Kuhitila Muli Mako 2:1-28
2 Mu nima ya amo matangua, Yesu ua kovelele naua mu Kapenama kaha muzimbu ua lisanduokele nguavo ali muimbo liendi.
2 Ngeci vantu vavengi va likunguluilileko mu cifua ca kulinga, nomu mua kuimanena muahi ambe vene mu cikolo. Kaha Yesu ua putukile ku vambuluila lizi.
3 Vamo vamala vauana, vambatele umo mukua kalepa naku mu nehelaye.
4 Vunoni omo lia kulana ca mbunga ka va hasele kumu tuala mpundu kuli Yesu, ngeci va zambuluile imo mbengua ha tsimba haze ha sungamene Yesu. Mu nima yaco, va sikuluisile cipoya* ci va hakele uze yala mukua kalepa.
5 Yesu mua muene lutsilielo luavo, ua lekele uze mukua kalepa nguendi: “Muanange, va naku konekela vipi viove.”
6 Kaha vamo vakua kusoneka va tumamene kuze, vakele na kuhandeka mu mitima yavo nguavo:
7 “Vika a handekela ngeci ou yala? Ali na kusahula Njambi? Iya a hasa ku konekela vupi, kati Njambi lika?”
8 Vunoni haze vene, Yesu ua nongonuene mu mutima uendi vi vakele naku singanieka hakati kavo, ngeci uava lekele nguendi: “Vika muli naku singaniekela viuma via cifua eci?
9 Nkuma vika via viasi, kuleka ou mukua kalepa nguange, ‘Va naku konekela vipi viove’ ni ‘Katuka ambata cipoya cove linga uende’?
10 Vunoni linga mu tantekeye nguenu Muana muntu ali na mpoko ya ku konekela vipi ha mavu—” kaha ua lekele uze mukua kalepa nguendi:
11 “Nji kuleka nguange, Katuka, ambata cipoya cove ya ku ndzivo yove.”
12 Haze vene, uze yala ua katukile, uambatele cipoya cendi na kutuhuka oku vantu vose va na mutala. Ngeci vose va likomokelele muakama naku zumbangeya Njambi nguavo: “Viuma via cifua eci kanda tu vimone.”
13 Yesu uaile naua ku cisali kaha mbunga yose yezile kuli ikeye, ngeci ua putukile ku va longesa.
14 Muakele na kuhita, ua muene Levi muana Alefeu, na tumama ku seketa ya kufuetela lisimu, ngeci uamu lekele nguendi: “Tuaya ua kupue ndongesi yange.”* Ngeci ua katukile naku mu kava.
15 Mu nima ya ntsimbu, muakele na kulia ku ndzivo ya Levi, vakua kutambula lisimu vavengi na vakua vupi, vakele na kulia hamo na Yesu na vandongesi vendi, muomu cingi cavo vakele naku mu kava.
16 Vunoni vakua kusoneka va vaFaliseu, mu vamuene nguavo ali na kulia na vakua vupi na vakua kutambula lisimu, vehuile vandongesi vendi nguavo: “Nkuma ue kulia hamo na vakua kutambula lisimu na vakua vupi?”
17 Yesu mua vuile ngoco, uava lekele nguendi: “Vakangule ka ve kutonda mukua kusaka, vunoni vaze va vavala. Yange ka njezile mu kutonda vakua vuviuke, vunoni vakua vupi.”
18 Vandongesi va Yoano na vandongesi va vaFaliseu, vakele naku livindika kulia ngeci vezile kuli Yesu naku muihula nguavo: “Omo lia vika vandongesi va Yoano na vandongesi va vaFaliseu ve ku livindika kulia, vunoni vandongesi vove ka ve kulingamo?”
19 Ngeci Yesu uava kumbuluile nguendi: “Nkuma vavusamba va sandungi, citava va livindike kulia oku sandungi acili navo ni? Ntsimbu sandungi acili navo ka citondeka va livindike kulia.
20 Vunoni ika heta ntsimbu omo vaka va tambula sandungi, hakeho honi ha vaka livindikila kulia.
21 Na umo uahi atongela citopeko* ca ntanga ya iha ha vuzalo vua laza, muomu nga alingamo, citopeko caco ci ka vu zamuna kaha vuka tavuka cikuma kuhiana na muze mua laza.
22 Na umo uahi ue kulongela vinyu via viha, mu vinjeke via laza via vilambu. Nga a lingamo, vinyu via viha vika tavula vinjeke kaha vinyu viaco vika pihila hamo na vinjeke. Vunoni vinyu via viha veku vi longela mu vinjeke via vihia via vilambu.”
23 Kaha omo Yesu uakele na kuhita mu lihia lia tiliku lia Sapalalo, vandongesi vendi vaputukile ku holomona mitue ya tiliku mu njila.
24 Ngeci vaFaliseu va muihuile nguavo: “Tala! Omo lia vika vandongesi vove vali na kulinga viuma viva vindika lia Sapalalo?”
25 Vunoni Yesu uava kumbuluile nguendi: “Nkuma kanda mu tandeho viuma via lingile Ndaviti, mua zenekele via kulia hamolika na vamala vakele nendi mu vavuile ndzala ni?
26 Ni ka mua tandele muzimbu ua Aviatale, mukuluntu ua vasasendote, omo Ndaviti ua kovelele mu ndzivo ya Njambi na kulia mbolo ya kulekesa, ize ka va pandele kulia ku muntu uose-ouo, vunoni sasendote lika kaha ua haneneko na vamala vaze vakele nendi ni?”
27 Kaha ua vuezeleko naua nguendi: “Sapalalo va ihakeleko omo lia muntu, keti muntu omo lia Sapalalo.
28 Ngeci mukemuo, Muana muntu ikeye Muangana ua Sapalalo.”
Matota
^ Muhela ua undende ua kuambatela muvezi.
^ Ni “pua mukua kunji kava.”
^ Ni “limendo; cikamba”
