Kuhitila Muli Mako 12:1-44
12 Kaha ua putukile ku va tela cimo cisimo nguendi: “Umo yala ua limine lihia lia vinyu kaha ua lizingilikile na citali. Ua hindililemo cina ca kutikila vinyu na kutunga ndzivo ya mukua kuniunga kaha ua sile lihia kuli vakua kulima, na kuya vungendzi ku cifuti ceka.
2 Mu ya puileho ntsimbu ya kutia,* ua tumine ngamba yendi kuli vakua kulima linga vaka mu haneko vusuka vua mu lihia liendi lia vinyu.
3 Vunoni vakua kulima va pupile uze ngamba naku mu hiluisa mavoko-voko.
4 Kaha ua tumineko ngamba mukuavo, vunoni nendi vamu pupile ku mutue naku mu sahula.
5 Ua tumineko naua ngamba mukuavo, vunoni vamu tsihile. Ua tumineko naua vakuavo vavengi, vamo vava pupile vakuavo vava tsihile.
6 Ua salele lika naumo, muanendi ya lema cikuma. Ngeci uamu tumineko na kuhandeka nguendi, ‘Muanange vaka mu singimika.’
7 Vunoni vakua kulima va lihandekesele hakati kavo nguavo, ‘Ou ikeye suana. Tuyenu tu mu tsihe linga vusuana vupue vuetu.’
8 Ngeci vamu kuatele, vamu tsihile naku mumbila hambandza ya lihia lia vinyu.
9 Vika aka linga vavenya lihia? Aku va tsiha na kuhana lize lihia lia vinyu ku vantu veka.
10 Nkuma ka mua tandele aa mezi aku Visoneka nguao: “Lize livue li va vianene vakua kutunga, likelio linapu livue lia seho lia mu mbango?*
11 Yehova* ikeye na vi puisamo, eci cinapu cuma ca cili cikuma ku meso etu.’”
12 Omo liaco, va tondele kumu kuata vunoni vavuile liova lia mbunga muomu va nongonuene nguavo cisimo ca tele, ca talekesele hali vakevo. Ngeci vamu sile, vaile.
13 Mu nima yaco, va tumine vamo vaFaliseu na vakua cikota ca Helonde linga vamu uanene mulonga ku mezi endi.
14 Kaha mu va hetele vamu lekele nguavo: “Mulongisi, tu tantekeya nguetu u mukua vusunga, ka ue kutonda visangala via vantu muomu ka ue kutuala mana ku cifua ci ve ku solokelamo vantu, vunoni ue kulongesa njila ya Njambi mu vusunga. Citava kufueta lisimu lia muntu ku muntu kuli Sezale ni kuahi?
15 Vuno tua pande kufueta ni kuahi?” Mua nongonuene civembulu cavo, uava lekele nguendi: “Vika muli naku njesekela? Nji nehelenu imo denariu* nji ci itale.”
16 Ngeci vamu nehelele denariu imolika kaha ua vehuile nguendi: “Cihanga ceya na lizina lieya va na hakaho?” Va kumbuluile nguavo: “Via Sezale.”
17 Ngeci Yesu uava kumbuluile nguendi: “Fuetenu via Sezale kuli Sezale, vunoni via Njambi kuli Njambi.” Mu vavuile ngoco, va komokele cikuma.
18 Vamo vaSanduseu vaze vakele na kuhandeka nguavo cisangukilo ka ca keleko, vezile na kuihula Yesu nguavo:
19 “Mulongisi, Mosesa ua tu sonekelele nguendi nga umo yala atsa na kuseza mpuevo vunoni ka sezele vana, muanaye na pande kuambata uze mpuevo linga amu semeneko vana.
20 Kuakele vamo vamala 7 vapuile vamuanaye. Ua kulivanga uambatele mpuevo, vunoni uatsile ca kuhona vana.
21 Kaha uamu civali ua muambatele, vunoni uatsile ca kuhona vana, mukemuo mu cafuile na kuli uamu citatu.
22 Kaha vose 7 va lingilemo, vunoni va tsile ca kuhona kuseza vana. Muku manusuila, mpuevo uaco nendi uatsile.
23 Ngeci mukemuo, ha cisangukilo, uze mpuevo akapua ueya? Muomu vose 7 va muambatele.”*
24 Yesu uava kumbuluile nguendi: “Mua sevuka, muomu kamu tantekeya cipue Visoneka ni ngolo ya Njambi.
25 Muomu ha cisangukilo, vamala ka va kambata cipue vampuevo kusomboka, va kapua ngue tungelo muilu.
26 Kutuala ha cisangukilo ca vatsi, ka mua tandele via muzimbu ua ciputa mu livulu lia Mosesa, omo Njambi uamu lekele nguendi: ‘Yange Njambi ya Avilahama, Njambi ya Isake na Njambi ya Yakomba’?
