Ku Hitila Muli Mateu 12:1-50
-
Yesu “Ikeye Ivene Sapalalo” (1-8)
-
Yala ua livoko lia kusolia va mu kanguisa (9-14)
-
Ngamba ya lema Njambi (15-21)
-
Vandemone va va tundisa na sipilitu santu (22-30)
-
Vupi ka ve ku konekela (31, 32)
-
Muti va u tantekeyela ku vusuka vuauo (33-37)
-
Citantekeyeso ca Yona (38-42)
-
Nga sipilitu ua ku zuala a hiluka (43-45)
-
Naye ya Yesu na vantsongo va Yesu (46-50)
12 Ha ntsimbu ize, Yesu ua hitile mu lihia lia tiliku lia Sapalalo. Vandongesi vendi va vuile njala, ngeci va putukile ku holomona mitue ya tiliku na kulia.
2 VaFaliseu mu va vamuene, va handekele na Yesu nguavo: “Tala! Vandongesi vove vali na kulinga viuma vi va vindika lia Sapalalo.”
3 Ngeci Yesu ua va kumbuluile nguendi: “Nkuma ka muatandele viuma via lingile Ndaviti, hamo lika na vamala vakele nendi muva tsile njala ni?
4 Ua kovelele mu ndzivo ya Njambi na kulia mbolo ya ku lekesa kuli Njambi, ize tele ka pandele kulia ni vamala vakele nendi, vunoni vasasendote lika.
5 Ni ka muatandele mu Lisiko ngecize, vasasendote ve ku pokola Lisiko lia Sapalalo mu tembele, vunoni ka ve kukala na mulonga ni?
6 Vunoni nji mileka nguange, uze ua hiana tembele hali hano.
7 Nga muevuisisile via lomboloka aa mezi, ava handekele nguavo, ‘Nji tonda cikeketima, kati vikombelo,’ nga ka mua payele ava vantu kavesi na mulonga.
8 Muomu Muana muntu ikeye ivene Sapalalo.”
9 Yesu mua tundile kuze, ua kovelele mu sinangonga yavo,
10 kaha ua uanene umo yala ua livoko lia kusolia. Linga va mu uanene mulonga, vaFaliseu va muihuile nguavo: “Nkuma citava ku kanguisa muntu lia Sapalalo ni?”
11 Yesu ua va kumbuluile nguendi: “Iya ha kati kenu nga ali na umo mpanga, kaha mpanga uaco a uila mu cina lia Sapalalo, vunoni ka ka mu tundisamo?
12 Muntu ua kala na seho ya kama kutuvakana mpanga, ngeci mukemuo, citava ku linga via cili lia Sapalalo.”
13 Kaha ua lekele uze mukuendze nguendi: “Olola livoko liove.” Uoluele kaha livoko liendi lia kangukile ngeci mua likuavo.
14 Vunoni, vaFaliseu va tuhukilemo na ku ka liyongola via ku tsiha Yesu.
15 Yesu mua tantekeyele vutumbe vuaco, ua tundileko. Kaha vantu vavengi va mu kavele, ngeci ua kanguisile vose vakele na ku vavala.
16 Vunoni ua va vindikile linga kati va mu tsimanese.
17 Linga a lipuisemo mezi a handekele kapolofeto Isaya nguendi:
18 “Talenu! Ngamba yange i Nja hangula i Nja lema, kaha ue kunji vuisa ndzolela, nji ka haka sipilitu yange hali ikeye kaha aka solola kuli vakua vifuti vati mpundu vuafua vuoloke.
19 Ka kalihoyo na vantu ni kulila ku vuolongonga, kaha na umo uahi a kevua lizi liendi mu vitapalo.
20 Ka kasanyona lihongo lia ku pokoka ni ku zima mukole ua ndeya u tsima vuisi, kuvanga noho aka neha vuoloke mu vutuntu.
21 Mua vusunga, vakua mavu vose va ka kulahela mu lizina liendi.”
22 Kaha vantu va nehelele Yesu umo yala ua kele na ndemone, ua puile kapuputa kaha naua kaveveve. Yesu ua mu kanguisile ngeci uze yala ua putukile ku handeka na ku mona.
23 Mbunga ya likomokelele cikuma na ku handeka nguavo: “Ou yala kati ikeye muana Ndaviti?”
24 Vunoni vaFaliseu mu va vuile ngoco, va handekele nguavo: “Ou yala kesi na ku tundisa vandemone ku ndzili yendi, vunoni na ngolo ya Mbelesembulu* muangana ua vandemone.”
25 Mu kulinga Yesu ua tantekeyele visinganyeka viavo, ua handekele nguendi: “Nga vuangana vu litengulukila vuvene, vue ku nonga, ambe nga vakua mbonge ni ndzivo imolika va litengulukila, ve ku lisanduoka.
