Ku Hitila Muli Mateu 13:1-58
-
VISIMO VIA VUANGANA (1-52)
-
Mukua kukuva (1-9)
-
Omo lia vika Yesu ua pangesele visimo (10-17)
-
Vi ca lumbunuka cisimo ca mukua kukuva (18-23)
-
Tiliku na muila (24-30)
-
Mbuto ya musalata na cimbaluila (31-33)
-
Ku pangesa visimo ci puisamo vupolofeto (34, 35)
-
Vi ca lumbunuka cisimo ca tiliku na muila (36-43)
-
Vupite vua ku sueka na livue lia seho (44-46)
-
Vuanda vua kama (47-50)
-
Vupite vua vuha novu vua laza (51, 52)
-
-
Yesu va mu viana muimbo liendi (53-58)
13 Ha litangua lize, Yesu ua tuhukile mu ndzivo na kutumama ku mukulo ua cisali.
2 Kaha talenu! Mbunga ya kama cikuma yezile kuli ikeye. Ngeci ikeye ua kovelele mu vuato na ku tumama kaha mbunga yose ize yemanene ha ntunda.
3 Kaha ua va lekele viuma via vingi ku hitila mu visimo nguendi: “Halakanenu! Umo mukua kukuva ua ile mu ku kuva vimbuto.
4 Mua kele na kukuva, vimo vimbuto via uililile ku mukulo ua njila kaha kuezile tuzila va vilile.
5 Vikuavo, via uililile ha mavue haze ka ha kele livu lia lingi, ngeci via sokele vuasi muomu livu lia puile lia lindende.
6 Vunoni mu kuezile mutana, via uemene na ku zuza muomu ka via tandele mizi.
7 Vikuavo via uililile hakati ka vimbimbo kaha mu via kolele vimbimbo, vimbuto viaco via tsile.
8 Vunoni kua kele vikuavo via uililile ha livu lia vuilo, ngeci via putukile kuima vusuka, vimo viemine ku tuvakana ha 100 vikuavo ha 60 vikuavoco ha 30.
9 Uose ali na matuitui evueko.”
10 Kaha vandongesi vendi vezile kuli ikeye na ku muihula nguavo: “Omo lia vika uli na ku handeka navo kuhitila mu visimo?”
11 Ngeci Yesu ua va kumbuluile nguendi: “Enu va mi hana vuhasi vua kuivuisisa mahungu aku lela a Vuangana vua muilu, vunoni vakevo kuahi.
12 Muomu uose ali na vimo, vaka mu vuezelelako vikuavo kaha a kala na viavingi. Vunoni uze kesi navio, vaka mu tambula ambe vene vize viali navio.
13 Ngeci mukemuo, njili na ku handeka navo kuhitila mu visimo. Muomu vali na meso vunoni kavesi na ku mona, vali na matuitui vunoni kavesi na kuivua cipue kuivuisisa.
14 Vupolofeto vua Isaya vuli na ku lipuisamo kuli vakevo, vua handeka nguavuo: ‘Kuivua mu kevua vunoni ka mu kevuisisa, ku talani mu ka tala vunoni ka mu ka mono.
15 Muomu mitima yava vantu i na kaluua. Kuivua vali na kuivua, ku mona vali na ku mona, vunoni vali na vusitui vua kuivuisisa vivali na ku mona ni kuivua, linga mitima yavo yaluluke nji hase ku va kanguisa.’
16 “Vunoni yenu mua vezika. Muomu meso enu ali na ku mona na matuitui enu ali na kuivua.
17 Nji mi leka vusunga nguange, vapolofeto na vakua vuviuke vavengi va kele na cizango ca kama ca ku limuena viuma vimuli na ku mona, vunoni kava vi muene. Va yonguele naua mua kama kuivua vimuli na kuivua, vunoni kava vivuile.
18 “Halakanenu honi vi ca lomboloka cisimo ca mukua ku kuva.
