Kuhitila Muli Luka 8:1-56
-
Vampuevo vakele na kukava Yesu (1-3)
-
Cisimo ca mukua kukuva (4-8)
-
Via lingisile Yesu kuta visimo (9, 10)
-
Vi ca lumbunuka cisimo ca mukua kukuva (11-15)
-
Ndeya ka veku ifuika (16-18)
-
Naye ya Yesu na vamuanaye Yesu (19-21)
-
Yesu a holuesa luhundzi luakama (22-25)
-
Yesu atuma vandemone mu vangulu (26-39)
-
Muana Njailu; umo mpuevo akuata ku vuzalo vua Yesu (40-56)
8 Ku tundaho, Yesu ua hitanganene mbonge ku mbonge na limbo ku limbo, mu kuambulula na kutuala muzimbu ua cili ua Vuangana vua Njambi, kaha vaze 12* vakele nendi,
2 na vamo vampuevo vava tundisile vasipilitu va kuzuala, naku va kanguisa ku mavezi avo. Vampuevo vaco vapuile: Maliya iva sanene nguavo Mandalena, uze iva tundisile vandemone va kupua 7.
3 Yoana mpuevo ya Kusa, mukua ku tuamenena ndzivo ya Helonde, na Suzana kaha na vampuevo vakuavo vavengi, vaze va pangesele vupite vuavo mu ku vakuasa.
4 Kaha omo mbunga ya kama ya likunguluile hamo na vantu vavengi va tundile ku vimbonge viose na kuiza kuli ikeye, ua va telele cisimo nguendi:
5 “Umo mukua kukuva uaile mu kukuva vimbuto viendi. Muakele na kukuva, vimo via uilile ku mukulo ua njila, ngeci vantu va vi liatangelele. Kaha tuzila va vilile.
6 Vimo via uilile ha livue, kaha mu nima ya kusoka viomine, muomu ka viakele na mema.
7 Vikuavo via uilile hakati ka vimbimbo, kaha vimbimbo via sokele hamo navio naku vikuika.
8 Vunoni vikuavo via uililile ha livu lia vuilo, ngeci mu via sokele, viemine vusuka vintsimbu vi pulakana 100.” Mua manusuile ku handeka evi, ua tambakenene nguendi: “Uose ali na matuitui a kuivua, evueko.”
9 Vunoni vandongesi vendi va muihuile vulumbunuiso vua cize cisimo.
10 Ngeci ua va kumbuluile nguendi: “Enu va mi hana vuhasi vua kuivuisisa mahungu a kulela a Vuangana vua Njambi. Vunoni ku vantu vose, viuma viose vili mu visimo, linga vutuhu va tala, va hone kumona, kaha vutuhu vevua, va hone kuivuisisa.
11 Ovu vukevuo, vulumbunuiso vua cino cisimo: Mbuto ikeyo lizi lia Njambi.
12 Ize ya uilile ku mukulo ua njila, yemanena vantu ve kuivua lizi, vunoni Ndiavu eza naku niangula lizi mu mitima yavo, linga kati va tsiliele na kuovoka.
13 Ize ya uilile ha livue, yemanena vantu vaze omo vevua lizi va litambula na ndzolela, vunoni kavesi na mizi. Va tsiliela lika mu kantsimbu kakandende, vunoni ha ntsimbu ya vieseko, va tanguka.
14 Ize ya uilile ha vimbimbo, yemanena vaze vevua lizi, vunoni ku lisosomua, vupite na senga viva hungumuna naku va mbimbitisa, kaha kavemi vusuka vuze vuheta ha kuhia.
15 Vunoni vize via uilile ha livu lia vuilo, vinapu vantu vaze va halakana lizi na mitima ya cili cikuma, kaha va liniunga na kuima vusuka naku kolesa cose.
16 “Na umo uahi, mu nima ya ku suameka ndeya, ue ku ifuikila mu cimo citenga, ni ku ihaka muintsi lia muhela, vunoni ue ku ihaka ha citumbiko ca vindeya, linga uose a kovela mu ndzivo a mone ceke.
