Ku Hitila Muli Mateu 18:1-35
18 Ha ntsimbu ize vene, vandongesi va suenene kuli Yesu na ku muihula nguavo: “Iya mpundu ua kama mu Vuangana vua muilu?”
2 Ngeci Yesu ua sanene umo kanike ua mundende na ku muimika ha kati kavo
3 kaha nguendi: “Nji mi leka vusunga nguange, nga ka mualuluka na kupua ngue vanike vavandende, ka mu ka kovela mu Vuangana vua muilu.
4 Ngeci mukemuo, uose a likehesa ngeci muou kanike, ikeye ua kama mu Vuangana vua muilu.
5 Kaha uose a tambula ou kanike ua mundende omo lizina liange, a nji tambula yange.
6 Vunoni uose a suntsuisa umo ua ava vavandende va nji tsiliela, ci li kulutue ku mu kutiya mu ntsingo livue lia kama lia ku tuisa vunga, lize lie ku zenga cimulu, na ku mu mbila mu kalunga-ndonga.
7 “Ngongo yenu vakua mavu mue ku suntsuisa vakuenu. Cili vene, visuntsuiso ku vi ka kala, vunoni kuvindama cavo vaze va suntsuisa vakuavo.
8 Ngeci mukemuo, nga livoko ni mukono uove uku suntsuisa, u vatule na ku umbila kuti. Ci li kulutue uka tambule muono oku una tenguka ni u cilema, ku hiana va ku mbile mu tuhia ka ve ku zima, oku uli na mavoko ni mikono ivali.
9 Kaha nga liso liove li ku suntsuisa litsokovolemo na ku limbila kuti. Ci li ku lutue uka uane muono na liso limo lika, ku hiana va ka ku mbile mu Ngehena* ya tuhia na meso ose avali.
10 Zangamenu linga kati mu yengule umo uava vavandende, nji mi leka vusunga nguange ntsimbu yose tungelo vavo muilu ve ku tala ku meso a Tata ali muilu.
11 ——
12 “Vika mu singaniekaho? Nga muntu ali na vampanga 100, kaha umo uavo a zimbala, vuno ka ka seze vampanga 99 ha muncinda linga aye na ku tonda uze na zimbala ni?
13 Nga aka mu uana, cili vene nji mi leka nguange, aka viukilila mua kama ku hiana na vaze 99 ka va zimbalele.
14 Na vuno vene, Tata* ali muilu, ka tondo linga umo uava vavandende a nonge.
15 “Nga muanoko na lingi vupi, ya uka mu leke* vupi vua na lingi kua likaliendi. Nga aku halakana kaha u novola muanoko.
16 Nga ka ku halakanene, sanako umo ni vavali vapue vakaleho, linga na vakaleho* vavali ni vatatu cimpande caco ci lumbunuke.
17 Nga ka halakana ambe vene vakaleho, leka cikungulukilo, nga ka halakana cikungulukilo kaha apue kuli yove ngue mukua mavu ni mukua ku fuetesa lisimu.
18 “Nji mi leka vusunga nguange, viose vi mu kuta hano ha mavu va na vikutu laza muilu, kaha viose vi mu zitula hano ha mavu va na vi zitula laza muilu.
19 Cikuavo naua, nji mi leka vusunga nguange, nga hakati kenu, vamo vantu vavali va litavasiana kuvundila cimo cuma ca seho, Tata uze ali muilu aka va hanaco.
20 Muomu nga vantu vavali ni vatatu va na likungulula mu lizina liange, nange njili hakati kavo.”
21 Kaha Petulu uezile kuli Yesu na ku muihula nguendi: “Muangana, nga muanetu na nji vulumuina, lungahi nja pande ku muecela? Nja pande ku muecela lua kupua 7 ni?”
22 Yesu ua mu kumbuluile nguendi: “Nji ku leka nguange kati lua kupua 7 lika, vunoni lua kupua 77.
23 “Ngeci mukemuo, Vuangana vua muilu vunapu ngue umo muangana, ua tondele vangamba vendi, va mu fuete makongo.
24 Mua putukile ku tambula makongo endi, va mu nehelele umo yala ua mu levalele 10.000 ya vitalentu.*
25 Vunoni mu ku linga uze yala ka kele na vimbongo via ku fueta makongo aco, ngeci uze muangana ua tumine nguendi, va landese uze yala hamolika na mpueyendi na vana vendi, na viuma viose via kele navio linga afuete aze makongo.
26 Ngeci uze ngamba ua tsikamene na ku mu lambelela nguendi, ‘Muangana nji haneko kamo kantsimbu, nji ku fueta vimbongo viove viose.’
27 Muangana ua muivuilile ngozi, ngeci ua muecelele aye kaha ua zimanganene viose via mu levalele.
28 Vunoni uze ngamba mua tuhukile, ua ka liuanene na ngamba mukuavo, uze ua mu levalele 100 ya videnariu. Ngeci ua mu kuatele na ku mu tikinya ha milivu na ku mu leka nguendi: ‘Nji fuete viose vi ua nji levala.’
29 Ngeci uze mukuavo, ua tsikamene na ku mu lambelela nguendi: ‘Nji haneko kamo kantsimbu, nji ku fueta vimbongo viove viose.’
30 Vunoni uze ngamba ua vianene ku konekela mukuavo, kaha ua mu ambatele na ku mu soka mu kamenga noho he ku fuetelele makongo endi.
31 Vangamba vakuavo mu va vimuene, va vuile kuvavala ca kama ku mutima, ngeci va kambuluile viose kuli muangana uavo.
32 Ngeci muangana ua mu sanene na ku mu leka nguendi: ‘Ove u ngamba ua kuvihia, mu ua nji lambelelele, nja zimanganene makongo ove.
33 Nkuma ka ua pandele kuvuila mukuenu nkeke ngue mu nji na ku mueseleyo yange?’
34 Muangana uendi ua nienguele mua kama, ngeci ua mu sokele mu kamenga noho he ku fuetelele makongo endi ose.
35 Na vuno vene, Tata ua muilu mukemuo mua ka mi linga, nga ka mu konekela vamuanoko na mutima uose.
Matota
^ Talenu Mezi ava Lombolola.
^ Halumo “Iso.”
^ Ni “ya ka mu handekele.”
^ Mu ciNgelengu “mutunua.”
^ 10.000 ya vitalentu ya puile hamo na 60 milhões ya videnariu.
