Ku Hitila Muli Mateu 14:1-36
14 Ku ntsimbu ize, nguvulu Helonde ua vuile viuma via kele na ku linga Yesu
2 ngeci, ua lekele vangamba vendi nguendi: “Ou Yoano mukua kumbatiza, va na mu sangula ku vatsi, ngeci ali na ku hasa kulinga vikomoueso via kama.”
3 Ku nima, Helonde ua kutile Yoano na ku mu soka mu kamenga, omo lia Helondiya, uze ua puile mpuevo ya Filipu mukuluntu ua Helonde.
4 Muomu Yoano ua kele na ku muleka nguendi: “Kuliya na lisiko ka citava uambate ou mpuevo.”
5 Ngeci Helonde ua tondele kutsiha Yoano vunoni ua tinine mbunga, muomu va mu muene kupua kapolofeto.
6 Vunoni omo kua kele cilika ca ku vuluka litangua lia semukile Helonde, muana Helondiya ua mpuevo ua kinine ku meso a mbunga, kaha ua vuisile Helonde ndzolela.
7 Ngeci Helonde ua lisingile, na ku mu kulahesa nguendi aka mu hana viose-ovio via mu pinga.
8 Uze muanampuevo mu ku kava via mu lekele naye, ua pingile nguendi: “Nji hane mutue ua Yoano Mukua Kumbatiza aha ha lilonga.”
9 Vutuhu muangana ua liveyele, vunoni omo lia cisingo ca lingile na vantu vakele na kulia navo, ua tumine linga va mu neheleuo.
10 Ngeci ua tumine umo ku kamenga, aka tape* mutue ua Yoano Mukua Kumbatiza.
11 Vanehele mutue ua Yoano ha lilonga, na ku uhana kuli muanampuevo kaha ua u tualele kuli naye.
12 Mu nima ya ntsimbu, vandongesi va Yoano vezile na kuambata muvila uendi na ku ka utsinda, mu nima yaco, vaka lekele Yesu viuma viose via solokele.
13 Yesu mua vivuile, ua londele mu vuato na kuya ku cihela kua ku holoka linga aka kale kua likaliendi. Vunoni vantu mu va tantekeyele kua ile, va tundile mu membo avo na ku mu kava ha mikono.
14 Kaha mua ka hetele ha ntunda, ua muene mbunga ya kama, ua va vuilile ngozi, ngeci ua kanguisile vose vakele na ku vavala.
15 Vunoni tele kuya na kutoka, vandongesi vendi vezile kuli ikeye na ku mu leka nguavo: “Tuli ku lahako na membo kaha kuli na kutoka, leka mbunga vaye mu membo vaka lilandele viakulia viavo.”
16 Vunoni Yesu ua va kumbuluile nguendi: “Ka citondeka vaye, va hanenu yenu via kulia.”
17 Kaha vandongesi vendi va mu lekele nguavo: “Ka tuesi na viakulia kuno, tuli lika na vimbolo vitanu na vantsi vavali.”
18 Kaha ua va lekele nguendi: “Vinehenu kuno.”
19 Ngeci ua lekele mbunga itumame ha muila, ua ambatele vimbolo vitanu na vantsi vavali, kaha ua talele muilu na ku vundila. Mu nima ya ku vundila, ua tavuile mbolo na ku ihana ku vandongesi vendi, kaha vandongesi vendi va pangelele mbunga.
20 Vose valile vakutile, kaha va kunguluile visupo via via kulia na ku sulisa vihele 12.
21 Vamala va kupua 5.000 vakevo valile, ca ku hona ku tandako vampuevo na vanike.
22 Haze vene, ua lekele vandongesi vendi va kovele mu vuato, linga vatuame mu sinia, ntsimbu ikeye aci lisalesa na mbunga.
23 Munima ya ku lisalesa na mbunga, ua ile ha muncinda mu ku vundila kaha ua ka keleho lika liendi noho mu kua tokele.
24 Ha ntsimbu yaco, vuato vua kele ku lahako na ntunda kaha vua kele na kupinda na mancimba omo lia luhundzi.
25 Vunoni ha cilo* ca mu ciuana, Yesu ua ile kuli vakevo oku enda helu lia mema.
26 Vandongesi vendi mu va mu muene ali na kuenda helu lia mema, va vuile liova ngeci va tambakanene nguavo: “Ciyovo eci!”
27 Kaha Yesu ua va lekele nguendi: “Simpenu! Yange vene, kati muivue liova.”
28 Ngeci Petulu ua mu lekele nguendi: “Muangana nga yove mpundu, njileke njize kuli yove oku njendela helu lia mema.”
29 Ngeci Yesu ua mu kumbuluile nguendi: “Tuaya!” Petulu ua sulukile mu vuato ua putukile kuya kuli Yesu oku enda ha mema.
30 Vunoni omo ua tualele mana ku luhundzi luakama, ua vuile liova ngeci ua putukile ku vombela, na ku tambakana Yesu nguendi: “Muangana, njovole!”
31 Vuasi-vuasi, Yesu uoluele livoko liendi na ku mu kuata nguendi: “Ove mukua lutsilielo lua lundende, vika una kela na vimpata?”
32 Mu nima ya ku kovela mu vuato, luze luhundzi lua kama lua likelele.
33 Kaha vaze vakele mu vuato va mu tsikamenene na ku handeka nguavo: “Cili vene ove u Muana Njambi.”
34 Va zavukile na ku ka tutika ku Ngenezaleta.
35 Vamala va muze muimbo, mu va tantekeyele ngecize Yesu neza, va tumine lizi muimbo liose, ngeci vantu va mu nehelele vose vakele na kuvavala.
36 Va mu lambelelele nguavo, vakuate ambe lika kuntsongo ya vuzalo vuendi. Kaha vose vakuateleko va kangukile.
Matota
^ Ni “aka tete.”
^ Ya lumbunuka ku tunda ku vi 3 ola ya ku vandemba, ku tuala ha lie ku cela litangua ku vi 6 ola.
