Ku Hitila Muli Mateu 15:1-39
15 Kaha vamo vaFaliseu na vakua kusoneka va ku Yelusalema, vezile kuli Yesu na ku muihula nguavo:
2 “Omo lia vika vandongesi vove ka ve ku kavela cisemua ca vakukuluila vetu? Ca ku muenako, ka ve kutana ku mavoko* ntsimbu kanda valie.”
3 Ngeci Yesu ua va kumbuluile nguendi: “Amba yenico, omo lia vika ka mue kuononoka lisiko lia Njambi vunoni mue ku kava cisemua cenu?
4 Ca ku muenako, Njambi ua handekele nguendi: ‘Singimika iso na noko’ kaha naua nguendi: ‘Uose a sahula* ise na naye va pande ku mu tsiha.’
5 Vunoni yenu mue ku handeka nguenu: ‘Uose a leka ise ni naye nguendi: “Viose vinjili navio tele nga vi na pandele ku mi kuasa, nja vi hana kuli Njambi mu kupua vuana,”
6 kaha muntu uaco ka pandele ku singimika ise.’ Mu na lingisa lizi lia Njambi li honoue seho, omo lia cisemua cenu.
7 Enu vakua civembulu, Isaya ua polofetele vuino ku tuala hali yenu, mua handekele nguendi:
8 ‘Ava vantu vali na ku nji singimika lika na kanua, vunoni mitima yavo ili kulahako nange.
9 Ku lemesa cavo cinapu ca ngoco, muomu vali na ku longesa masiko a vantu ngue a Njambi.’”
10 Kaha Yesu ua sanene mbunga i suene kuli ikeye na ku va leka nguendi: “Halakanenu vulumbunuiso vua ano mezi:
11 Cuma ci kovela mu kanua ka muntu, kati cikeco ci mu zualesa. Vunoni cize ci tunda mu kanua kendi, cikeco ci mu zualesa.”
12 “Kaha vandongesi vendi vezile kuli ikeye na ku mu leka nguavo: “U tantekeya nguove vaFaliseu va na suntsuka omo lia viuma vi una handeka?”
13 Kaha ikeye ua va kumbuluile nguendi: “Cisoka cose ka kunine Tata ua muilu, vaka ci tukula.
14 Kati mu va tuale mana. Vakevo vapua tupuputa, vunoni va tonda ku tuamenena vakuavo. Kaha nga kapuputa a tuamenena mukuavo kapuputa, vose va ka uila mu cina.”
15 Petulu ua handekele nguendi: “Tu lomboluele vuino eci cisimo.”
16 Yesu ua kumbuluile nguendi: “Nkuma nenu ka muevuisisile na ntsimbu ino?
17 Nkuma ka mu tantekeya nguenu viose vie ku kovela mu kanua, vie ku hita muzimo na kuya kuti ni?*
18 Vunoni viose vie ku tuhuka mu kanua, vie ku tunda ku mutima kaha vikevio vie ku zualesa muntu.
19 Ca ku muenako, ku mutima kukekuo kue ku tunda visinganieka via kuvihia, kutsiha, vukoyi,* vupangala,* vuizi, vukaleho vua visaki na ku sahula Njambi.
20 Evi vikevio vie ku zualesa muntu. Vunoni kulia ca ku hona kutana ku mavoko, ka ce ku zualesa muntu.”
21 Yesu mua tundile kuze ua ile ku mutamba ua Tile na Sindone.
22 Kaha umo mpuevo ua kuze ku mutamba ua Fenisia, uezile na ku tambakana nguendi: “Muangana, ove Muana Ndaviti, nji vuileko nkeke. Munange ua mpuevo ali na ndemone, ali na kumu yandesa mua kama.”
23 Vunoni Yesu ka mu kumbuluile. Ngeci vandongesi vendi vezile na ku mu leka nguavo: “Sekula ou mpuevo muomu ali na ku tualelelaho ku tu kava, oku a tambakana.”
24 Ua va kumbuluile nguendi: “Ka va nji tumine ku muntu uose-ouo, kuvanga ku vampanga va kuzimbala va ku ndzivo ya Isaleli.”
25 Vunoni uze mpuevo uezile kuli ikeye na ku mu tsikamena nguendi: “Muangana, nji kuaseko.”
26 Yesu ua mu kumbuluile nguendi: “Kati ca cili ku hana viakulia via vanike ku vana va tutali.”
27 Kaha uze mpuevo ua mu kumbuluile nguendi: “Mukemuo Muangana, vunoni vana va tutali navo ve kulia vize* vie ku lahuka ku mesa ya vakukuavo.”
28 Ngeci Yesu ua mu kumbuluile nguendi: “Ove mpuevo, lutsilielo luove lua kama, vilingiue vi una vundila.” Kaha haze vene, munendi ua mpuevo ua kangukile.
29 Yesu mua tundile kuze ua ile ku hiehi na cisali ca Ngalileya, kaha ua kandukile ha muncinda na ku ka tumamaho.
30 Mbunga ya mu kavele va mu tualelele vilema, vakua ku tenguka, tupuputa, tuveveve na vakuavo va kele na mavezi eka na eka. Va va hakele ku viliato viendi, ngeci vose ua va kanguisile.
31 Mbunga ya likomokelele mua kama, mu va muene tuveve vali na ku handeka, vakua ku tenguka va na kanguka, vilema vali na kuenda vuino na tupuputa vali na ku mona. Ngeci vose va sangazialele Njambi ya Isaleli.
32 Kaha Yesu ua sanene vandongesi vendi na ku va leka nguendi: “Njili na ku vuila ngozi eyi mbunga, muomu vali nange matangua atatu kaha ka vesi na viakulia. Ka nji tondo vaye na ndzala yavo muomu halumo va hasa ku lezumukila mu njila.”
33 Vunoni vandongesi vendi va muihuile nguavo: “Membo ali ku lahako, kuli tu hasa ku uana viakulia via kupuamo via ku hana mbunga ya kupua aha?”
34 Kaha Yesu ua vehuile nguendi: “Vimbolo vingahi muli navio?” Va mu kumbuluile nguavo: “Via kupua 7, na tumo tuvantsi tua tundende.”
35 Ngeci ua lekele mbunga va tumame.
36 Yesu ua tambuile vize vimbolo 7 na tuvantsi, kaha mu nima ya ku vundila, ua pazuile mbolo na ku ihana ku vandongesi vendi, kaha vakevo va i tepelele ku mbunga.
37 Ngeci vose valile, va kutile. Kaha vandongesi va kunguluile visupo viose via viakulia, na ku sulisa mitonga 7.
38 Vaze valile va puile vamala 4.000, ca ku hona ku tandako vampuevo na vanike.
39 Kaha mu nima ya ku lisalesa na mbunga, Yesu ua kovelele mu vuato na kuya ku Mangandane.
Matota
^ Ca lomboloka “vandongesi ka va kele na ku tana ku mavoko kuliya na cisemua cavo.”
^ Ni “uose a handeka mua kuvihia.”
^ Ni “kandzivo ka ku likuasela?”
^ Ni “kuenda vungungu mukua ndzivo yove.”
^ Mu ciNgelengu “Porneia.”—Talenu Mezi ava Lombolola.
^ Ni “vuuiui ni vungululu.”
