Kuhitila Muli Luka 9:1-62
-
Vaze 12 vava hana mpoko ya kuambulula (1-6)
-
Helonde avuila Yesu liova (7-9)
-
Yesu alisa vantu 5.000 (10-17)
-
Petulu atumbula nguendi Yesu ikeye Kilistu (18-20)
-
Yesu a handeka via kutsa cendi (21, 22)
-
Vandongesi va vusunga (23-27)
-
Ku himpuka ca Yesu (28-36)
-
Kanike ua yala ali na ndemone va mu kanguisa (37-43a)
-
Yesu a handeka naua via kutsa cendi (43b-45)
-
Vandongesi va lihoya kutuala hali iya ua kama (46-48)
-
Uose kesi naku tuluisa, ali ku mutamba uetu (49, 50)
-
Vakua Samaliya va viana Yesu (51-56)
-
Mua ku kavela Yesu (57-62)
9 Yesu ua kunguluile vaze 12, kaha uava hanene ngolo na mpoko ya ku tundisa vandemone vose naku kanguisa vavezi.
2 Ngeci uava tumine vaye na kuambulula via Vuangana vua Njambi naku kanguisa vantu.
3 Uava lekele nguendi: “Kati muambate na vimo viahi mu vungendzi vuenu, nambe mulamu, cipete ca viakulia, mbolo, vimbongo* ni vizalo vivali.*
4 Vunoni mu ndzivo yose-oyo imu kovela, kalenumo noho ha mu ka tundilamo.
5 Kuose-okuo ku vaka viana ku mi tambula, mu muka tunda mumbonge yaco, totomonenu mpumputa ku viliato vienu linga vupue vukaleho kuli vakevo.”
6 Ngeci vaile mu cifuti cose, na kuhitangana muaya membo mu kuambulula muzimbu ua cili naku kanguisa vantu ku vihela viose viva hitile.
7 Kaha Helonde* mukua kusika* mbonge, mua vuile viuma viose via kele na kusoloka, ua likomokelele mua kama. Muomu vamo vakele naku handeka nguavo Yoano va namu sangula ku vatsi.
8 Vunoni vakuavo nguavo, Eliya na soloka, kasi vakuavo nguavo umo kapolofeto ua ku laza ikeye na sanguka.
9 Helonde ua handekele nguendi: “Yoano nji na mu tapa laza mutue. Amba ou ali na kulinga viuma vi njili na kuivua iya nkuma?” Ngeci ua tondele mua kama ku mu mona.
10 Kaha vapostolo mu va hilukile, va lekele Yesu viuma viose viva lingile. Haze vene Yesu uaile navo kua likaliavo, ku mbonge iva sana nguavo Mbetesainda.
11 Vunoni mbunga mu ya tantekeyele kuaile, ya mu kavele. Kaha uava tambuile mua cili na kuputuka ku vambuluila via Vuangana vua Njambi, naku kanguisa vose vakele na kuvavala.
12 Vunoni litangua mu lia kele na kutoka, vaze 12 vezile kuli ikeye nguavo: “Leka mbunga vaye muaya membo na mehia, vaka tonde kua kukosa na viakulia, muomu kuno kutuli ku lahako na membo.”
13 Vunoni ikeye ua va lekele nguendi: “Va hanenu yenu viakulia.” Kaha va mu kumbuluile nguavo: “Ka tuesi na viakulia vikuavo, tuli lika na vimbolo vitanu na vantsi vavali, mpano yetu tua pande kuya linga tu ka landele viakulia mbunga yose eyi.”
14 Kuakele vamala va heta ku 5.000. Vunoni Yesu ua lekele vandongesi vendi nguendi: “Va lekenu linga va tumame mu tuvivunga tua vantu 50.”
15 Ngeci vandongesi vendi va lingilemo, kaha vantu vose va tumamene.
16 Ua nonele vize vimbolo vitanu na vantsi vavali, kaha ua talele muilu naku vundila. Mu nima yaco, ua munguile mbolo naku ihana ku vandongesi vendi, hamolika na vantsi, linga vakevo co va pangele mbunga.