17 Muomu na vimo viahi vi na vanda vintsa ka vika soloka, kaha na vimo viahi via ku suekesa vintsa ka vaka tantekeya cipue ku zomboloka.
18 Ngeci mukemuo, tualenu mana ku cifua ci mue kuivuilamo. Muomu uze ali navio, vaka mu vuelelelako vikuavo. Vunoni uze kesi navio, nambe vene vize vie ku singanieka nguendi ali navio vaka mu nyekavio.”
19 Kaha naye na vamuanaye vezile kuli ikeye, vunoni omo lia kulana ca mbunga ka va hasele ku mu suena mu hiehi.
20 Ngeci va mu lekele nguavo: “Vanoko na vantsongo vove va nemana hambandza, vatonda ku kumona.”
21 Ua va kumbuluile nguendi: “Ava ve kuivua lizi lia Njambi naku liononoka, vakevo vanana na vantsongo vange.”
22 Tangua limo, Yesu na vandongesi vendi va kovelele mu vuato kaha ua va lekele nguendi: “Tu zavukenu tuye mu sinia lia cisali.” Ngeci vaile.
23 Mu vakele naku zavuka, Yesu ua kosele. Kaha talenu! Luhundzi luakama lua katukile mu cisali. Ngeci vuato vua putukile kusula na mema, kaha vakele mu vusonde vua kama.
24 Ngeci vaile mu kumu hindula nguavo: “Mulongisi, Mulongisi tutsa!” Kaha ua hindukile naku tenukila luze luhundzi na mancimba a kama. Ngeci via likelele kaha kua lembamene.
25 Ngeci ua vehuile nguendi: “Amba lutsilielo luenu luli?” Vunoni vakevo vavuile liova liakama na ku likomokela, oku va lihandekesa umo na mukuavo nguavo: “Muntu ua kufua vati ou? Ua kulinga, atumina luhundzi na mema kaha vi muononoka!”
26 Va ka hetele mu sinia, ku cihela ca vaNgelasene, cize ca litala na Ngalileya.
27 Omo Yesu ua sulukile mu vuato, umo yala ua mu mbonge uakele na vandemone uezile kuli ikeye. Mua hitile ntsimbu ya kama, yala uaco kakele na kuzala cipue kukala hembo, vunoni uakele na kukala ha vihilo.
28 Mua muene Yesu, ua tambakanene naku mu tsikamena ku meso endi, kaha ua handekele na lizi liakama nguendi: “Vika utonda kuli yange, ove Yesu Muana Njambi Mukua Kuhiana Viose? Nja ku lambelela, kati unji yandese.”
29 (Muomu Yesu ua tumine uze sipilitu ua kuzuala atunde muli uze yala. Sipilitu uaco ua mu kuatele vintsimbu viavingi, kaha kusua kumo vantu vakele naku mu kuta malienge ku mavoko naku mikono oku va mu niungiliya. Vunoni uakele naku a vatula. Kaha uze ndemone ua kele naku mu tuala ku lahako na vantu.)
30 Yesu ua muihuile nguendi: “Lizina liove yove iya?” Ua mu kumbuluile nguendi: “Yange mbunga,” muomu vandemone vavengi va mu kovelele.
31 Kaha vaze vandemone va tualeleho ku mu lambelela linga kati a vambile mu cina* kacesi na masima.
32 Kuakele vumo vutanga vua vangulu, vuakele ku muncinda mu kulia. Ngeci vaze vandemone va lambelele Yesu ava tavese ku kovela mu vangulu, ngeci ua va tavesele.
33 Vaze vandemone va tundile muli uze yala naku ka kovela mu vangulu. Kaha vuze vutanga, vua lupukilile ku mungenia-ngenia naku uila mu cisali kaha vatsile.
34 Vunoni tuniungi va vuze vutanga mu va muene via lingikile, va teuele naku kambulula muzimbu uaco mu mbonge na mu membo.
35 Ngeci vantu vaile mu kumona viuma via lingikile. Kaha vezile kuli Yesu kaha va uanene uze yala iva tundisile vandemone na zala, ali honi vuino kaha na tumama ku viliato via Yesu. Ngeci vavuile liova.