26 Na vuno vene, nga Satana a tundisa Satana kaha ali na ku litengulukila ivene, amba vati vuangana vuendi vuka kanyama?
27 Nga yange njili na ku tundisa vandemone na ngolo ya Mbelesembulu, amba vana venuco, vali na ku va tundisa na ngolo yeya? Vikevio vi va ka mi sompesela vana venu.*
28 Vunoni nga njili na ku tundisa vandemone na sipilitu ya Njambi, kaha Vuangana vua Njambi vua mi uana mu ku tungumuna.
29 Nga muntu a kovela mu ndzivo ya umo yala mukua ndzili, vuno citava amu punde vupite vuendi ca ku hona kulivanga ku mu kuta ni? Kuvanga na mu kutu amba a hase ku punda.
30 Uose kesi ku mutamba uange napu citozi cange, kaha uose ka kunguluila hamo nange ali na ku sanduola.
31 Vunoni nji mileka nguange, vupi vuose vua linga muntu na kasahuntu ka muesa, vaka vi konekela. Vunoni uose a sahula sipilitu santu, ka vaka mu konekela.
32 Ca ku muenako, uose a handeka mua kuvihia Muana muntu, vaka muecela, vunoni uze a handeka mua kuvihia sipilitu santu, ka vaka muecela, cipue mu ntsimbu ino ni kulutue.
33 “Nga mutombeka muti ua cili, na vusuka vuauo vukapua vua cili, vunoni nga mutombeka muti ua kuvihia, na vusuka vuauo vukapua vua kuvihia, muomu muti veku u tantekeyela ku vusuka vuauo.
34 Enu vana va mambuambua, vati mu hasa ku handeka viuma via cili, okuni mu vakua vupi? Muomu kanua ke ku handeka vize vi na sulu ku mutima.
35 Muntu ua cili, ue ku tuhuisa viuma via cili ku vupite vuendi, vunoni mukua vupi ue ku handeka viuma via kuvihia muomu mu mutima uendi mua sula via kuvihia.
36 Nji mileka vusunga nguange, ha Litangua lia ku Sompesa, vantu vaka va sompesa omo lia vilinga viavo via ngoco;
37 muomu mezi enu aka hasa ku mi sambuesa ni ku mihisa.”
38 Kaha vakua kusoneka hamo lika na vaFaliseu va mu kumbuluile nguavo: “Mulongisi, tu lekeseko cimo citantekeyeso cove.”
39 Yesu ua va kumbuluile nguendi: “Enu muyati ua kuvihia na vingungu, kasi mu tualelelaho kutonda citantekeyeso, vunoni nji mileka nguange, ka mumono citantekeyeso na cimo cahi, kuvanga cize vene ca kapolofeto Yona.
40 Muomu ngeci mua Yona ua kele matangua atatu, vutsiki na mutana muzimo lia intsi ua kama, na Muana muntu nendi, aka kala matangua atatu, vutsiki na mutana kuitsi lia mavu.
41 Ha Litangua lia ku Sompesa, vakua Ninive va ka sangukila hamolika na uno muyati, vunoni vaka u hisa muomu vakevo valulukile omo Yona ua vambuluilile. Vunoni talenu! Uze ua kama ku hiana Yona uno ali hano.
42 Lisano ua ku mavanda* aka sangukila hamolika na uno muyati, vunoni aka u hisa, muomu ikeye ua tundile kuze kualenga mavu na kuiza kua ku halakana ku mana a Solomone, vunoni talenu! Uze ua hiana Solomone ku vukama uno ali hano.
43 “Sipilitu ua ku zuala mue ku tunda mu muntu, ue kuya na kuendangana ku vihela kakuesi mema mu ku tonda kua ku tulila, vunoni ke ku uanako.
44 Kaha a handeka nguendi: ‘Nji hiluka ku ndzivo yange ku nja tundile,’ vunoni omo aka hetako, aka uana uahi ua kalamo, vunoni mua ku komba kaha va na viukisamo vuino.
45 Kaha uze sipilitu aya, na ku kambata vakuavo 7 va ku zuala cikuma ku hiana ikeye, kaha vakovela na ku tungamo, kaha muono uou muntu u pihilila cikuma ku hiana na ku vuputukilo, vikevio evi vika solokela na uno muyati ua kuvihia.”
46 Ntsimbu Yesu tele acili na ku handeka na mbunga, vanaye na vamuanaye vemanene ha mbandza muomu va tondele ku handeka nendi.
47 Kuezile umo na ku mu leka nguendi: “Tala! Vanoko na vantsongo vove va nemana ha mbandza, va tonda ku handeka nove.”
48 Yesu ua mu kumbuluile nguendi: “Iya uapua nana? Na veya vapua vantsongo vange?”
49 Uoluele livoko na kuinika vandongesi vendi nguendi: “Tala! Ava vakevo vanana na vantsongo vange.
50 Muomu uose alinga cizango ca Tata ali muilu, ikeye ntsongo yange ua yala, ntsongo yange ua mpuevo na nana.”
Matota
^ Eli lizina ve ku lipangesa mu ku tumbula Satana, uze uapua mukua ku sika ni muangana ua vandemone.
^ Ni “vandongesi venu.”
^ Ni “sulu.”
