Kuhitila Muli Mako 5:1-43
5 Kaha vaile mu sinia lia cisali, ku cihela ca vaNgelasene.
2 Yesu mua sulukile ngeci mu vuato, umo yala uakele na sipilitu ua kuzuala ua tundile ha vihilo kaha uezile kuli ikeye.
3 Yala uaco ua yoyelele ha vihilo, kaha naku ntsimbu ize, naumo uahi ua hasele kumu kuta ambe vene na malienge.
4 Vintsimbu viavingi, vakele naku mu kuta malienge ku mikono naku mavoko, vunoni uakele na kuvatula aku mavoko, aku mikono co uakele naku apokoziola. Naumo uahi uakele na ndzili ya kumu hiana.
5 Kaha ntsimbu yose, vutsiki na mutana, uakele na kutambeka ku vihilo naku mincinda oku alipulanga na mavue.
6 Vunoni mua muene Yesu ha lahako, ua tuntile naku kamu tsikamena.
7 Kaha ua tambakanene nguendi: “Vika utonda kuli yange, ove Yesu Muana Njambi Mukua Kuhiana Viose? Lisinge ku meso a Njambi nguove ka unji yandesa.”
8 Muomu Yesu uamu lekele nguendi: “Ove sipilitu ua kuzuala, tunda muli ou yala.”
9 Vunoni Yesu ua muihuile nguendi: “Lizina liove yove iya?” Uamu kumbuluile nguendi: “Yange Mbunga, muomu tu vavengi.”
10 Kaha ua tualeleho ku lambelela Yesu linga kati atundise vaze vasipilitu va kuzuala mu cize cifuti.
11 Kaha kuakele vutanga vua kama vua vangulu ha muncinda vuakele na kulia.
12 Ngeci vaze vasipilitu va lambelele Yesu nguavo: “Tu tavese tu ka kovele mu vangulu.”
13 Ngeci Yesu uava tavesele. Kaha vaze vasipilitu va kuzuala va tuhukile naku ka kovela mu vangulu. Kaha vuze vutanga vua vangulu va heta ku 2.000, vua lupukilile ku mungenia-ngenia na kuuila mu cisali, kaha vua tsile.
14 Vunoni tuniungi va tinine naku kambulula ou muzimbu mu mbonge namu membo, kaha vantu vezile mu kumona viuma via lingikile.
15 Ngeci vezile kuli Yesu kaha va muene uze yala uakele na vandemone, uze vene uakele na Mbunga ya vandemone, na tumama, na zala kaha ali vuino, ngeci vavuile liova.
16 Cikuavo naua, vaze va limuenene viuma viose evi, va lekeleko vakuavo vika via lingikile kuli uze yala uakele na vandemone naku vangulu.
17 Ngeci va putukile ku lambelela Yesu atunde mu muhato* uavo.
18 Yesu mua kovelele mu vuato, uze yala ya tundisile vandemone uamu lambelele linga aye nendi.
19 Vunoni Yesu kamu tavele. Uamu lekele nguendi: “Ya kuimbo ku vavusoko vove, uka vambuluile viuma viose via na kulingila Yehova* na nkeke ya na kumuesa.”
20 Ngeci uze yala uaile kaha ua putukile kuambuluila mu Ndekapoli* yose viuma viose via mu lingilile Yesu, ngeci vantu vose va likomokelele.
21 Kaha Yesu mua zavukile naua mu sinia na vuato, mbunga ya kama ya likunguluile kuli ikeye, kaha uakele ku mukulo ua cisali.
22 Kaha kuezile umo ua vantuamena va sinangonga, lizina liendi Njailu. Mua muene Yesu, ua tsikamene ku viliato viendi.
23 Kaha ua tualeleho kumu lambelela nguendi: “Kana kange ka mpuevo kali na kuvavala cikuma,* sukulukambu, tuaya ua kumu saleke mavoko linga akanguke na kuyoya.”
24 Ngeci Yesu uaile nendi, kaha mbunga ya kama yakele naku mu kava oku vamu sindakana.
25 Kuakele umo mpuevo uakele na musongo ua kuhita maninga mu miaka 12.
26 Ua yandele mua kama mu mavoko a vakua kusaka vavengi, kaha ua sanduele vupite vuendi vuose, vunoni mu cihela ca kukanguka, musongo uendi ua livuezelele mua kama.
27 Vunoni omo uavuile viuma viva handekele kutuala hali Yesu, ua kovelele ha mbunga na kukala mu nima ya Yesu kaha ua kuatele kuntsongo ya vuzalo vuendi.
28 Muomu uakele naku singanieka nguendi: “Ambe nga nji kuata lika ku vuzalo vuendi, nji kanguka.”
29 Haze vene, maninga a likelele kuhita, kaha uavuile mu muvila uendi nguendi na kanguka ku musongo uendi ua kuvihia.
30 Haze vene, Yesu ua nongonuene nguendi ngolo ya mu tundu, ngeci ua tengulukile na kuihula mbunga nguendi: “Iya na kuata ku vuzalo vuange?”
31 Vunoni vandongesi vendi vamu kumbuluile nguavo: “Una mono mbunga yayingi ili naku ku sindakana, kaha uihula nguove ‘Iya nanji kuata?’”
32 Vunoni ua tualeleleho kutala-tala linga amone iya uamu kuatele.
33 Uze mpuevo uavuile liova lia kama naku lizazela, muomu ua tantekeyele viuma via mu solokelele. Ngeci ua uile ku meso a Yesu naku muleka vusunga vuose.
34 Yesu uamu lekele nguendi: “Muanange, lutsilielo luove lu na kukanguisa. Ya mu ciyulo, kaha kanguka ku musongo uove ua kuvihia.”
35 Ntsimbu Yesu ua ci kele na kuhandeka, kuezile vamo vamala va ku ndzivo ya uze ntuamena ua sinangonga, vamu lekele nguavo: “Muanove natsi, vika naua upakesela Mulongisi?”
36 Vunoni Yesu muavuile viva handekele vaze vamala, ua lekele uze ntuamena ua sinangonga nguendi: “Kati uivue liova, tsiliela lika.”
37 Kaha ka tavesele muntu uose-ouo kumu kava, kuvanga lika Petulu, Tiango, na Yoano muanaye ya Tiango.
38 Mu va hetele ku ndzivo ya uze ntuamena ua sinangonga, va uanene muyoyo ua kama ua vantu vakele na kulinyenga na kulila cikuma.
39 Mua kovelele mu ndzivo, uava lekele nguendi: “Vika mu lingila ngeci muyoyo, na kulila? Ou muana ka tsile, na kosa lika.”
40 Mu vavuile ngoco, va putukile kuzola naku mu sembulula. Vunoni mu nima ya kutuhuisa vose ha mbandza, ua lekele ise na naye ya muana, hamolika na vaze vakele nendi, kaha va kovelele muze muakele kanike.
41 Ngeci ua kuatele ku livoko lia uze kanike naku mu leka nguendi: “Talita kumi,” ku lumbunuka: “Muanampuevo, nji kuleka nguange, ‘Hinduka!’”
42 Haze vene, uze muanampuevo ua hindukile na kuputuka kuenda. (Uakele na miaka 12). Ngeci va viukilile mua kama.
43 Vunoni uava vindikile* ku hilukila naku hilukila, linga kati va lekeko muntu naumo uahi. Uava lekele naua va hane muanampuevo viakulia.
Matota
^ Ni “muimbo liavo.”
^ Talenu Mizimbu ya ku Vuezako
^ Ni “vakua vimbonge 10”
^ Ni “alingila kutsa”
^ Ni “uava cinkikile”