27 Ikeye kati Njambi ya vatsi, vunoni ya vaze vali na muono. Enu mua sevuka cikuma.”
28 Kaha umo ua vakua kusoneka uezile, uavuile vali naku likandula vimpata kaha mua muene nguendi Yesu na va kumbulula mua cili, ua muihuile nguendi: “Lisiko lika lia kulivanga* ku masiko ose?”
29 Yesu ua kumbuluile nguendi: “Lia kulivanga eli, ‘Halakana ove Isaleli, Yehova Njambi yetu ikeye Yehova umolika.
30 Kaha ua pande kulema Yehova Njambi yove na mutima uove uose, na muono* uove uose, na mana ove ose, na ndzili yove yose.’
31 Kaha lia mu civali likelio eli, ‘Ua pande kulema mukueni ngue mu ua lilema ove vavenya.’ Kakuesi lisiko likuavo lia kama kuhiana aa.”
32 Ngeci uze mukua kusoneka ua handekele nguendi: “Mulongisi, una handeka vusunga, Njambi uapua Umolika kaha kakuesi ueka,’
33 ngeci kumu lema na mutima uose na kuivuisisa cose na ndzili yose, na kulema mukuetu ngue mu tua lilema yetu vavenya, cakala na seho kuhiana vikombelo viose via kutsimika na mavuana ose.”
34 Yesu mua muene nguendi na kumbulula vuino, uamu lekele nguendi: “Kauesi ku lahako na Vuangana vua Njambi.” Vunoni naumo naua uahi uakele na kusimpa ca ku muihula vimo.
35 Kaha Yesu mua tualeleho kulongesa mu tembele, ua vehuile nguendi: “Omo lia vika vakua kusoneka ve kuhandeka nguavo, Kilistu uapua muana Ndaviti?
36 Muomu na vukuasi vua sipilitu santu, vavenya Ndaviti ua handekele nguendi, ‘Yehova ua lekele Muangana uange nguendi: “Tumama ku livoko liange lia cilio, noho ha njika hakela vitozi vove muintsi lia viliato viove.”’
37 Nga Ndaviti amu tumbula nguendi Muangana, vati honi uapua naua muanendi?”
Kaha mbunga yakele naku mu halakana na ndzolela.
38 Muakele naku va longesa, ua handekele nguendi: “Zangamenu na vakua kusoneka vaze vatonda kuendangana na vuzalo vua laha, kaha vatonda ku va meneka ha vitanda,
39 vatonda naua kutumama ha vituamo via ku lutue* mu visinangonga kaha na kukala ha vihela via vukama ku vilika.
40 Ve kutuva* vupite vua vantuluue na kulinga vivundilo via laha linga va komouese vantu. Ava va ka tambula cihiso ca kama cikuma.”
41 Yesu mua tumamene, ua sungamene haze hakele vikasa via milambu. Ngeci ua putukile kumona vantu va hakamo vimbongo kaha vampite vavengi vakele na kuuisilamo vimbongo via vingi.
42 Haze vene kuezile umo ntuluue ua cihutu, ua hakelemo tumbongo tuvali tua ndando ya indende.*
43 Ngeci ua sanene vandongesi vendi naku va leka nguendi: “Nji mileka vusunga nguange, ou ntuluue na hakamo vimbongo via vingi, kuhiana vose va na haka vimbongo mu vikasa via milambu.
44 Muomu ava vose, va na hakamo vuana vua kutunda ku vupite vuavo vua vuingi, vunoni ikeye ku vuhutu vuendi, na hakamo viose via pandele ku liyoyesa navio.”
Matota
^ Ni “kungula”
^ Mu ciNgelengu “linapu mutue ua mu mbango”
^ Talenu Mizimbu ya ku Vuezako
^ Ni “mbongo ya palata”
^ Ni “kusombola.”
^ Ni “lia kama”
^ Talenu Mezi ava Lombolola
^ Ni “vituamo via cili cikuma”
^ Mu ciNgelengu “kulia vindzivo”
^ Mu ciNgelengu “vilepton vivali.”
