Ku Hitila Muli Mateu 17:1-27
17 Mu nima ya matangua 6, Yesu ua sanene Petulu, Tiango na muanaye Yoano na kuya navo ku umo muncinda ua laha, kua likaliavo.
2 Kaha ha meso avo vene, Yesu ualulukile,* cihanga cendi ca viakuile ngue litangua, vuzalo vuendi vua tokele ngue ceke.
3 Talenu! Haze vene va muene Mosesa na Eliya va simutuila na Yesu.
4 Ngeci Petulu ua lekele Yesu nguendi: “Muangana ca cili nga tu kala kuno vene, nga u tonda, nji hasa ku tunga vimbalaka* vitatu, imo yove, ikuavo ya Mosesa, ikuavo co ya Eliya.”
5 Ntsimbu tele acili na ku handeka, limo liselua lia ku viakula lia va fuikile, kaha mu liselua liaco mua tundile lizi ngualio: “Ou ikeye Muanange, i nja lema, ue ku nji vuisa ndzolela. Mu halakanenu.”
6 Vandongesi mu va vuile ngoco, va tsikamene na ku kulamena ha mavu, muomu va vuile cikuma liova.
7 Yesu ua va suenene kaha ua va kuatele na ku va leka nguendi: “Katukenu kati muivue liova.”
8 Vunoni mu vanduile meso avo, ka va muene naua na umo uahi, kuvanga Yesu lika.
9 Omo vakele na ku sikumuka ha muncinda, Yesu ua va vindikile nguendi: “Kati mu lekeko na umo uahi via cino cimona, noho Muana muntu na sanguka ku vatsi.”
10 Vunoni vandongesi va muihuile nguavo: “Omo lia vika vakua ku soneka vali na ku handeka nguavo, Eliya na pande ku livanga kuiza?”
11 Yesu ua va kumbuluile nguendi: “Mukemuo vene, Eliya ali na kuiza kaha aku hiluisa viuma viose ngue mu via fuile ha katete.
12 Vunoni nji mi leka nguange, Eliya neza laza, vunoni ka va mu tantekeyele, va mu lingile viuma viose-ovio vi va zangele. Na vuno vene, mukemuo mua ka yanda Muana muntu ha mavoko avo.”
13 Vandongesi vendi va nongonuene nguavo, ua kele na ku handeka via Yoano mukua kumbatiza.
14 Mu va hetele ku hiehi na mbunga, umo yala ua suenene kuli Yesu, kaha ua mu tsikamenene na ku handeka nguendi:
15 “Muangana, vuilako munange nkeke, uapua mukua ku shinya kaha ali na ku vavala mua kama. Vintsimbu via vingi ue ku uila mu tuhia na mu mema.
16 Nja mu nehele ku vandongesi vove, vunoni ka va hasele ku mu kanguisa.”
17 Yesu ua kumbuluile nguendi: “Eni vakua muyati ua ku hona lutsilielo kaha ua ku hilimana, ntsimbu ingahi nji ka tualelelaho kukala nenu? Ntsimbu ingahi nji ka mi yandela? Munehenu kuno.”
18 Kaha Yesu ua tenukilile uze ndemone, ngeci ua tundile. Haze vene, uze kanike ua yala ua kangukile.
19 Vandongesi vendi va mu sanenene kua likaliavo na ku muihula nguavo: “Omo lia vika yetu ka tua hasele ku tundisa uze ndemone?”
20 Ua va kumbuluile nguendi: “Muomu muli na lutsilielo lua lundende. Nji mi leka vusunga nguange, nga mu kala na lutsilielo lua kupua ambe ha mbuto ya musalata, nga mu hasa ku leka ou muncinda nguenu, ‘Tunda aha, ya haze,’ nga u tundaho. Nga ka kuesi na cimo cahi ci mu honoua ku linga.”
21 ——
22 Ntsimbu tele acili na vandongesi vendi mu Ngalileya, Yesu ua va lekele nguendi: “Muana muntu va ka muenda vungungu na ku mu hana mu mavoko a vantu,
23 Mu nima yaco va ka mu tsiha, vunoni ha litangua lia mu citatu, aka sanguka.” Aa mezi a vuisile vandongesi vendi vusiua.
24 Mu va hetele mu Kapenama, vamala vakua ku fuetesa lisimu lia vidrakima vivali* via ku hana ku tembele, va suenene kuli Petulu na ku mu hula nguavo: “Nkuma ou mulongisi uenu ke ku fueta lisimu lia vidrakima vivali?”
25 Ua mu kumbuluile nguendi: “Ue ku fueta.” Kaha omo Petulu ua kovelele mu ndzivo, Yesu ua livangele ku muihula nguendi: “Simone, mu ku mona cove, vamiangana va mavu ve ku tambula milambu na lisimu kuli veya? Ku vana vavo ni ku vantu veka?
26 Petulu ua mu kumbuluile nguendi: “Ku vantu veka.” Ngeci Yesu ua mu lekele nguendi: “Nga mukemuo, kaha vana ka va pandele ku fueta lisimu.
27 Vunoni linga kati tu va suntsuise, ya ku cisali uka lovele. Intsi ua ku livanga i uka lovela, uka mu fukula mu kanua, uka uanamo imo mbongo* ya palata. Kaha uka i nona, ua ku fuete lisimu liange na liove.”
Matota
^ Ni “ku himpuka.”
^ Ni “vintsingi.”
^ Vidrakima vivali: via puile fueto ya muntu ua pangele matangua avali.
^ Mu ciNgelengu “mbongo ya Statele” citava ikeyo naua ya puile tetradrakima.