17 Ngeci vose valile, vekutile, kaha va kunguluile visupo viose na kusulisa vihele 12.
18 Ha ntsimbu ikuavo, omo uakele naku vundila lika liendi, vandongesi vendi vezile kuli ikeye. Ngeci ua vehuile nguendi: “Mbunga vali naku handeka nguavo yange iya?”
19 Kaha nguavo: “Vamo nguavo yove Yoano Mukua ku Mbatiza, vakuavo nguavo Eliya, kaha vakuavo nguavo umo kapolofeto ua ku laza na sanguka.”
20 Ngeci ua vehuile nguendi: “Amba yenu co nguenu yange iya?” Petulu ua mu kumbuluile nguendi: “Yove Kilistu ua Njambi.”
21 Ngeci ua va vindikile linga kati va lekeko na umo uahi.
22 Uava lekele nguendi: “Muana muntu na pande kuhita mu tuyando tua tuingi, naku mu viana ku vakuluntu, na vakuluntu va vasasendote na vakua kusoneka. Kaha vaka mu tsiha, vunoni aka sanguka ha litangua lia mu citatu.”
23 Ua lekele naua vantu vose nguendi: “Nga muntu atonda ku nji kava, a liviane ikeye vavenya, na kuambata citi cendi ca kayando* tangua na tangua, kaha a tualeleho ku nji kava.
24 Muomu uose atonda kuohiela muono uendi, aka u zimbalesa. Vunoni uose a zimbalesa muono uendi omo liange, aka u uana.
25 Muomu seho ika iliho nga muntu apita viuma viose via ha mavu, vunoni a zimbalesa muono uendi naku linongesa ikeye vavenya?
26 Uose anji vuila ntsuamua naku vuila ntsuamua mezi ange, Muana muntu nendi aka mu vuila ntsuamua mua keza mu vumpahu vuendi, na vua Ise na vua tungelo va kulela.
27 Vunoni nji mileka vusunga nguange, kuli vamo va nemana hano kava katsi kuvanga va na mono Vuangana vua Njambi.”
28 Mu mua hitile matangua 8, tunde ha handekelele aa mezi, uaile mumo lika na Petulu, Yoano, na Tiango. Ua kandukile navo ku muncinda mu ku vundila.
29 Ntsimbu uakele naku vundila, cihanga cendi calulukile* na vuzalo vuendi vua tokele mua kama naku viakula.
30 Kaha talenu! Vamala vavali vakele naku simutuila nendi. Vapuile Mosesa na Eliya.
31 Vamala vaco va solokele na vumpahu kaha va putukile ku handeka via vungendzi vuendi vua kuya ku Yelusalema vuze vuakele na kusuena mu hiehi.
32 Petulu na vakuavo vakele na ku nenguka, vunoni mu va niangumukile va muene vumpahu vua Yesu na vamala vavali vemanene nendi.
33 Vaze vamala mu vakele na kuya, Petulu ua lekele Yesu nguendi: “Mulongisi ca cili nga tukala kuno vene. Tu tunga vimbalaka vitatu: imo yove, imo ya Mosesa, ikuavo co ya Eliya.” Vunoni Petulu ka tantekeyele via kele naku handeka.
34 Ntsimbu tele aci handeka evi viuma, kuezile liselua lia putukile ku va fuika. Kaha mu lia va fuikile mu vutuntu vavuile liova.
35 Kaha mu liselua mua tundile lizi ngualio: “Ou ikeye Muanange inja hangula. Mu halakanenu.”
36 Mu ntsimbu iva vuile lizi liaco, va muene Yesu na sala lika liendi. Vunoni va holokele kulu, kaha mu matangua aze ka va lekeleko na umo uahi viuma viva muene.
37 Lia mukuavo mu va sikulukile ha muncinda, mbunga ya kama yezile kuli Yesu.
38 Kaha umo yala uakele mu mbunga ua tambakanene nguendi: “Mulongisi, sukulukambu, aci tale muanange ua yala, ikeye lika injili nendi.”
39 Sipilitu ua kuzuala mue ku mu kuata, oho vene, ue kuputuka ku litetela, naku mu lingisa kulitunya, naku tutumuka lifulu ku kanua. Kaha sipilitu uaco keku mu tunda vuasi, kuvanga noho na mu vulumuna.
