Kuhitila Muli Mako 3:1-35
3 Kaha Yesu ua kovelele naua mu sinangonga, muakele umo yala ua livoko lia kusolia.
2 Kaha vakele naku mu talelela va mone nga akanguisa uze yala lia Sapalalo, linga vamu uaneneho mulonga.
3 Ngeci ua lekele uze yala ua livoko lia kusolia nguendi: “Katuka, tuaya hano hakati.”
4 Mu nima yaco ua vehuile nguendi: “Vika va tavesa kulinga lia Sapalalo? Via cili ni via vipi? Kuovola muono ni kutsiha?” Vunoni vakevo va holokele lika kulu.
5 Kaha omo ua talele vose na vutenu, uavuile vusiua vua kama omo lia kukaluua ca mitima yavo, ngeci ua lekele uze yala nguendi: “Olola livoko liove.” Uoluele, kaha livoko liendi lia kangukile.
6 Haze vene, vaFaliseu va tuhukile, vaka likunguluile hamolika na vakua cikota ca Helonde, naku simutuila via kutsiha Yesu.
7 Vunoni Yesu na vandongesi vendi va tundileko na kuya ku cisali, kaha mbunga ya kama ya tundile ku Ngalileya naku Yundeya ya mu kavele.
8 Naku Yelusalema naua, Indumeya, mu sinia lia Yondau naku mukulo ua Tile na Sindone, kua tundile mbunga ya kama yezile kuli ikeye, mu ya vuile viuma viavingi via lingile.
9 Yesu ua lekele vandongesi vendi vamu vuahesele vuato vua vundende, kutina ize mbunga imu sindakane.
10 Mu kulinga ua kanguisile vavengi, ngeci vose vaze vakele na misongo ya kama va litsikinine ku mukulo uendi linga va mu kuate.
11 Ambe vene vasipilitu va kuzuala mu vakele naku mu mona, vamu tsikamenene naku tambakana nguavo: “Ove u Muana Njambi.”
12 Vunoni vintsimbu viavingi, Yesu uava vindikile linga kati vamu tsimanese.
13 Yesu ua kandukile ku muncinda, ua sanene vose va atondele kaha vezile kuli ikeye.
14 Kaha ua hanguile civunga ca vantu 12, va lukile nguendi vapostolo, linga vapue na kuenda nendi, naku va tuma mu kuambulula,
15 naku va hana mpoko ya kutundisa vandemone.
16 Kaha civunga ca vantu 12 vaze va hanguile, vapuile: Simone, uze ya lukile naua nguendi Petulu,
17 Tiango muana Sembendeu, na Yoano muanaye ya Tiango (vakevo va lukile naua nguendi Mboanalezi, kulumbunuka “Vana va Kuzima”),*
18 Anduleu, Filipu, Mbatolomeu, Mateu, Tomasi, Tiango muana Alefeu, Tandeu, Simone Mukua Kanana,*
19 na Yundasa Iskaliota, uze ua muendele vungungu.
Kutundaho, Yesu ua kovelele mu imo ndzivo.
20 Kaha mbunga ya kungulukile naua kuze mu cifua ca kulinga, Yesu na vandongesi vendi ka va uanene ambe ntsimbu ya kulia.
21 Vunoni vavusoko vendi mu vavuile viuma viakele na kulingika, vaileko linga vaka mu kuate, muomu vakele na kuhandeka nguavo: “Na zaluka.”
22 Na vakua kusoneka naua vaze va tundile ku Yelusalema, vakele na kuhandeka nguavo: “Ali na Mbelesembulu,* kaha ue kutundisa vandemone na ngolo ya muangana ua vandemone.”
23 Mu nima ya ku va sana, Yesu ua handekele navo kuhitila mu visimo nguendi: “Vati Satana ahasa kutundisa naua Satana?
24 Nga vuangana vu litengulukila vuvene, ka vu kalako naua.
25 Cikuavo naua, nga ndzivo ilitengulukila ivene, ka ihasa kuimana.
26 Na vuno vene, nga Satana a litengulukila ivene naku liluisa, kahasa kukalako vunoni anonga.
27 Mua vusunga, kakuesi muntu akovela mu ndzivo ya umo yala mukua ndzili na kupunda vupite vuendi, nga ka livangele kumu kuta, kuvanga namu kutu amba ahase kupunda ndzivo yendi.
28 Nji mileka vusunga nguange, vupi vuose vu ve kulinga vantu, na kasahuntu kose ka ve kumuesa, vaka vi konekela.
29 Vunoni uose uze asahula sipilitu santu, ka vaka mu konekela na limo litangua liahi, aka kala na mulonga ua vupi ku miaka yose.”
30 Yesu uava lekele evi viuma muomu vakele na kuhandeka nguavo: “Ali na sipilitu ua kuzuala.”
31 Kaha vanaye na vamuanaye vezile vemanene ha mbandza, kaha va tumine muntu aka mu sane.
32 Kuakele mbunga ya yingi ya tumamene oku ya mu zengeleka, kaha vamu lekele nguavo: “Tala! Vanoko na vantsongo vove va nemana hambandza, vali naku kutonda.”
33 Vunoni uava kumbuluile nguendi: “Iya uapua nana? Na veya vapua vantsongo vange?
34 Kaha ua talele vose va tumamene oku va namu zengeleka nguendi: “Talenu, ava vakevo vanana na vantsongo vange!
35 Uose alinga cizango ca Njambi, ikeye ntsongo yange ua yala, ntsongo yange ua mpuevo na nana.”
Matota
^ Ni “Kuzima ca muhiato”
^ Ni “mukua ntuima”
^ Eli lizina ve ku lipangesa mu kutumbula Satana mu kupua mukua kusika ni muangana ua vandemone.
