Kuhitila Muli Mako 1:1-45
-
Kuambulula ca Yoano Mukua Kumbatiza (1-8)
-
Mbatizimu ya Yesu (9-11)
-
Satana eseka Yesu (12, 13)
-
Yesu aputuka kuambulula mu Ngalileya (14, 15)
-
Yesu alanya vandongesi va katete (16-20)
-
Sipilitu ua kuzuala vamu tundisa (21-28)
-
Yesu akanguisa vavengi mu Kapenama (29-34)
-
Yesu avundila kua likaliendi (35-39)
-
Yala mukua mbumba akanguka (40-45)
1 Vuno vukevuo vuputukilo vua muzimbu ua cili kutuala hali Yesu Kilistu, Muana Njambi.
2 Ngue mu va visoneka mu livulu lia kapolofeto Isaya nguavo: “(Tala! Nji tuma kanganda kange ku lutue luove,* linga aka ku vuahesele njila.)
3 Kuli lizi lia umo ali na kutambeka mu likango nguendi: ‘Vuahesenu njila ya Yehova!* Sungamesenu vitapalo viendi.’”
4 Yoano Mukua Kumbatiza uakele mu likango mu kuambulula via mbatizimu ize yapua citantekeyeso ca kualuluka, linga vupi vavu konekele.
5 Kaha vantu vose va mu Yundeya na vose va tungile mu Yelusalema vakele na kuya kuli ikeye kaha uakele naku va mbatiza* mu ndonga Yondau, oku va litavela vipi viavo ca kuhona kusueka.
6 Yoano uakele na kuzala vizalo via maka a kamelu na muiva ua cilambu* mu mbunda. Kaha uakele na kulia vambimba na vuci.
7 Uakele na kuambulula nguendi: “Ou eza mu nima yange, uanji hiana ku ngolo kaha kanja fuililile kukotama na kuzitula mikole ya vinkaku viendi.
8 Yange njina mi mbatiza na mema vunoni ikeye aka mi mbatiza na sipilitu santu.”
9 Ku matangua aze, Yesu ua tundile ku Nazaleta ya ku Ngalileya kaha Yoano uamu mbatizile mu Yondau.
10 Kaha haze vene mua tuntukile mu mema, ua muene melu ana sokoloka kaha sipilitu isikuluka hali ikeye ngue livembe.
11 Kaha muilu mua tundile lizi ngualio: “Yove Muanange, inja lema, ueku nji vuisa ndzolela.”
12 Haze vene, sipilitu ya mu lingisile kuya mu likango.
13 Uakele mu likango matangua 40, kaha Satana ua muesekele. Yesu uakele hamo na tusitu* va mu musenge, vunoni tungelo vakele naku mu pangela.
14 Yoano tele va namu soko mu kamenga, Yesu uaile ku Ngalileya mu kuambulula muzimbu ua cili ua Njambi,
15 nguendi: “Ntsimbu iva tumbika ya hete kaha Vuangana vua Njambi vuli mu hiehi. Alulukenu na kutsiliela mu muzimbu ua cili.”
16 Omo Yesu uakele na kuhita ku mukulo ua cisali ca Ngalileya, ua muene Simone na muanaye Anduleu vata manda avo mu cisali, muomu vapuile vakua kutsiha vantsi.
17 Kaha Yesu uava lekele nguendi: “Njikavenu kaha njika mi puisa vakua kukuata vantu.”
18 Haze vene vasile manda avo, vamu kavele.
19 Mua suenene kavundende ha lutue, ua muene vana va Sembendeu, Tiango na muanaye Yoano vakele mu vuato mu kuviukisa manda avo,
20 ngeci haze vene uava sanene. Kaha va sezele ise Sembendeu mu vuato na vakua kupanga kaha vamu kavele.
21 Va kovelele mu Kapenama. Kaha mu ya hetele Sapalalo, ua kovelele mu sinangonga na kuputuka kulongesa.
22 Vantu va likomokelele cikuma mu vavuile kulongesa cendi. Muomu uava longesele ngue muntu ali na mpoko ya kutunda kuli Njambi, kati ngue vakua kusoneka.
