Ku Hitila Muli Mateu 10:1-42
10 Yesu ua sanene vandongesi vendi 12 na ku va hana mpoko ya ku tundisa vandemone, na ku kanguisa misongo yose na mavezi ose.
2 Aa akeo mazina a vapostolo va Yesu va kupua 12. Ua ku livanga, Simone uze u va luka naua Petulu na muanaye Anduleu, Tiango muana Sembendeu na muanaye Yoano;
3 Filipu na Mbatolomeu, Tomasi na Mateu mukua ku tambula lisimu, Tiango muana Alefeu, Tandeu,
4 Simone ua ku Kanana* na Yundasa Iskaliota, uze uendele Yesu vungungu.
5 Yesu ua tumine vandongesi vendi 12 na ku va mamuna nguendi: “Kati muye mu njila ya vakua vifuti kaha kati mu ka kovele mu vimbonge via vakua Samaliya.
6 Vunoni, yenu lika na ku tonda vampanga va na zimbala va ku ndzivo ya Isaleli.
7 Omo muya na kuambulula, handekenu nguenu: ‘Vuangana vua muilu vuli muhiehi.’
8 Kanguisenu vavezi, sangulenu vatsi, lelesenu vakua mbumba kaha tundisenu vandemone. Vino viuma, Njambi na mi hanavio vuana nenu vilingenu vuana.
9 Kati muambate olu, palata ni nkengelesi, ha miva* yenu,
10 cipue ngonga* ya viakulia via mu vungendzi, cipue vuzalo vukuavo, cipue vinkaku, cipue mpango. Muomu mukua ku panga va pande ku mu hana viakulia viendi.
11 “Mu mbonge yose-oyo i mu kovela ni mu limo limbo, tondenu umo ali na cizango ca ku mi halakana kaha kalenumo noho ha mu tundilamo.
12 Nga mu kovela mu imo ndzivo, menekenu vaveniayo.
13 Nga vavenia ndzivo va muesa cizango, ciyulo cenu ci kale navo. Vunoni nga ka va muesa cizango, hilukenu na ciyulo cenu.
14 Uose ka mi tambula ni ku mi halakana, omo mu tunda mu ndzivo yaco ni mu mbonge, totomonenu ku viliato vienu.
15 Nji mi leka vusunga nguange ha Litangua lia ku Sompesa, ize mbonge ika tambula cihiso ca kama ku hiana ca Sondoma na Ngomola.
16 “Njili na ku mi tuma ngue vampanga ha kati ka tungunga. Ngeci mukemuo, puenu va ku zangama ngue manoka kaha puenu vakua ciyulo ngue mavembe.
17 Zangamenu na vantu muomu va ka mi tuala mu vindzango na ku miveta makote mu visinangonga viavo.
18 Kaha va ka mi tuala ku meso a vanguvulu na vamiangana omo liange, linga vu kapue vukaleho kuli vakevo na kuli vakua vifuti.
19 Vunoni, mu vaka mi sompesa kati mu lisosomue na vika mu ka handeka ni vati mu ka vi handeka. Muomu ha ntsimbu ize vene vaka mi leka via ku handeka.
20 Muomu kati yenu lika mu ka handeka; vunoni sipilitu ya Isuenu ika mi kuasa ku handeka.
21 Cikuavo naua, muntu aka tsihisa muanaye kaha cisemi ua yala aka tsihisa munendi, vana vaka alulukila visemi vavo na kuva tsihisa.
22 Kaha vantu vose vaka mi zinda omo lia lizina liange. Vunoni, uose a kolesa na ku ntsongo ikeye a kovoka.
23 Nga va mi yandesa mu imo mbonge, tininenu ku mbonge ikuavo. Nji mi leka vusunga nguange, Muana muntu aku mi uana ntsimbu kanda mu manusule ku lizenga mu vimbonge viose via mu Isaleli.
24 “Ndongesi ka tuvakana mulongisi uendi na ngamba ka tuvakana sukuluendi.
25 Ndongesi a hasa kupua ngue mulongisi uendi na ngamba a hasa kupua ngue sukuluendi. Nga vantu va tumbula ivene ndzivo nguavo Mbelesembulu,* amba vakua ndzivo yendi co?
26 Ngeci mukemuo, kati mu va vuile liova. Muomu kakuesi cuma ca ku fuika cintsa ka vaka fukula kaha naua kakuesi cuma ca ku suekesa cintsa ka vaka tantekeya vantu.
27 Vize vinji mi leka mu milima, vi handekenu mutania muelu kaha vize vinji mi yevetela viambuluilenu ku mbunga.*
28 Kati mu vuile liova vaze va tsiha muvila vunoni ka va hasa ku tsiha muono. Vunoni, zuzukilenu uze a hasa ku nongesa muono na muvila mu Ngehena.*
29 Kati ve ku landesa tundzilili vavali na ndando ya indende cikuma ni? Vunoni na umo uahi ue ku uila ha mavu kaha Isuenu ua muilu ka tantekeya.
30 Vunoni, ambe vinkambu via ku mitue yenu viose va vi tanda laza.
31 Ngeci mukemuo, kati muivue liova, yenu mua kala na seho ku tuvakana tundzilili vavengi.
32 “Uose anji tava ku meso a vantu, nange nji ka mu tava ku meso a Tata uze ali muilu.
33 Vunoni uose anji viana ku meso a vantu, nange nji ka mu viana ku meso a Tata uze ali muilu.
34 Kati mu singanieke nguenu nji na neha ciyulo ha mavu. Ka nja nehele ciyulo, vunoni nji na neha mukuale.
35 Nji neza mu ku neha matepeso mu masoko. Ha kati ka muana ua yala na ise, muana ua mpuevo na naye, mpuevo na nayemueno.
36 Vavusoko va muntu, vakevo va kapua vitozi vendi.
37 Uose a lema cikuma ise ni naye ku tuvakana yange, ka pandele kupua ndongesi yange. Kaha naua uose a lema cikuma muanendi ua mpuevo ni ua yala ku hiana yange, ka pandele kupua ndongesi yange.
38 Kaha uose a viana kuambata citi cendi ca kayando* na ku nji kava, ka pandele kupua ndongesi yange.
39 Uose a nyungiliya muono uendi aka u zimbalesa. Vunoni uose a zimbalesa muono uendi omo liange aka u uana.
40 “Uose a mi tambula, nange nanji tambula kaha uose anji tambula, na tambula uze ua nji tumine.
41 Uose a tambula kapolofeto omo lia vupolofeto, nendi va ka mu fueta ngue kapolofeto. Kaha uose a tambula mukua vuviuke omo lia vuviuke, nendi va ka mu fueta ngue mukua vuviuke.
42 Uose a hana ambe ngandza imo ya mema aku tontola kuli umo uava vavandende, omo lia kupua ndongesi yange, mua vusunga nji mi leka nguange aka tambula fueto yendi.”
Matota
^ Ni “mukua ntuima.”
^ “Miva yaco ya kele na vimboloso.”
^ Ni “cipete, sulau.”
^ “Eli lizina ve ku lipangesa mu ku tumbula Satana mu kupua mukua ku sika ni muangana ua vandemone.”
^ Mu ciNgelengu “helu lia vinjivo.”
^ Talenu Mezi ava Lombolola.
^ Talenu Mezi ava Lombolola.
