Kuhitila Muli Luka 7:1-50
7 Mua manesele ku handeka via tondele kuleka vantu, ua kovelele mu Kapenama.
2 Umo kapitau ua masualale uakele na ngamba yendi ya lemene cikuma. Ngamba uaco uakele na kuvavala mua kama, kaha tele a lingila kutsa.
3 Uze kapitau mua vuile via Yesu, ua pingile vamo vakuluntu va vaYundeya linga vaka mu pinge, aku kanguise ngamba yendi.
4 Ngeci vaile kuli Yesu naku mu lambelela mua kama nguavo: “Na fuila ku tambula vukuasi vuove,
5 muomu ua lema muyati uetu, kaha ikeye vene ua tungile sinangonga yetu.”
6 Ngeci Yesu uaile navo, vunoni tele a lingila kuheta ku ndzivo, uze kapitau ua masualale tele na tumu laza vavusamba vendi, vaka leke Yesu nguavo: “Muangana, kati u lipakese kuiza, muomu ka nja fuililile kuku tambula mu ndzivo yange.
7 Ngeci nji na muene nguange, ka nja fuililile kuiza kuli yove. Vunoni handeka lika lizi, kaha ngamba yange a kanguka.
8 Muomu nange veku nji tumina, kaha naua kuli masualale vakala muintsi liange. Nga njileka umo uavo nguange, ‘Ya ku ngandi!’ aya, nga njileka mukuavo nguange, ‘Tuaya kuno!’ eza. Kaha nga njileka ngamba yange nguange, ‘Linga vingandi!’ avi linga.”
9 Yesu mua vuile ngoco, ua likomokelele mua kama, ua tengulukile na kutala mbunga yakele naku mu kava, naku handeka nguendi: ‘Nji mi leka nguange, cipue vene mu Isaleli yose, ka nja uanene lutsilielo luakama ngeci muolu.”
10 Kaha vaze vava tumine, mu va hilukile ku ndzivo, vaka uanene uze ngamba na kanguka.
11 Mu nima yaco, Yesu uaile ku mbonge iva lukile nguavo Naini, kaha vandongesi vendi na civunga ca kama vaile nendi.
12 Mua hetele ku hiehi na mbelo ya ize mbonge, ua muene vantu vali naku tuhuisa civimbi. Uze mutsi uapuile muana umolika. Cikuavo naua, naye uapuile ntuluue. Kaha mbunga ya yingi ya mu mbonge, yakele hamo na uze ntuluue.
13 Kaha Muangana mua mu muene, ua mu vuililile ngozi, ngeci ua mu lekele nguendi: “Kati ulile naua.”
14 Ngeci ua sueneneko, naku kuata ku vuhango.* Kaha vaze va vuambatele vemanene. Kaha ua handekele nguendi: “Mukuendze, nji kuleka nguange, Hinduka!”
15 Ngeci uze mutsi ua tumamene na kuputuka ku handeka. Kaha Yesu ua mu hanene kuli naye.
16 Ngeci liova lia kama, lia va uililile, kaha va putukile ku zumbangeya Njambi nguavo: “Ku na soloka kapolofeto ua kama hakati ketu.” Kaha naua, nguavo: “Njambi na vuluka vantu vendi.”
17 Kaha ou muzimbu ua viuma via lingile, ua lisanduokele mu Yundeya yose na vihela vikuavo viose via lihatele nayo.
18 Kaha vandongesi va Yoano, vaka mu lekele viuma viose evi.
19 Ngeci Yoano ua sanene vandongesi vendi vavali, kaha uava tumine va kehule Muangana nguavo: “Yove ivambele nguavo A Keza, ni tu lavelele ueka?”
20 Vaze vamala mu vaka hetele kuli Yesu, va handekele nguavo: “Yoano Mukua ku Mbatiza natu tumu tu kuihule, nguendi, ‘Yove ivambele nguavo A Keza, ni tu lavelele ueka?’”
21 Ha ola ize vene, ua kanguisile vantu vavengi ku mavezi naku misongo yavo ya kuliana. Kaha ua tundisile vasipilitu va kuzuala na kuimuisa meso a tupuputa.
22 Ngeci Yesu ua va kumbuluile nguendi: “Yenu muka leke Yoano viuma vi mu na mono na kuivua nguenu: “Tupuputa vali na kumona, vilema vali na kuenda, vakua mbumba vali naku va lelesa, tusinda matuitui vali na kuivua, vatsi vali naku va sangula kaha vihutu vali naku vambuluila muzimbu ua cili.
23 Ua vezika uze ka uana cisuntsuiso muli yange.”
24 Tunganda va Yoano mu vaile, Yesu ua putukile kuleka mbunga kutuala hali Yoano nguendi: “Vika mua ka muene mu likango? Mua ka muene lihongo lia kele naku ninganga na luhundzi ni?
25 Ni vika mua ka muene? Mua ka mueneko yala na zala vuzalo vua kuviakula* ni? Vakua kuzala vuzalo vua cili cikuma na kuyoya muono ua cili, vakala mu vinganda via vamiangana.
