a hano ha mavu mu kamo kantsimbu.
6 Ngeci Ndiavu ua mu lekele nguendi: “Nji kuhana mpoko ya kusika aa mavuangana ose na vumpahu vuao, muomu va na nji hanavio, kaha nji hasa ku vihana kuli uose-ouo unja zange.
7 Ngeci mukemuo, nga unji lemesa ambe lumolika, viose vipua viove.”
8 Yesu ua mu kumbuluile nguendi: “Va soneka nguavo, ‘Ua pande kulemesa Yehova* Njambi yove, naku pangela lika ikeye.’”
9 Ua mu tualele naua mu Yelusalema naku muimika helu* lia tembele naku mu leka nguendi: “Nga u muana Njambi, liumbile ha mavu,
10 muomu va soneka nguavo: ‘Aka tuma tungelo vendi, linga va ku niunge,’
11 kaha ‘Vaka ku kavuila, linga kati uvete ciliato cove ha livue.’”
12 Ngeci Yesu ua mu kumbuluile nguendi: “Va handeka nguavo, ‘Kati ukeseke Yehova Njambi yove.’”
13 Kaha Ndiavu mua manusuile ku mueseka, ua mu sile naku vandamena ntsimbu ikuavo naua ya cili.
14 Yesu ua hilukile ku Ngalileya ku ngolo ya sipilitu santu. Kaha muzimbu ua viuma via cili via lingile ua lisanduokele muaya membo ose.
15 Cikuavo naua, ua putukile ku longesa mu visinangonga viavo, kaha vose va mu singimikile.
16 Kaha uaile ku Nazaleta kuze kua kolelele, ngue mua kele na kulinga ha viSapalalo viose, ua kovelele mu sinangonga kaha uemanene linga atande.
17 Ngeci va mu hanene lizengununo lia kapolofeto Isaya, ua lizengunuine kaha ua uanene ha va soneka nguavo:
18 “Sipilitu ya Yehova ili hali yange, muomu na nji vuavesa linga njambulule muzimbu ua cili ku vihutu. Na nji tumu kuambulula ku patuka ca vindzinda, kuimuisa meso a tupuputa, kuohiela vaze vave ku yandesa,
19 na kuambulula via muaka ua Yehova ua kuvuila vantu ngozi.”
20 Mua manusuile, ua zengele lize lizengununo naku lihana kuli mukua ku aniunga kaha ua tumamene. Ngeci vose vakele mu sinangonga va mu talele ntoma.
21 Kaha ua putukile ku va leka nguendi: “Lelo eci cisoneka ci mu nevu, ci na lipuisamo.”
22 Kaha vose vakele na ku handeka via cili kutuala hali ikeye, naku likomokela mua kama omo lia mezi a cili akele na kutunda mu kanua kendi. Va handekele nguavo: “Kati muana Yosefe ou?”
23 Mua vuile ngoco, ua va lekele nguendi: “Ku handeka vusunga, yenu mu ka nji tela cisimo nguenu, ‘Ove Mukua kusaka, lisake yove vavenya. Viuma vi tu nevu nguavo ua vilingi ku Kapenama, vilinge naua na muno muimbo liove.’”
24 Ngeci ua handekele nguendi: “Mua vusunga nji mi leka nguange, kapolofeto ka ve ku mu tava muimbo liendi.
25 Vunoni nji mi leka vusunga nguange: Mu Isaleli mua kele vantuluue vavengi ku matangua a Eliya, omo va patele lilu* mu miaka itatu na vingonde 6, kaha mu cifuti cose mua kele ndzala ya kama.
26 Vutuhu ngoco, Eliya ka va mu tumine ku vantuluue vose, vunoni va mu tumine lika kuli ntuluue ua ku Salefa ku cifuti ca Sindone.
27 Cikuavo naua, ku matangua a kapolofeto Elisa, mu Isaleli mua kele vakua mbumba vavengi vunoni ka va lelesele* na umo uahi, kuvanga lika Namane mukua Silia.”
28 Kaha vose vakele mu sinangonga mu vavuile ngoco va nienguele mua kama,
29 va katukile naku mu nakuola na ha mbandza ya mbonge. Kaha va mu tualele ku mungenia-ngenia* ua muncinda ha va tungilile mbonge yavo, linga va mu hosomuene* mu cimbongo.
30 Vunoni Yesu ua silukile mu kati kavo na kuya.
31 Kaha ua sikulukile ku Kapenama mu mbonge ya Ngalileya. Uakele naku va longesa lia Sapalalo,
32 kaha va likomokelele mua kama omo lia ku longesa cendi, muomu uava longesele ngue muntu ali na mpoko.
33 Mu sinangonga yaco mua kele umo yala uakele na ndemone, kaha ua tambakanene nguendi:
34 “Ha! Vika utonda kuli yetu, ove Yesu Mukua Nazaleta? Uneza mu ku tu nongesa ni? Nji ku tantekeya mua cili, yove Mukua Kulela ua Njambi.”
35 Vunoni Yesu ua tenukilile uze ndemone nguendi: “Holoka, kaha tunda muli ikeye.” Ngeci uze ndemone ua mu uisilile ha mavu hakati kavo, na kutunda muli ikeye ca kuhona ku mu vulumuna.
36 Omo liaco, vose va likomokelele mua kama na kuputuka ku lihandekesa hakati kavo nguavo: “Handekesi ika eyi? Muomu ali na kutumina vasipilitu va kuzuala, na mpoko na ngolo, kaha vali na kutunda vene!”
37 Ngeci muzimbu ua viuma via lingile, ua lisanduokele mua kama ku vihela viose mu cifuti cize.
38 Mua tundile mu sinangonga, ua ka kovelele mu ndzivo ya Simone. Kaha nayemueno ya Simone uakele na kuvavala masika-sika a kama, ngeci va pingile Yesu a mu kuase.
39 Ngeci uemanene ha hiehi nendi naku mu kanguisa, kaha aze masika-sika amu tundile. Haze vene uze mpuevo ua hindukile na kuputuka ku va pangela.*
40 Mu ku lahuka ca litangua, vose vakele na mavezi aku liseza-seza vava nehele kuli ikeye. Kaha ua va kanguisile mu ku va saleka mavoko umo ku umo.
41 Vandemone vavengi navo va tundile, oku va tambakana nguavo: “Ove u Muana Njambi.” Vunoni ikeye ua va tenukilile, kaha ka va tavesele ku handeka, muomu va zivukile nguavo ikeye Kilistu.
42 Mu kuaile na kuca, Yesu ua va sezele na kuya kua lika liendi. Vunoni mbunga ya putukile ku mu tonda, kaha mu va mu uanene va setekele ku muimika linga kati ava seze.
43 Ngeci uava lekele nguendi: “Nja pande kuambulula muzimbu ua cili ua Vuangana vua Njambi ku vimbonge vikuavo naua, muomu vikevio viva nji tuminine.”
44 Kaha uaile na kuambuluila mu visinangonga via mu Yundeya.
Matota
^ Talenu Mizimbu ya ku Vuezako
^ Ni “kantsongua”
^ Ni “niondzi ka ya nokele”
^ Ni “ku kanguisa”
^ Ni “ku ntsongo-ntsongo”
^ Ni “va mu nakuile”
^ Ni “vuahesela viakulia.”