40 Nji na pingile vandongesi vove va tundise sipilitu uaco, vunoni kava hasele.”
41 Kaha Yesu ua handekele nguendi: “Enu vakua muyati ua kuhona lutsilielo kaha uaku hilimana, ntsimbu ingahi nji ka tualelelaho kukala nenu naku mi lemuua? Neha kuno muanove.”
42 Kaha omo uze muana uakele na kusuena kuli Yesu, ndemone ua mu uisilile ha mavu, naku mu sinyisa mua kama. Vunoni Yesu ua tenukilile uze sipilitu ua kuzuala, ngeci ua kanguisile uze muana naku muhana kuli ise.
43 Kaha vose va likomokelele mua kama omo lia vukama vua ngolo ya Njambi.
Kaha ntsimbu vantu vakele naku likomokela evi viuma, Yesu ua lekele vandongesi vendi nguendi:
44 “Halakanenu vuino naku vuluka ano mezi, muomu Muana muntu vaka muenda vungungu naku muhana mu mavoko a vantu.”
45 Vunoni ka vevuisisile via handekele. Muomu vava suekelelevio, linga kati vevuisise vi alomboloka. Vandongesi vakele na liova lia ku muihula vika alumbunuka aa mezi.
46 Vandongesi va putukile ku lihoya kutuala ha iya ua kama hakati kavo.
47 Yesu mua tantekeyele visinganieka viavo, ua sanene umo kanike naku muimika ku mukulo uendi,
48 Kaha uava lekele nguendi: “Uose a tambula ou kanike mu lizina liange, nange na nji tambula. Kaha uose anji tambula, na tambula na uze ua nji tumine. Muomu uose a likehesa hakati kenu vose, ikeye ua kama.”
49 Yoano ua mu kumbuluile nguendi: “Mulongisi, tua muene umo a pangesa lizina liove muku tundisa vandemone, ngeci tuesekele ku mu vindika, muomu keku kukava ngeci muetu.”
50 Vunoni Yesu ua mu kumbuluile nguendi: “Kati mu mu vindike, muomu uose kesi naku mi luisa, ali ku mutamba uenu.”
51 Omo ntsimbu yendi ya kuya muilu, yakele na kusuena mu hiehi,* Yesu ua likuminyine kuya ku Yelusalema.
52 Ngeci ua livangele kutuma tunganda. Kaha vaile, vaka kovelele mulimbo lia Samaliya muku mu vuahesela vua lumo viuma.
53 Vunoni vakua Samaliya kava mu tambuile, muomu ikeye tele na likuminya laza kuya ku Yelusalema.
54 Kaha vandongesi Tiango na Yoano mu vavi muene va handekele nguavo: “Muangana, citava tu sane tuhia va muilu, linga vaku va nongese?”
55 Vunoni Yesu ua tengulukile naku va tenukila.
56 Ngeci vaile muimbo lieka.
57 Mu vakele na kuya, kuezile umo nguendi: “Nji ku kavangeya kuose-oko ku uya.”
58 Vunoni Yesu ua mu lekele nguendi: “Vambandze vakala na vina kaha tuzila vakala na masua, vunoni Muana muntu kesi na hamo hahi ha ku sakatela mutue.”
59 Yesu ua lekele mukuavo nguendi: “Pua ndongesi yange.” Vunoni ua mu kumbuluile nguendi: “Muangana, aci njitave njika tsinde tata.”
60 Yesu ua mu kumbuluile nguendi: “Ecela vatsi va tsinde vatsi vavo. Vunoni ove, ya u kambulule Vuangana vua Njambi kuose.”
61 Mukuavo uamu lekele naua nguendi: “Muangana, nji kukava, vunoni aci nji tavese njika salese vusoko vuange.”*
62 Yesu ua mu lekele nguendi: “Uose na kuata ku cipululo, vunoni atala naua viuma vili ku nima, ka fuililile Vuangana vua Njambi.”
Matota
^ Mu ciNgelengu “palata”
^ Ni “cikovelo cikuavo.”
^ Ou ikeye Helonde Antipa.—Talenu Mizimbu ya ku Vuezako
^ Mu ciNgelengu “nguvulu”
^ Talenu Mezi ava Lombolola
^ Ni “ca himpukile”
^ Mu ciNgelengu “iya naku lipuisamo”
^ Ni “vakua ndzivo yange.”
