Kuhitila Muli Luka 6:1-49
-
Yesu, “Muangana ua Sapalalo” (1-5)
-
Yala ua livoko lia kusolia a kanguka (6-11)
-
Vapostolo 12 (12-16)
-
Yesu a longesa naku kanguisa (17-19)
-
Ndzolela na luvinda (20-26)
-
Kulema vitozi (27-36)
-
Likelenu kuhisa (37-42)
-
Muti vaka utantekeyela ku vusuka vuauo (43-45)
-
Ndzivo ya kutunga vuino; ndzivo ya kuhona luvula lua kukola (46-49)
6 Tangua limo, lia sapalalo, Yesu ua hitile mu lihia lia tiliku, ngeci vandongesi vendi va putukile ku holomona mitue ya tiliku, naku itsena na mavoko, kaha valile.
2 Ngeci vamo vaFaliseu mu vavi muene, vehuile nguavo: “Vika mu lingila viuma viva vindika lia Sapalalo?”
3 Yesu ua va kumbuluile nguendi: “Nkuma ka mua tandele viuma via lingile Ndaviti, hamolika na vamala vakele nendi mu vavuile ndzala ni?
4 Ua kovelele mu ndzivo ya Njambi, uambatele mbolo ya ku lekesa,* ualile naku hanako vamala vakele nendi, vutuhu ize mbolo ka va pandele ku ilia ku muntu uose-ouo vunoni vasasendote lika.”
5 Kaha ua va lekele naua nguendi: “Muana muntu ikeye Muangana ua Sapalalo.”
6 Lia sapalalo ikuavo, ua kovelele mu sinangonga na kuputuka ku longesa. Kaha mua kele umo yala, livoko liendi lia cilio liapuile lia kusolia.
7 Vakua kusoneka na vaFaliseu vakele naku talela Yesu va mone nga akanguisa uze yala lia Sapalalo, linga va mu uanene mulonga.
8 Vunoni mu kulinga Yesu ua tantekeyele visinganieka viavo, ua lekele uze yala ua livoko lia kusolia nguendi: “Katuka, imana hakati.” Ngeci ua katukile uemanene.
9 Yesu ua handekele nguendi: “Enu vamala me nji cihuleko vimo, vika va tavesa kulinga lia Sapalalo? Via cili ni via vipi? Kuovola muono ni ku u nongesa?”
10 Mu nima ya kutala vose ua lekele uze yala nguendi: “Olola livoko liove.” Uoluele kaha livoko liendi lia kangukile.
11 Vunoni vaFaliseu na vakua kusoneka va nienguele mua kama, ngeci va putukile ku simutuila hakati kavo kutuala ha vati valinga Yesu.
12 Tangua limo, uaile ku muncinda mu kuvundila, kaha ua vundilile kuli Njambi vutsiki vuose.
13 Mu kua cele, ua sanene vandongesi vendi kaha ua hanguileho va kupua 12, naku va luka nguendi vapostolo.
14 Vapuile: Simone, uze ya lukile naua nguendi Petulu, Anduleu muanaye, Tiango, Yoano, Filipu, Mbatolomeu.
15 Mateu, Tomasi, Tiango muana Alefeu, Simone uze ive kusana naua nguavo “mukua ntuima,”
16 Yundasa muana Tiango, na Yundasa Iskaliota, uze ua lipuisile cingungu.
17 Ua sikumukile navo kaha ua kemanene ha cihela ca ku salama, kua kele vandongesi vendi vavengi, na civunga cakama ca vantu va mu Yundeya yose na Yelusalema, na vakua mukulo ua Tile na Sindone. Eyi mbunga yose yezile mu ku mu halakana, kaha naku va kanguisa ku mavezi avo.
18 Kaha ambe vene vaze vakele na vasipilitu va kuzuala, navo vava kanguisile.
19 Mbunga yose ya tondele ku mu kuata muomu ngolo ya kele na kutunda kuli ikeye, ya va kangusile vose.
20 Kaha Yesu ua talele ku vandongesi vendi na kuputuka ku handeka nguendi:
“Mua vezika* enu vihutu, muomu Vuangana vua Njambi vunapu vuenu.
21 “Mua vezika enu muli na ndzala mu ntsimbu ino, muomu mu ka kuta.
“Mua vezika enu muli na kulila mu ntsimbu ino, muomu mu ka viukilila.
22 “Mua vezika mu vintsimbu viose nga vantu va mi zinda, va mi yengula, ku mi sahula, naku mi tumbula nguavo mu vantu va ku vihia, omo lia Muana muntu.
23 Mu litangua liaco olio, viukililenu naku lisamba cikuma, muomu talenu! fueto yenu muilu inapu yakama cikuma. Muomu vakukuluila vavo mukemuo mu valingile ku vapolofeto.
24 “Vunoni ngongo yenu enu vampite, muomu ku lembezieka cenu mua ci tambula laza mu vutuntu.
25 “Ngongo yenu enu mu nekuta ntsimbu ino, muomu mu kevua ndzala.
“Ngongo yenu enu muli na kuzola mu ntsimbu ino, muomu mu ka linienga na kulila.
26 “Ngongo yenu nga ntsimbu yose vantu va mi sangala, muomu vikevio vi valingile vakukuluila vavo ku vapolofeto va makuli.
