Kuhitila Muli Luka 5:1-39
5 Ntsimbu imo Yesu uakele ku cisali ca Ngenezaleta* mu ku longesa. Kaha mbunga yakele naku litsikinina mu ku mu zengeleka, linga va halakane lizi lia Njambi.
2 Kaha ua muene mato avali, va na a tutika ku cisali, vunoni vakua kutela vantsi ka va kelemo, muomu vakele na kukusa manda avo.
3 Ngeci Yesu ua kovelele mu vumo vuato, vuapuile vua Simone, kaha ua mu pingile avu suenese ku lahako kamandende na ntunda. Kaha ua tumamenemo na kuputuka ku longesa mbunga.
4 Mua manusuile ku handeka na mbunga, ua lekele Simone nguendi: “Suenesa vuato haze ha lova, kaha tenu manda enu mu kuate vantsi.”
5 Simone ua mu kumbuluile nguendi: “Mulongisi, tu na fuitangana vutsiki vuose kaha ka tua lavuile na vimo viahi, vunoni mu kulinga yove una handekamo, njita manda.”
6 Mu va lingilemo, va lavuile vantsi vavengi cikuma mu cifua ca kulinga na manda aputukile ku tavuka.
7 Ngeci va sovueyele vakuavo vakele mu vuato vukuavo, linga va ku va kuase. Kaha mu vezile, va sulisile mato ose avali mu cifua ca kulinga aputukile ku vombela.
8 Simone Petulu mua vi muene, ua tsikamene ku meso a Yesu naku mu leka nguendi: “Muangana, nji sondoloke muomu nji mukua vupi.”
9 Ua handekelemo, muomu nendi na vakuavo va likomokelele mua kama omo lia kulana ca vantsi vava lavuile.
10 Mukemuo mu va likomokelele Tiango na Yoano, vana va Sembendeu, vaze vakele na kupanga hamolika na Simone. Kaha Yesu ua lekele Simone nguendi: “Kati uivue liova, muomu kutunda litangua lia lelo, upua mukua kukuata vantu.”
11 Ngeci va hiluisile mato ku ntunda, kaha va sezele viose naku mu kava.
12 Ha ntsimbu ikuavo Yesu uakele mu imo mbonge, kaha talenu! Kua kele umo yala uakele na mbumba muvila uose. Kaha mua muene Yesu, ua tsikamene naku talekesa cihanga cendi ha mavu, oku amu lambelela nguendi: “Muangana nga ua zange, nji lelese.”
13 Ngeci Yesu uoluele livoko liendi naku mu kuata nguendi: “Nja zange vene! Pua ua kulela.” Haze vene mbumba yose ya mu huile.
14 Ngeci Yesu ua mu lekele linga kati alekeko muntu na umo uahi. Kaha naua nguendi: “Vunoni ya uka lisolole kuli sasendote, na kuhana vuana vua ku lilelesa, ngue mua sikile Mosesa, linga vupue vukaleho kuli vakevo.”
15 Kaha muzimbu uendi ua tualeleleho ku lisanduoka, na vantu va putukile ku likungulula linga va mu halakane naku va kanguisa ku misongo yavo.
16 Vutuhu ngoco, vintsimbu viavingi uakele na kuya kua lika liendi mu kuvundila.
17 Tangua limo, Yesu uakele naku longesa, kaha vaFaliseu na vakua ku longesa Masiko, va tundile ku membo ose a Ngalileya, Yundeya na Yelusalema vakele kuze. Kaha ngolo ya Yehova* ya kele hali ikeye linga akanguise vantu.
18 Kaha talenu! Vamo vamala vambatele umo yala ua kalepa ha cipoya,* kaha va setekele ku mu kovelesa mukati linga va mu tuale kuli Yesu.
19 Mu kulinga ka va hasele ku mu kovelesa mukati omo lia kulana ca mbunga, va londele ha tsimba. Ngeci va tuvile imo mbengua, naku mu sikumuisa ha cipoya cendi, hakati ka vantu vaze vakele ha lutue lua Yesu.
