Ku Hitila Muli Mateu 1:1-25
1 Lino likelio livulu lia muzimbu* ua Yesu Kilistu, muana Ndaviti, muana Avilahama:
2 Avilahama ua semene Isake;Isake ua semene Yakomba;Yakomba ua semene Yunda na vana vendi vakuavo;
3 Yunda ua semene Falesi na Zala kuli Tamale;Falesi ua semene Hezeloni;Hezeloni ua semene Alame;
4 Alame ua semene Aminandave;Aminandave ua semene Nasone;Nasone ua semene Salemone;
5 Salemone ua semene Mboaze;Mboaze ua semene Ovende kuli Lute;Ovende ua semene Njesi;
6 Njesi ua semene muangana Ndaviti;
Ndaviti ua semene Solomone kuli uze ua puile mpuevo ya Uliya;
7 Solomone ua semene Lehovoame;Lehovoame ua semene Aviya;Aviya ua semene Asa;
8 Asa ua semene Yosafate;Yosafate ua semene Yolame;Yolame ua semene Uziya;
9 Uziya ua semene Yotame;Yotame ua semene Ahaze;Ahaze ua semene Hezekiya;
10 Hezekiya ua semene Manase;Manase ua semene Amone;Amone ua semene Yosiya;
11 Yosiya ua semene Yekoniya na vana vendi vakuavo, mu ntsimbu iva tualele vaYundeya ku Mbambilone.
12 Mu nima ya ku va tuala ku Mbambilone, Yekoniya ua semene Salateli;Salateli ua semene Zolombambele;
13 Zolombambele ua semene Aviunde;Aviunde ua semene Eliakimi;Eliakimi ua semene Azolo;
14 Azolo ua semene Sandoke;Sandoke ua semene Akimi;Akimi ua semene Eliundu;
15 Eliundu ua semene Eliazale;Eliazale ua semene Matane;Matane ua semene Yakomba;
16 Yakomba ua semene Yosefe yala lia Maliya, Maliya uze ua semene Yesu u va luka nguavo Kilistu.
17 Visemua viose ku tunda hali Avilahama ku heta hali Ndaviti via puile 14 kaha ku tunda hali Ndaviti na ha ntsimbu iva tualele vaYundeya ku Mbambilone, via puile visemua 14; ku tunda ha ntsimbu iva va tualele ku Mbambilone ku heta na hali Kilistu mua hitile visemua 14.
18 Ku semuka ca Yesu Kilistu ca puile ngecize: Ha ntsimbu ize, Maliya naye ya Yesu tele va na mu handekeya kuli Yosefe, vunoni ntsimbu kanda va liambate, Maliya uemitile ku hitila mu sipilitu santu.
19 Vunoni mu ku linga yaliendi Yosefe, ua puile mukua vuviuke ka yonguele ku mu sauisa ku mbunga, ngeci ua tondele ku mu kondola mu vusueke.
20 Mu nima ya Yosefe ku hilula ha viuma evi, talenu! Kangelo ua Yehova* ua mu solokelele mu cilota na ku mu leka nguendi: “Yosefe muana Ndaviti, kati uivue liova lia kuambata mpueyove Maliya, muomu nemita ku hitila mu sipilitu santu.
21 Aka sema muana ua yala kaha uka mu luka Yesu,* muomu akovola vantu vendi ku vipi viavo.”
22 Viuma evi viose, via solokele linga vu lipuisemo vupolofeto vua handekele Yehova ku hitila muli kapolofeto uendi nguendi:
23 “Talenu! Umo muana mpuevo kanda a limona na yala, a kemita na ku sema muana ua yala kaha va ka mu luka Emanuele,” lizina lia lomboloka, “Njambi Ali Netu.”
24 Ngeci Yosefe mua nyangumukile ha tulo, ua lingile viose via mu lekele kangelo ua Yehova. Uambatele mpueyendi Maliya na ku mu tuala ku ndzivo yendi.
25 Vunoni ka limuene nendi, noho ha sulumuinine muana ua yala kaha Yosefe ua mu lukile Yesu.
Matota
^ Ni “Cikota.”
^ Mu Visoneka via Vakua Kilistu via ciNgelengu, lizina lia Yehova va litumbulamo lua kupua 237, kaha hano hakeho ha lia soloka lua katete.—Talenu Mizimbu ya ku Vuezako.
^ Eli lizina lia litombola na lizina lia ciHevelu Yesua ni Yehosua, lia lomboloka Yehova Ikeye Muovole.