19 Mbuto ize ya uililile ku mukulo ua njila, inapu ngue muntu evua muzimbu ua Vuangana vunoni ka uivuisisa. Kaha mukua vupi eza na ku nyangula muzimbu uva kuvile mu mutima uendi.
20 Kaha mbuto ize iva kuvile ha mavue, inapu ngue muntu evua muzimbu kaha haze vene a utambula na ndzolela.
21 Vunoni mu kulinga kesi na mizi ya kukola, a tualelelaho lika mu kantsimbu kakandende. Kaha omo a hita mu visoti ni ku mu luisa omo lia muzimbu ua nevu, haze vene a tanguka.
22 Mbuto iva kunine ha vimbimbo, inapu ngue muntu evua muzimbu vunoni omo lia visoti via ano mavu na ku kokola ca vupite, vi kimbitisa uze muzimbu kaha kemi vusuka.
23 Vunoni mbuto iva kuvile ha livu lia vuilo, inapu ngue muntu evua muzimbu ua Vuangana na ku uivuisisa. Ngeci ema vusuka, vumo vu tuvakana 100, vukuavo 60 kaha vukuavoco 30.”
24 Kaha ua tele naua cisimo cikuavo nguendi: “Vuangana vua muilu, vunapu ngue umo yala ua kuvile mbuto ya cili mu lihia liendi.
25 Vunoni ntsimbu vantu va na kosa, citozi cendi uezile na kukuva muila mu tiliku kaha ua ile.
26 Omo tiliku ya putukile ku kola na kuima, muila nauo ua kolele.
27 Ngeci vangamba vaile kuli vavenya lihia na ku muihula nguavo: ‘Kati ua kuvile mbuto ya cili mu lihia liove? Amba ou muila ua tundu kuli?’
28 Ua kumbuluile nguendi: ‘Umo citozi ikeye na vilingi. Kaha vangamba va muihuile nguavo, u tonda linga tu ka tukule muila uaco ni?’
29 Ngeci vavenia lihia ua va kumbuluile nguendi: ‘Houe! Muomu nga mu lingamo, mu ka tukuila kumo na tiliku.
30 Viecelenu vikolele hamo noho ha ika hetela ntsimbu ya kutia. Kaha mu ika heta ntsimbu ya kutia nji ka leka vakua kutia nguange, livangenu ku kungulula muila na ku ukuta mu mikuta linga va u tsimike. Munima yaco, tienu tiliku na ku ihaka mu cisete cange.’”
31 Kaha Yesu ua va telelele naua cisimo cikuavo nguendi: “Vuangana vua muilu vunapu ngue nona ya musalata* ya ambatele umo yala na ku ikuna mu lihia liendi.
32 Ikeyo yapua mbuto ya indende cikuma ku vimbuto viose, vunoni mu ye kukola, ye ku laha ku tuvakana visoka viose na kupua muti. Na tuzila ve kuiza kua ku tunga ku mintango yauo.”
33 Yesu ua va lekele naua cisimo cikuavo nguendi: “Vuangana vua muilu, vunapu ngue cimbaluila ca ambatele umo mpuevo na ku cishinga ha vunga vua ku lingisa mbolo mu vivela via kama vitatu, noho ha vua futunukilile vuose.”
34 Viose evi, Yesu ua vi handekele ku mbunga ku hitila mu visimo. Cili vene, ka handekele navo ca ku hona visimo,
35 linga a lipuisemo mezi a handekele kapolofeto nguendi: “Nji ka va longesa ku hitila mu visimo, nji kambulula viuma vi va suekele tunde ku vuputukilo.”*
36 Mua manusuile ku salesa mbunga, Yesu ua kovelele mu ndzivo. Kaha vandongesi vendi vezile kuli ikeye na ku mu leka nguavo: “Tu lumbunuine vi ca lomboloka cisimo ca muila ua mu lihia.”