20 Yesu mua muene lutsilielo luavo, ua handekele nguendi: “Ove yala, va naku konekela vipi viove.”
21 Ngeci vakua kusoneka na vaFaliseu va putukile ku singanieka nguavo: “Iya ou ali naku sahula Njambi? Iya a hasa ku konekela vupi, kati Njambi lika?”
22 Vunoni Yesu mua tantekeyele visinganieka viavo, ua handekele nguendi: “Vika muli naku singanieka?
23 Nkuma vika via viasi kuli yeni? Ku handeka nguange ‘Va naku konekela vupi vuove,’ ni ku handeka nguange: ‘Katuka uende’?
24 Vunoni linga mu tantekeye nguenu Muana muntu ali na mpoko ya ku konekela vipi ha mavu—,” kaha ua lekele uze mukua kalepa nguendi: “Nji kuleka nguange, Katuka, ambata cipoya cove, ya ku ndzivo yove.”
25 Ngeci ha meso avo, uze yala ua katukile, uambatele cipoya cendi, na kuya ku ndzivo oku a sangaziala Njambi.
26 Vose mu vavi muene, vatsile cintsima, kaha va putukile ku sangaziala Njambi. Va likomokelele mua kama, naku handeka nguavo: “Lelo tua mono viuma via ku komouesa!”
27 Yesu mua tundile haze ua muene umo yala mukua ku fuetesa lisimu lizina liendi Levi, na tumama ku seketa ya ku fuetela lisimu. Ngeci ua mu lekele nguendi: “Tuaya upue ndongesi yange.”
28 Haze vene ua sezele viose, ua katukile naku mu kava.
29 Levi ua mu vuaheselele lizumbu lia kama ku ndzivo yendi, kaha kua kele mbunga ya kama ya vakua ku fuetesa lisimu na vakuavo vakele na kulia hamo navo.
30 VaFaliseu na vakua kusoneka vavo mu vavi muene, va putukile ku linienietela ku vandongesi vendi nguavo: “Omo lia vika muli na kulia hamo na vakua ku fuetesa lisimu na vakua vupi?”
31 Yesu mua vi vuile ua va kumbuluile nguendi: “Vakangule ka ve kutonda mukua kusaka, vunoni vaze va vavala.
32 Muomu ka njezile mu kutonda vakua vuviuke, vunoni vakua vupi linga valuluke.”
33 Va mu lekele nguavo vandongesi va Yoano na vandongesi va vaFaliseu vintsimbu viavingi ve ku livindika kulia naku lambelela kuli Njambi, vunoni vandongesi vove ve kulia na kunua.”
34 Yesu ua va kumbuluile nguendi: “Ka mu hasa ku lingisa vavusamba va sandungi va livindike kulia oku sandungi acili navo, ni vati?
35 Vunoni ika heta ntsimbu omo sandungi vaka va tambulaye. Hakeho honi, ha vaka livindikila kulia.”
36 Ua va telele cisimo nguendi: “Na umo uahi ue kuteta citopeko ha vuzalo vua vuha linga aci tongele ha vuzalo vua laza. Nga a lingamo cize citopeko* ca ciha ci zamukaho. Cikuavo naua, ka ci fuila ha vuzalo vua laza.
37 Kaha, na umo uahi ue ku longela vinyu via viha, mu vinjeke via laza via cilambu. Nga a lingamo, vize vinyu via viha vika tavula vinjeke naku muaniena ha mavu. Nambe vinjeke viaco vi ka livihila.
38 Vunoni vinyu via viha via pande ku vi longela mu vinjeke via vihia via cilambu.
39 Na umo uahi, nga nanu vinyu via laza atonda naua vinyu via viha, muomu nguendi: ‘Vinyu via laza vikevio via cili.’”
Matota
^ Ni “Cisali ca Ngalileya”
^ Talenu Mizimbu ya ku Vuezako
^ Muhela ua undende ua kuambatela muvezi.
^ Ni “limendo; cikamba”