27 “Vunoni enu vose muli naku nji halakana, nji mileka nguange: Tualeleniho kulema vitozi venu, naku lingila via cili vaze va mi zinda.
28 Vezikisenu vaze va mi singa, naku kundika mu vivundilo vienu vaze va mi sahula.
29 Nga muntu a kuhana mbanda* ku litama limo, muhane naua litama likuavo. Uze aku tambula cikovelo cove ca helu, kati u mu vindike cikovelo cove ca mukati.
30 Uose a kupinga muhane, kaha uose aku tambula viove, kati uka muihule linga aku hiluisilevio.
31 “Cikuavo naua, muose mu mu tonda vakuenu va milinge, nenu va lingenumo.
32 “Nga mu lema lika vaze va mi lema, fueto ika mu ka uanaho? Muomu nambe vakua vupi, navo va lema vaze vava lema.
33 Kaha nga mu linga via cili kuli vaze lika ve ku mi linga via cili, fueto ika mu ka uanaho? Muomu nambe vakua vupi navo mukemuo mu ve kulinga.
34 Cikuavo naua, nga mu levalesa* lika vaze va mu mona nguenu vahasa ku mi hiluisila, fueto ika muka uanaho? Muomu nambe vakua vupi, navo ve ku levalesa vakuavo vakua vupi, linga vava hiluisile via kupua hamo na vize viva va levala.
35 Vunoni tualelenuho kulema vitozi venu, na kulinga via cili, kaha levalesenu ca kuhona ku lavelela na vimo viahi. Kaha fueto yenu ikapua ya kama, mu kapua vana va Mukua Kuhiana Viose, muomu ikeye ue kumuesa ngozi ku vakua kuhona ku santsela na vakua vupi.
36 Tualelenuho kupua vakua nkeke ngue omo Isuenu uapua mukua nkeke.
37 “Cikuavo naua, likelenu kupaya vakuenu kaha nenu ka vaka mi paya. Likelenu kuhisa vakuenu kaha nenu ka vaka mihisa. Tualelenuho ku konekela vakuenu kaha nenu vaka mi konekela.
38 Tualelenuho kuhana kaha nenu vaka mihana. Vaka zukuila ha vikovelo vienu, seteko ya cili, ya ku konkena, ya ku nikumuna, kaha ya ku sulilila. Muomu seteko imu seteka nayo vakuenu, nenu ikeyo iva ka mi seteka nayo.”
39 Kaha ua va telele cisimo cikuavo nguendi: “Vuno kapuputa, a hasa ku tuamenena kapuputa mukuavo ni? Kati vose vaka uila mu cina?
40 Ndongesi ka hianene mulongisi uendi, vunoni uose ive ku longesa vuino a hasa kupua ngue mulongisi uendi.
41 Vika u talela kacisuasua kali ha liso lia muanoko, vunoni u hona kumona mukambo uli ha liso liove?
42 Vati uleka muanoko nguove: ‘Yaya, mana nji ku tundise kacisuasua kali ha liso liove,’ vunoni ka ua muene mukambo uli ha liso liove? Ove mukua civembulu, livange ku tundisa mukambo uli ha liso liove, amba u hase kumona mua cili mua ku tundisila kacisuasua kali ha liso lia muanoko.
43 “Ka kua kele muti ua cili, ue kuima vusuka vua ku vihia,* kaha naua ka kuakele muti ua kuvihia,* ue kuima vusuka vua cili.
44 Muomu muti uose ve ku u tantekeyela ku vusuka vuauo. Ca ku muenako, ka ve kuhela vinkuyu ku vimbimbo, ni vusuka vua vinyu ku tundzata.
45 Muntu ua cili ue ku tuhuisa viuma via cili ku vupite vuendi vua ku mutima. Vunoni mukua vupi ue ku tuhuisa viuma via ku vihia via ku vupite vuendi vua kuvihia. Muomu kanua kendi ke ku handeka vize vi na sulu ku mutima.
46 “Vika honi mue ku nji sanena ‘Muangana, Muangana!’ vunoni ka mue kulinga vi nje ku handeka?
47 Vunoni kutuala ha muntu uze eza kuli yange, evua mezi ange naku apangesa, me nji mi leke nga ua lifua neya:
48 Napu ngue umo yala muakele na kutunga ndzivo yendi, ua hindile cimo cina ca kulova, ca katuvile naha livue, ngeci ua tungilileho luvula. Vunoni mu liezile livazi, mema a sindumukile na kuveta ha ndzivo yaco, vunoni ka a hasele ku ininganga, muomu ua itungile vuino.
49 Vunoni, uose evua mezi ange kaha ka lingiko mumo, napu ngue umo yala ua tungile ndzivo ha livu lia ngoco, ca kuhona luvula. Mema a sindumukile na kuveta ize ndzivo, ngeci haze vene ya lundumukile. Kaha ku lundumuka cayo capuile cakama.”
Matota
^ Ni “Mbolo ya ku lekesa kuli Njambi”
^ Ni “Vakua ndzolela”
^ Ni “lungusi”
^ “ku levalesa ca ku hona kakondueso”
^ Ni “vua ku vola”
^ Ni “ua ku vola”