36 Vaze va limuenene viuma viose evi, va lekeseleko vakuavo vati Yesu ua kanguisile uze yala uakele na vandemone.
37 Ngeci vantu vavengi va ku cihela cize ca Ngelasene, va lambelele Yesu atunde kuze, muomu vavuile liova lia kama. Kaha Yesu ua kovelele mu vuato linga aye.
38 Vunoni uze iva tundisile vandemone, ua tualeleho ku lambelela Yesu linga aye nendi, vunoni Yesu ua mu hiluisile naku mu leka nguendi:
39 “Hiluka lika kuimbo, naku tualelaho kuambulula viuma via na kulingila Njambi.” Ngeci uaile, na kuambulula via mu lingilile Yesu muaya mbonge yose.
40 Yesu mua hilukile, mbunga ya mu tambuile vuino, muomu vose vakele naku mu lavelela.
41 Vunoni talenu! Kuezile umo yala lizina liendi Njailu; uapuile ntuamena ua sinangonga. Kaha ua tsikamene ku viliato via Yesu na kuputuka ku mu lambelela linga aye ku ndzivo yendi,
42 Muomu muanendi umolika ua mpuevo, uze uakele na miaka 12, tele alingila kutsa.
Omo Yesu uakele na kuyako, mbunga yakele naku mu sindakana.
43 Kaha kuakele umo mpuevo uakele na musongo ua kuhita maninga mu miaka 12, vunoni na umo uahi ua hasele ku mu kanguisa.
44 Uze mpuevo uezile ku nima ya Yesu, kaha ua kuatele ku ntsongo ya vuzalo vuendi, ngeci haze vene, ua kangukile ku musongo uendi ua kuhita maninga.
45 Ngeci Yesu uehuile nguendi: “Iya na nji kuata?” Omo vantu vose va vianene, Petulu ua handekele nguendi: “Mulongisi, mbunga yayingi ya ku zengeleka kaha vali naku ku sindakana.”
46 Vunoni Yesu ua handekele nguendi: “Kuli umo na nji kuata, muomu njinevu ngolo ina nji tundu.”
47 Uze mpuevo mua muene nguendi va na mu nongonona, uezile oku a lizazela, ua uile kumeso endi kaha uambuluile kumeso a vose, vika ua mu kuatelele na vati ua kangukile ha ntsimbu ize vene.
48 Vunoni Yesu ua mu lekele nguendi: “Muanange, lutsilielo luove lu naku kanguisa. Ya mu ciyulo.”
49 Ntsimbu Yesu ua cikele naku handeka, kuezile umo yala ua ku ndzivo ya uze ntuamena ua sinangonga, naku muleka nguendi: “Muanove natsi laza, Kati u pakese naua mulongisi.”
50 Yesu mua vuile ngoco, ua lekele Njailu nguendi: “Kati uivue liova, tsiliela lika, muanove a yoya.”*
51 Mua hetele ku ndzivo, ka tavesele na umo uahi ku kovela nendi, kuvanga lika Petulu, Yoano, Tiango na ise ya muana na naye.
52 Vunoni vantu vose vakele na kulila na kulinienga kutsa ca uze muanampuevo. Ngeci Yesu uava lekele nguendi: “Kati mulile naua, muomu ou muana katsile na kosa lika.”
53 Mu vavuile ngoco, va putukile ku muzola naku mu sembulula, muomu va tantekeyele nguavo uze muanampuevo natsi.
54 Vunoni Yesu ua mu kuatele ku livoko naku musana nguendi: “Ove muanampevo, hinduka!”
55 Kaha sipilitu* yendi ya hilukile, ngeci haze vene ua hindukile. Kaha Yesu uava lekele va muhane viakulia.
56 Visemi vendi vatsile cintsima, vunoni ikeye uava lekele linga kati va lekeko na umo uahi viuma via lingikile.
Matota
^ Ni “vapostolo 12”
^ Talenu Mezi ava Lombolola
^ Mu ciNgelengu “ovoka.”
^ Ni “ngolo ya ku yoya”