37 Ua va kumbuluile nguendi: “Mukua kukuva mbuto ya cili, ikeye Muana muntu.
38 Lihia linapu mavu, kaha mbuto ya cili inapu vana va Vuangana, vunoni muila vanapu vana va mukua vupi.
39 Kaha citozi ua u kuvilemo ikeye Ndiavu. Kutia ca lomboloka kukotoka ca mavu kaha vakua kutia, vanapu tungelo.
40 Na vuno vene, ngue mu va kutile muila mu mikuta na ku u uemeka, mukemuo mu ci kapua na ha kukotoka ca mavu.
41 Muana muntu aka tuma tungelo vendi kaha aka tundisa mu Vuangana vuendi viuma viose vie ku suntsuisa na vose vakua ku linga via kuvihia.
42 Kaha aka va mbila mu lutengo lua tuhia, mukemuo mu ka kala kulila na kulisumanga ku mazo.
43 Ha ntsimbu yaco, vakua vuviuke va katua ceke ngue mutana mu Vuangana vua Iseavo. Uose ali na matuitui evueko.
44 “Vuangana vua muilu, vunapu ngue vupite vua ku sueka mu lihia vua uanene umo yala kaha ua vu suekele naua. Omo lia ndzolela yakele nayo, ngeci ua ile na ku landesa viose via kele navio na kuiza kua ku landa lize lihia.
45 “Vuangana vua muilu vunapu naua ngue mukua mingoso ue kuya na ku tonda mavue a seho.
46 Mua uanene limo livue lia seho lia ndando ya kama, haze vene uaile na ku landesa viose via kele navio kaha ua landele lize livue.
47 “Vuangana vua muilu vunapu naua ngue vuanda vua kama vu vatele mu kalunga ndonga, ngeci vua kungile vantsi va miyati yose.
48 Omo vuanda vua sulile, va vu kokelele ha ntunda ngeci va tumamene na ku hangualaho vantsi va cili, vunoni vantsi va kuvihia va va mbilile kuti.
49 Mukemuo mu ci kafua na ha kukotoka ca mavu. Tungelo va keza linga va ku tepe vakua vupi ku vakua vuviuke.
50 Kaha va ka mbila vakua vupi mu lutengo lua tuhia. Mukemuo mu ka kala kulila cavo na kulisumanga ku mazo.”
51 Yesu uehuile vandongesi vendi nguendi: “Vuno mu nevuisisa viuma viose evi ni?” Va mu kumbuluile nguavo: “Eyo.”
52 Ngeci ua va lekele nguendi: “Nga ngoco ni, mulongisi uose uva na longesa via Vuangana vua muilu napu ngue ivene ndzivo, uze a tuhula viuma via viha na viuma via laza ku vupite vuendi.”
53 Yesu mua manusuile kuta evi visimo, ua ile.
54 Mua ka hetele muimbo liavo, ua putukile ku longesa mu sinangonga. Ngeci mbunga va likomokelele mua kama na ku handeka nguavo: “Ou yala kuiko na uana mana a kufua ngeci na ngolo ya ku linga vikomoueso via kama?
55 Kati ikeyou muana ua uze mukua ku songa? Nguetu naye Maliya ni? Kaha vantsongo vendi kati Tiango, Yosefe, Simone na Yunda?
56 Kaha vandumbuendi kati vano vatuli navo? Amba kuiko honi na uana mana ose aua?”
57 Ngeci va putukile ku suntsuka omo liendi. Vunoni Yesu ua va lekele nguendi: “Kapolofeto ka ve ku mu singimika muimbo liendi ni mu ndzivo yendi.”
58 Mu ku linga ka va kele na lutsilielo, ngeci Yesu ka lingile vikomoueso via vingi muimbo liavo.
Matota
^ “Kambuto kakandende ka kala ku Palestina, ka hasa ku kola na kupua muti ua laha u heta ha 4 metros.”
^ Halumo “ha ku tanga ca mavu.”
