Ku Hitila Muli Mateu 16:1-28
16 VaFaliseu na vaSanduseu vezile kuli Yesu kua ku mueseka, va mu pingile nguavo a va muese citantekeyeso ca ku tunda muilu.
2 Yesu ua va kumbuluile nguendi: “Mu lieku lahuka litangua, mue ku handeka nguenu, ‘imene kukaca vuino muomu lilu lia venguluka.’
3 Kaha ku cimene mue ku handeka nguenu, ‘lelo kukala masika ni kukala niondzi muomu lilu lia venguluka ni kuose ndu.’ Mu tantekeya ku lumbununa vuino vati kunafu kuilu vunoni ka mu tantekeya ku lombolola vitantekeyeso vili na ku soloka mu ntsimbu ino.
4 Enu muyati ua kuvihia na vingungu, kasi mu tualelelaho ku tonda citantekeyeso, vunoni nji mi leka nguange, ka mu mono citantekeyeso na cimo cahi kuvanga cize vene ca Yona.” Omo ua manusuile ku handeka ngoco, ua va sezele.
5 Vandongesi va zavukile na kuya mu sinia vunoni va suvile kuambata mbolo.
6 Yesu ua va lekele nguendi: “Tonenu na ku zangama na cimbaluila ca vaFaliseu na vaSanduseu.”
7 Kaha va putukile ku lihandekesa ha kati kavo nguavo: “Ka tua ambatele mbolo na imo yahi.”
8 Yesu ua tantekeyele vi va kele na ku handeka ha kati kavo, ngeci ua vehuile nguendi: “Enu vakua lutsilielo lua lundende. Vika muli na ku handekela ha kati kenu nguenu ka muambatele mbolo na imo yahi?
9 Nkuma na ntsimbu ino ka muevuisisile? Ka mu vuluka vize vimbolo vitanu vi valile vamala 5.000 na vihele via vingi vi mua sulisile ni?
10 Ni ka mu vuluka vize vimbolo vitanu na vivali vi valile vantu 4.000 kaha na mitonga imua sulisile ni?
11 Vati ka mua hasele ku nongonona nguenu kanjesi na ku handeka via mbolo? Nja mi leka linga mu zangame na cimbaluila ca vaFaliseu na vaSanduseu.”
12 Vandongesi vendi vevuisisile honi nguavo, ua kele na ku handeka nguendi va zangame na vilongesa via vaFaliseu na vaSanduseu kati via cimbaluila ca mbolo.
13 Yesu mua ka hetele ku mutambela ua Sesaliya ya Filipu, ua hulile vandongesi vendi nguendi: “Vika vali na ku handeka vantu ku tuala ha Muana muntu, nguavo uapua iya?”
14 Va mu kumbuluile nguavo: “Vamo vali na ku handeka nguavo uapua Yoano mukua kumbatiza, vakuavo nguavo Eliya, vakuavo naua nguavo Yelemiya ni umo kapolofeto.”
15 Ngeci ua vehuile nguendi: “Amba yenuco, nguenu yange iya?”
16 Simone Petulu ua mu kumbuluile nguendi: “Yove u Kilistu, Muana Njambi ua muono.”
17 Yesu ua mu kumbuluile nguendi: “Ua vezika Simone muana Yona, muomu kati vantu* va na ku soluela ou muzimbu, vunoni Tata ali muilu ikeye na ku soluelauo.
18 Nji ku leka nguange yove Petulu, ha livue lino nji ka tungilaho cikungulukilo cange kaha cipue vikolo via cihilo* ka vi ka hasa ku ci hiana.
19 Nji ku hana visapi via Vuangana vua muilu kaha vi uka kuta hano ha mavu, va na vi kutu laza muilu. Na viose vi u zitula hano ha mavu, va na vi zitula laza muilu.”
20 Ngeci Yesu ua lekele vandongesi vendi linga kati va lekeko na umo uahi nguavo ikeye Kilistu.
21 Ku tunda haze vene, Yesu ua putukile ku lekako vandongesi vendi nguendi napande kuya ku Yelusalema kaha vakuluntu, vakuluntu va vasasendote na vakua kusoneka vaka mu yandesa na ku mu tsiha, vunoni ha litangua lia mu citatu aka sanguka.
22 Petulu mua vuile ngoco ua mu sanenene ku mukulo na ku mu mamuna nguendi: “Muangana, livuileko ngozi; evi viuma kati vi ku solokele.”
23 Yesu ua mu talesele nima na ku mu leka nguendi: “Tundomu Satana! Unapu cisuntsuiso kuli yange, muomu visinganieka viove kati via Njambi, vunoni via vantu.”
24 Yesu ua lekele vandongesi vendi nguendi: “Nga muntu a tonda kunji kava, na pande kuliviana ikeye ivene na kuambata citi cendi ca kayando* kaha atualeleho kunji kava.
25 Muomu uose a tonda kuohiela muono uendi, aka u zimbalesa. Vunoni uose a zimbalesa muono uendi omo liange, aka u uana.
26 Seho ika iliho nga muntu a pita viuma viose via ha mavu, vunoni a zimbalesa muono uendi? Ni vika a hasa ku fueta muntu linga a lande muono uendi?
27 Muomu Muana muntu, a keza mu vumpahu vua Ise na tungelo vendi kaha aka fueta muntu ku muntu kuliya na vilinga viendi.
28 Nji mi leka vusunga nguange, vamo vali hano ka va katsi, kuvanga va na mono Muana muntu eza mu Vuangana vuendi.”