23 Ha ntsimbu yaco, muze mu sinangonga muakele umo yala uakele na ndemone kaha ua tambakanene nguendi:
24 “Vika utonda kuli yetu ove Yesu Mukua Nazaleta? Uneza mu ku tu nongesa ni? Nji ku tantekeya mua cili, Yove Mukua Kulela ua Njambi!”
25 Vunoni Yesu ua tenukilile uze ndemone nguendi: “Holoka, kaha tunda muli ikeye!”
26 Ngeci uze ndemone ua uisilile uze yala ha mavu naku mu shinyisa kaha ua litetelele na lizi lia kama, ngeci uamu tundile.
27 Omo liaco, vose va likomokelele mua kama na kuputuka ku lihandekesa hakati kavo nguavo: “Vikevi? Eci cinapu kulongesa ca ciha! Muomu ali na mpoko ya kutumina vasipilitu va kuzuala, kaha vali naku muononoka.”
28 Ngeci muzimbu ua viuma via lingile, ua lisanduokele vuasi-vuasi ku vihela viose via mu cifuti ca Ngalileya.
29 Mu va tundile mu sinangonga, vaile ku ndzivo ya Simone na Anduleu. Vaile hamo na Tiango na Yoano.
30 Nayemueno ya Simone uakele ha muhela muomu uakele na kuvavala masikasika, ngeci haze vene va lekeleko Yesu.
31 Ngeci uaileko uamu kuatele ku livoko naku mu katula. Kaha aze masikasika amu tundile ngeci ua putukile ku va pangela.*
32 Ku cinguezi mu lia lahukile litangua, vantu vamu nehelele vakua kuvavala vose na vaze vakele na vandemone.
33 Kaha mbonge yose ya likunguluile ha mbelo.
34 Ngeci ua kanguisile vantu vavengi vakele na misongo yaku liseza-seza kaha na kutundisa vandemone vavengi. Vunoni ka tavesele vandemone va handeke muomu va tantekeyele nguavo ikeye Kilistu.
35 Lia mukuavo cimene-mene, tele kuna ci zivala, Yesu ua hindukile na kuya kua lika liendi kaha uaka putukile kuvundila.
36 Vunoni Simone hamo lika na vaze vakele nendi, vaile mu kumu tonda
37 ngeci mu vamu uanene, vamu lekele nguavo: “Vantu vose vali naku kutonda.”
38 Vunoni uava kumbuluile nguendi: “Tuyenu ku cihela ceka, ku vimbonge vili mu hiehi linga nakuo nji kambuluileko, muomu vikevio vi njezila.”
39 Ngeci uaile na kuambulula mu visinangonga viavo mu Ngalileya yose, oku atundisa vandemone.
40 Kaha kuezile umo mukua mbumba uamu lambelele naku mu tsikamena nguendi: “Nga ua zange, uhasa kunji lelesa.”
41 Ngeci Yesu ua muivuilile ngozi, uoluele livoko liendi naku mu kuata, kaha nguendi: “Nja zange! Pua ua kulela.”
42 Haze vene, mbumba ya mu huile kaha uapuile ua kulela.
43 Ngeci Yesu uamu lekele aye, naku mu vindika nguendi:
44 “Kati ulekeko na umo uahi, vunoni ya uka lisolole kuli sasendote na kuhana viuma via ku lilelesa via sikile Mosesa linga vipue vukaleho kuli vakevo.”
45 Vunoni uze yala mua tundile haze, ua putukile kuambulula uze muzimbu naku usanduola kuose mu cifua ca kulinga, Yesu ka hasele honi kukovela mu imo mbonge mutania muelu, vunoni uakele hambandza ku vihela kua kuhona vantu. Vutuhu ngoco, vantu va ku vihela viose va tualeleho kuiza kuli ikeye.
Matota
^ Mu ciNgelengu “ku lutue lua cihanga cove”
^ Talenu Mizimbu ya ku Vuezako
^ Ni “ku va mbuitika”
^ Ni “cipa”
^ Ni “vikashama”
^ Ni “ku va vuahesela viakulia.”
