Kuhitila Muli Mako 4:1-41
4 Yesu ua putukile naua kulongesa ku mukulo ua cisali kaha mbunga ya kama cikuma yezile kuli ikeye. Ngeci ua kovelele mu vuato na kutumama kaha ua sondolokele kavundende na vuato, vunoni mbunga yose ize yemanene ha ntunda ku mukulo ua cisali.
2 Kaha ua putukile ku va longesa viuma viavingi kuhitila mu visimo nguendi:
3 “Halakanenu! Umo mukua kukuva uaile mu kukuva vimbuto.
4 Muakele na kukuva, vimo vimbuto via uililile ku mukulo ua njila kaha kuezile tuzila va vilile.
5 Vikuavo, via uililile ha mavue haze ka hakele livu lia lingi, ngeci via sokele vuasi muomu livu liapuile lia lindende.
6 Vunoni mu kuezile mutana, via uemene na kuzuza* muomu ka via tandele mizi.
7 Vimbuto vikuavo via uililile hakati ka vimbimbo kaha mu via kolele vimbimbo, via vikuikile ngeci ka viemine vusuka.
8 Vunoni vikuavo via uililile ha livu lia vuilo kaha mu via tuikilile na kukola, vimo viemine ku tuvakana ha 30 vikuavo ha 60 kaha vikuavo co ha 100.”
9 Kaha Yesu ua vuezeleko nguendi: “Uose ali na matuitui, evueko.”
10 Kaha muakele lika liendi, vaze vamu zengelekele hamolika na Vapostolo 12, vaputukile ku muihula vulumbunuiso vua vize visimo.
11 Ngeci uava lekele nguendi: “Enu va mi hana mahungu a kulela a Vuangana vua Njambi, vunoni vaze vali hambandza viuma viose vili mu visimo.
12 Linga vutuhu va tala, va hone kumona, kaha vutuhu vevua, va hone kuivuisisa cipue kualuluka linga vava konekele.
13 Cikuavo naua, uava lekele nguendi: “Nkuma enu ka muevuisisile eci cisimo, amba vati muka hasa kuivuisisa visimo vikuavo?
14 “Mukua kukuva akuva lizi.
15 Mbuto ize ya uilile ku mukulo ua njila, yemanena vantu vevua lizi, vunoni Satana eza na kuniangula lizi liva na kuvile muli vakevo.
16 Mumolika naua, mbuto ize ya uilile ha mavue yemanena vantu vaze omo vevua lizi, haze vene va litambula na ndzolela.
17 Vunoni mu kulinga kavesi na mizi, va tualelaho lika mu kantsimbu ka kandende, kaha omo vahita mu visoti naku va luisa omo lia muzimbu uva nevu, va tanguka.
18 Kaha kuli vikuavo viva kuvile ha vimbimbo. Evi viemanena vaze vevua lizi,
19 vunoni visoti via ano mavu na kukokola ca vupite kaha na vizango via kukala na viuma vieka na vieka, vikovela mu mitima yavo naku kimbitisa uze muzimbu kaha kavemi vusuka.
20 Muku manusuila, vimbuto vize via uililile ha livu lia vuilo, viemanena vantu vaze va halakana lizi naku litava, ngeci vema vusuka vu tuvakana ha 30, 60 na 100.”
21 Uava lekele naua nguendi: “Vuno ve kusuameka ndeya naku ifuikilila mu civuvi ni muintsi lia muhela ni? Kati veku ihaka ha citumbiko ca vindeya?
22 Muomu kakuesi cuma ca kusueka cintsa ka vaka solola kaha naua, kakuesi cuma ca kuvanda cintsa ka cika zomboloka.
23 Uose ali na matuitui, evueko.”
24 Uava lekele naua nguendi: “Tualenu mana ku viuma vi muli na kuivua. Muomu seteko imu seteka nayo vakuenu ikeyo iva ka mi seteka nayo nenu, kaha vaka mi vuezelako mu kuhiana.
25 Muomu uose ali na vimo, vaka mu vuezelelako vikuavo, vunoni uze kesi navio, vaka mu tambula ambe vene vize viali navio.”
26 Kaha ua vuezeleko naua nguendi: “Vuangana vua Njambi vunapu ngue muntu akuva mbuto yendi.
27 Ku vutsiki akosa nga kunace* ahinduka kaha vize vimbuto vi tuikilila na kukola, vunoni ikeye ka tantekeya.
28 Livu lituhula vimbuto likelio livene, kamandende-kamandende, ha katete cisati, mu nima yaco mutue, kaha mu ku manusuila uze mutue ukala na vinona via kuhia.
29 Vunoni nga vimbuto vinahi ahitisako mpoko muomu ntsimbu ya kutia inapuho.”
30 Kaha ua handekele naua nguendi: “Vuangana vua Njambi tu vu setekesa na vika? Ni tu vulumbununa na cisimo cika?
31 Vunapu ngue mbuto ya musalata,* omo va ikuna yapua ya indende cikuma ku vimbuto viose via ha mavu.
32 Vunoni mu nima yaku ikuna, ye kusoka kaha ye kulaha ku tuvakana visoka viose na kukala na mintango ya kama. Ngeci tuzila ve kuiza na kukala mu cimbembe cauo.”
33 Uava longesele lizi lia Njambi na visimo ngeci muevi, kuliya na vuhasi vuavo vua kuivuisisa.
34 Cili vene ka handekele navo ca kuhona visimo, vunoni uakele naku lumbunuina vandongesi vendi viuma viose kua likaliavo.
35 Ha litangua lize ku cinguezi, Yesu ua lekele vandongesi vendi nguendi: “Tu zavukenu tuye mu sinia.”
36 Kaha mu nima ya kusalesa mbunga, vandongesi vendi vaile nendi mu vuato muze vene muakele. Kaha kuze, kuakele mato akuavo.
37 Kaha kua katukile luhundzi lua kama na mancimba aputukile ku kovela mu vuato, ngeci vuato vua tondele kuvombela.
38 Vunoni ikeye uakele ku ntonga ya vuato yaku nima ua kosele ha ntsakatelo. Ngeci vamu hinduile naku mu leka nguavo: “Mulongisi, kaua muene nguove tutsa?”
39 Ngeci ua hindukile naku tenukila luhundzi na kuleka cisali nguendi: “Holoka! Kulu!” Ngeci lua likelele kaha kua lembamene cikuma.
40 Ngeci uava lekele nguendi: “Vika mu vuila liova ngeci? Kasi vene ka muesi na lutsilielo?”
41 Vunoni vakevo vavuile liova lia kama kaha va lihandekesele umo na mukuavo nguavo: “Muntu ua kufua vati ou? Ua kulinga ambe luhundzi na cisali vi muononoka!”
Matota
^ Ni “kulepuka”
^ Mu ciNgelengu “ku mutana”
^ “Kambuto kakandende ka kala ku Palestina, ka hasa ku kola na kupua muti ua laha u heta ha 4 metros.”
