Ku Hitila Muli Mateu 2:1-23
2 Ku ntsimbu ya kele na ku sika Muangana Helonde, Yesu ua semukile mu Mbetelema ya mu Yundeya. Kaha vakua ku lilongesa via vintangantanga* va ku Vucelo, vezile ku Yelusalema
2 na kuihula nguavo: “Ouo muangana ua vaYundeya na semuka, ali kuli? Muomu mu tua kele ku Vucelo tua muene ntangantanga yendi, ngeci tu neza mu ku mu tsikamena.”
3 Omo Muangana Helonde ua vuile ngoco, ua lisosomuene cikuma hamo na vantu vose va mu Yelusalema.
4 Ngeci ua kunguluile vakuluntu va vasasendote vose na vakua ku soneka, linga va mu leke kuiko ue ku semukilile Kilistu.*
5 Va mu kumbuluile nguavo: “Mu Mbetelema ya mu Yundeya. Muomu kapolofeto ua sonekele nguendi:
6 ‘A Mbetelema ua mu cifuti ca Yunda, nove ua kala na seho ha kati ka vimbonge vi ve ku sika vanguvulu va mu Yunda. Muli yove mu ka tunda nguvulu aka pua kaniungi ka vantu vange vaIsaleli.’”
7 Mu nima yaco, Helonde ua sanene mu vusueke vakua ku lilongesa via vintangantanga, linga va mu leke ntsimbu ika mpundu ntangantanga yaco ya solokele.
8 Kaha mua va tumine ku Mbetelema, ua va lekele nguendi: “Yenu mu ka tondesese vuino kanike uaco. Mu mu ka mu uana, mua ku nji lekeko nange linga nji ka mu tsikamene.”
9 Mu nima ya kuivua via handekele muangana, vaile. Kaha talenu! Ntangantanga iva muene tele vali ku Vucelo, ya va tuamenene na haze ha kele kanike.
10 Mu va muene ntangantanga yaco, va vuile ndzolela ya kama!
11 Mu va kovelele mu ndzivo, va muene kanike na naye Maliya, ngeci va mu tsikamenene na ku mu sambelela. Va zituile vikuata viavo na ku mu hana vuana vua olu, olivano na mira.*
12 Vunoni, Njambi ua va nanguile mu cilota linga kati va hiluke kuli Helonde. Ngeci va hitile njila yeka mu va hilukile ku cifuti cavo.
13 Mu va tundileko, kangelo ua Yehova ua solokele kuli Yosefe mu cilota nguendi: “Katuka, ambata kanike na naye kaha teuela ku Ingitu noho ha nji ka ku lekela linga u hiluke, muomu Helonde vuovuno a tonda kanike linga a mu tsihe.”
14 Ku vutsiki vuze vene, Yosefe ua hindukile uambatele kanike na naye na kuya ku Ingitu.
15 Ua ka keleko na ha kutsa ca Helonde. Evi via puisilemo via handekele Yehova ku hitila muli kapolofeto uendi nguendi: “Nja sanene muanange a tunde ku Ingitu.”
16 Kaha Helonde mua muene nguendi vakua ku lilongesa via vintangantanga va na mu kuisa, ua nyenguele mua kama. Ngeci ua tumbikile lisiko lia ku tsiha vanike va vamala vose va mu Mbetelema na mambueli,* vaze va kele na miaka ivali ni muintsi, kuliya na ntsimbu i va mu lekele vakua ku lilongesa via vintangantanga.
17 Evi via puisilemo mezi a handekele kapolofeto Yelemiya nguendi:
18 “Va vuile miteto na ku linyenga ca kama ku Lama, Lakele ikeye ua kele na ku lila vana vendi, kaha ka tavele ku mu lembezieka muomu ka va keleko naua.”
19 Mu nima ya kutsa ca Helonde, kangelo ua Yehova ua solokelele Yosefe mu cilota ku Ingitu
20 na ku mu leka nguendi: “Katuka, ambata kanike na naye na ku hiluka ku cifuti ca Isaleli. Muomu vaze va kele na ku tonda muono ua kanike va natsi.”
21 Kaha ua katukile na kuambata kanike na naye na ku hiluka mu cifuti ca Isaleli.
22 Vunoni mua vuile ngecize Alekelau ikeye na hingi* ise Helonde ha vuangana mu ku sika Yunda, Yosefe ua vuile liova lia ku hilukako. Cikuavo naua, mu ku linga Njambi ua mu lunguile mu cilota, ngeci ua ile ku Ngalileya.
23 Kaha ua ka tungile mu mbonge iva sana nguavo Nazaleta, linga ali puisemo mezi ava handekele vapolofeto nguavo: “Va ka mu sana nguavo Mukua Nazaleta.”*
Matota
^ Ni “vintongonosi.”
^ Ni “Mesiya; Ua ku Vuavesa.”
^ Talenu Mezi ava Lombolola.
^ Ni “vimbonge via lihatele na Mbetelema.”
^ Ni “na sintsa.”
^ Halumo lizi liaco lia tunda ku ciHevelu lia lomboloka “ku tuikilila.”
