Kuhitila Muli Mako 13:1-37
13 Omo uakele na kutunda mu tembele umo ua vandongesi vendi uamu lekele nguendi: “Mulongisi, tala kuviuka caa mavue nevi vindzivo!”
2 Vunoni Yesu uamu kumbuluile nguendi: “Ua mono evi vindzivo viose via kama via kama? Ka haka sala livue nalimo liahi helu lia likuavo, viose vaka vi lundumuina ha mavu.”
3 Mua tumamene ha Muncinda ua Olivela ha cisunga na tembele, Petulu, Tiango, Yoano na Anduleu va muihuile kua likaliavo nguavo:
4 “Tu leke, ntsimbu ika viuma evi vika lingika na citantekeyeso cika ci ka muesa nguavo evi viuma viose vi na hete ku ntsongo?”
5 Ngeci Yesu ua putukile ku va leka nguendi: “Zangamenu linga naumo uahi ami hungumune.
6 Muomu vavengi vakeza mu lizina liange nguavo, ‘Yange vene ikeye,’ kaha vaka hungumuna vavengi.
7 Cikuavo naua, mu kevua vindzita na mizimbu ya vindzita vunoni kati mu kevue liova, muomu evi viuma via pande kusoloka, vunoni kukotoka ci cili kanda.
8 “Muomu cifuti ci ka katukila cifuti na vuangana vuka katukila vuangana; kaha kuka kala mandunduma ku vihela via kuliseza-seza; cikuavo naua kuka kala ndzala. Viose evi vi kapua vuputukilo vua visoti.
9 “Vunoni enu, zangamenu. Muomu vantu vaka mi tuala mu vindzango naku mi veta makote mu visinangonga. Kaha vaka mi tuala ku meso a vanguvulu na vamiangana omo lizina liange, linga vu kapue vukaleho kuli vakevo.
10 Cikuavo naua, muzimbu ua cili va na pande ku uambulula ha katete ku miyati yose.
11 Kaha omo vaka mi kuata naku mi sompesa, kati muka lisosomue na vika muka handeka. Vunoni muka handeka vi vaka mi hana ha ola oyo vene, muomu kati yenu muka handeka vunoni sipilitu santu.
12 Cikuavo naua, muntu aka tsihisa muanaye kaha cisemi ua yala aka tsihisa muanendi, kaha vana va kalulukila visemi vavo naku va tsihisa.
13 Kaha vantu vose vaka mi zinda omo lizina liange. Vunoni uose akolesa na kuntsongo, ikeye akovoka.
14 “Ngeci mukemuo, omo muka mona cuma ca kuzuala cize ce kuneha kunonga cinemana haze ka ca pandele (mukua kutanda ananguke), vaze vali mu Yundeya, va putuke kutinina ku mincinda.
15 Kaha muntu ali helu lia ndzivo kati asuluke ni ambe kukovela mu ndzivo yendi akambate cimo cuma.
16 Na muntu ali mu lihia, kati aka hilukile vitenga via na seza ku nima ni kuambata cikovelo cendi ca helu.
17 Ngongo ya vaze va kemita na kuamuesa ku matangua aco!
18 Tualelenuho kuvundila linga evi viuma kati vi ka kaleko mu cisika,
19 muomu matangua aco, akapua matangua a lamba ya kulinga kanda ici kaleko tunde ha tangelele Njambi viuma, kuheta na ntsimbu ize, kaha ka ika kalako naua.
20 Mua vusunga, nga Yehova kukehesa matangua aco kuahi, nga naumo uahi akovoka. Vunoni omo lia vaze va ana hangula, matangua aco na akehesa.
21 “Cikuavo naua, nga muntu aka mileka nguendi, ‘Talenu! Kilistu uno ali kuno,’ ni nguendi ‘Talenu, uze ali kuze,’ kati muka mu tave.
22 Muomu kukeza vaKilistu va makuli na vapolofeto va makuli kaha vaka linga vikomoueso na vitantekeyeso muku sevuisisa, nga citava, cipue vaze va kuhangula.
23 Vunoni enu vingilenu, muomu njina mi lunguila vualumo viuma viose.
24 “Vunoni ku matangua aze, mu nima ya lamba yaco, litangua lika zivala na ngonde ka ika teteka naua,
25 kaha vintongonosi vi kaua muilu na ndzili ya mu melu ika lininganga.
26 Kaha vaka mona Muana muntu eza ha maselua na ngolo ya kama na vumpahu vua kama.
27 Kaha aka tuma tungelo vendi linga vaka kungulule vaze va kuhangula mu vimbango viuana,* tunde kuntsongo ya mavu, kutuala kuntsongo ya lilu.
28 “Lilongesenu vimo ku cisimo ca muti ua mukuyu: Nga tumintango tu putuka ku sokolokela na mefo aputuka ku tuikilila, mu tantekeya nguenu ntondue ili mu hiehi.
29 Na vuno vene, omo mu mona kusoloka ca viuma viose evi, tantekeyenu nguenu, ikeye ali mu hiehi ku mbelo vene.
30 Nji mileka vusunga nguange, ou muyati ka ukahua kuvanga viuma viose evi via soloka.
31 Melu na mavu vika hita, vunoni mezi ange ka aka hiti.
32 “Kutuala ha litangua na ola ize, naumo uahi avi tantekeya, cipue tungelo va muilu ni Muana, vunoni Tata lika.
33 Tualelenuho kuvingila, tonenu, muomu ka mu tantekeya ntsimbu iva na hangula.
34 Cinapu ngue umo yala ua sile ndzivo yendi na kuya ku cifuti ceka kaha ua hanene mpoko ku vangamba vendi. Umo ku umo, uamu hanene vipanga viendi kaha ua sikile mukua kuniunga ku mbelo atualeleho kuvingila.
35 Ngeci mukemuo, tualelenuho kuvingila muomu ka mu tantekeya ntsimbu yeza vavenya ndzivo. Ka mu tantekeya nga eza cinguezi, ni mukati ka vutsiki, ku vandemba ni cimenemene,
36 linga omo akeza muku tungumuna, kati aku mi uane mua kosa.
37 Vunoni evi vinji mileka, nji vileka ku vantu vose nguange: Tualelenuho kuvingila.”
Matota
^ Ni “mahundzi auana”