26 Ni vika muaile muku ka monako? Kapolofeto ni? Cili vene, nji mi leka nguange, Yoano ua hiana kapolofeto.
27 Ou ikeye iva tumbuile mu visoneka nguavo: ‘Nji tuma kanganda kange kulutue* luove, linga aka ku vuahesele njila.’
28 Muntu* na umo uahi ua hiana Yoano, vunoni uze napu ua mundende mu Vuangana vua Njambi, ikeye na mu hiana.”
29 (Kaha vantu vose na vakua kufuetesa lisimu mu vavuile ngoco, va tumbuile Njambi kupua mukua vuoloke, muomu vava mbatizile na mbatizimu ya Yoano.
30 Vunoni vaFaliseu na vaze va tantekeyele vuino Masiko, va sembuluile cizango* ca Njambi hali vakevo, muomu kava va mbatizile kuli Yoano.)
31 “Ava vantu vou muyati nji va setekesa na vika? Va na lifu na veya?
32 Vanapu ngue vanike vavandende va na tumama ha citanda, vali naku tambeka vakuavo vanike nguavo: ‘Tua mi sikilile vimbendo, vunoni enu ka mua kinine. Tua liniengele vunoni enu ka mua lilile.’
33 Na vuno vene, muezile Yoano Mukua ku Mbatiza, kalile cipue kunua vinyu, vunoni enu nguenu: ‘Ali na ndemone.’
34 Muana muntu neza, kaha ue kulia na kunua, vunoni enu nguenu: ‘Mua mu mono ou, mukua mutupu kaha uatsa ha vinyu, kavusamba ka vakua ku fuetesa lisimu na vakua vupi!’
35 Vunoni, mangana eku sambua kuhitila mu vilinga* viao via vuviuke.”*
36 Umo kaFaliseu ua tualeleleho kupinga Yesu linga akalie nendi. Ngeci Yesu ua kovelele mu ndzivo ya uze kaFaliseu naku ka tumama nendi ku mesa.
37 Kaha talenu! Umo mpuevo ua tsimanene mu mbonge yavo nguavo uapuile mukua vupi, mua tantekeyele nguendi Yesu ali na kulia* mu ndzivo ya kaFaliseu, ua nehele njava ya mazi a Alambastru a vueko vua cili.
38 Uezile kunima ya Yesu, ku viliato viendi, ngeci ua putukile kulila naku zulisa viliato via Yesu na masozi. Kaha ua hundile masozi aco na vinkambu viendi. Cikuavo naua, ua tsembele viliato via Yesu, naku muanienako mazi a vueko vua cili.
39 Uze kaFaliseu mua vi muene, ua handekele mu mutima uendi nguendi: “Ou yala nga uapuile mpundu kapolofeto, nga na nongonona nguendi ou mpuevo na mu kuata, uapua mukua vupi.”
40 Omo liaco, Yesu ua mu lekele nguendi: “Simone, njitonda ku kuleka vimo.” Simone nguendi: “Handeka, mulongisi!”
41 Kuakele vamo vamala vavali vakele na makongo kuli mukua ku konguesa vimbongo. Umo uakele na makongo a videnariu 500, mukuavo co a videnariu 50.
42 Mu kulinga ka vakele na vimo viahi via ku mu fueta, vose vavali ua va konekelele. Kaha, hali ava vavali, iya aka lema muakama uze ua va konguesele?”
43 Ngeci Simone ua mu kumbuluile nguendi: “Nji mona uze iva na konekela makongo a kama.” Yesu ua mu lekele nguendi: “Una handeka mua cili.”
44 Yesu ua tengulukile na kutala uze mpuevo, kaha ua lekele Simone nguendi: “Ua mono ou mpuevo? Nja kovela mu ndzivo yove, ka ua nji hanene mema a kutana ku viliato. Vunoni ou mpuevo na zulisa viliato viange na masozi, naku vi hunda na vinkambu viendi.
45 Yove ka ua nji tsuembele, vunoni tunde ha nji na kovelela muno, ou mpuevo ka likelele kutsuemba viliato viange.
46 Yove ka ua nji kuitile mazi ku mutue, vunoni ou mpuevo na kuiti mazi a vueko vua cili ku viliato viange.
47 Ngeci nji kuleka nguange, vutuhu vupi vuendi vunapu vua kama, va na muecelavuo, muomu na muesa cilemo ca kama. Vunoni uze ive ku konekela via vindende, ue kumuesa naua cilemo ca cindende.”
48 Ngeci Yesu ua lekele uze mpuevo nguendi: “Va naku konekela vipi viove.”
49 Vaze va tumamene nendi ku mesa, va putukile ku handeka hakati kavo nguavo: “Muntu muka ou, ua kulinga, akonekela na vupi?”
50 Vunoni Yesu ua lekele uze mpuevo nguendi: “Lutsilielo luove luna kuovola. Ya mu ciyulo.”
Matota
^ Ni “muhela ua kuambatela vatsi.”
^ Ni “vuzalo vua cili”
^ Mu ciNgelengu “kulutue lua cihanga cove”
^ Mu ciNgelengu “Ua ku semuka ku mpuevo”
^ Ni “ku tuamenena; vimamuna”
^ Mu ciNgelengu “mu vana vao vose”
^ Mukua vuviuke ue kusambua omo lia vilinga viendi via mangana.
^ Ni “tele na tumama ku mesa”
