Ku Hitila Muli Mateu 20:1-34
20 “Muomu Vuangana vua muilu, vunapu ngue vavenya ndzivo, ua hindukile cimene-mene na kuya mu ku tonda vantu va ku pange mu lihia liendi lia vinyu.
2 Mu nima ya ku lizivasana na vakua ku panga nguendi, ha litangua ava fueta denariu imolika, ua va tumine va kapange mu lihia liendi lia vinyu.
3 Ku vi 9 ola,* ua tuhukile naua, kaha ua muene vantu vakuavo ha citanda kavesi na vipanga,
4 ngeci ua va lekele nguendi: ‘Nenu yeni mu kapange mu lihia liange lia vinyu, kaha nji ka mi fueta kuliya na vipanga vienu.’
5 Ngeci vaze vakua ku panga vaile. Vavenya lihia lia vinyu, ua tuhukile naua ku vi 12 ola* na ku vi 15 ola,* ua ka laniene vakuavo naua.
6 Lua ku manusuila, ua tuhukile ku vi 17 ola,* ua ka uanene vantu vakuavo va nemana kavesi na kupanga ngeci ua vehuile nguendi: ‘Omo lia vika honi mu nemana hano litangua lia mutuntu ca ku hona vipangi?’
7 Va kumbuluile nguavo: ‘Muomu uahi na tu hana vipangi.’ Ngeci ua va lekele nguendi: ‘Nenu yeni mu kapange mu lihia liange lia vinyu.’
8 Mu lia kele na ku lahuka litangua, vavenya lihia lia vinyu ua lekele mukua ku mu niungila viuma nguendi: ‘Sana vose vakua ku panga linga u va fuete, putukila kuli vaze va ku manusuila ku tuala kuli vaze va na livangele.’
9 Mu vezile vaze va putukile ku panga ku vi 17 ola, nkala muntu va mu fuetele denariu imolika.
10 Ngeci mu va hetele vaze vakua ku panga va kulivanga, va singaniekele nguavo fueto yavo ipua ya kama ku hiana ya vakuavo, vunoni navo nkala muntu va mu futele denariu imolika.
11 Mu va tambuile fueto yavo, va putukile ku linienieta kuli vavenya lihia,
12 nguavo: ‘Ava vamala va ku manesela va na panga lika ola imo, vutuhu ngoco, una va hana fueto imolika netu tua fuitangana litangua lia mutuntu mu mutana?’
13 Ngeci ua kumbuluile umo uavo nguendi: ‘Ove mukuetu, ka nja ku lingile vuhenge na vumo vuahi. Ka ua lizivasanene nange ku ku fueta denariu imo lika?
14 Ambata fueto yove uye. Nji tonda ku hana ou ua ku manusuila, fueto ya kupua hamo na yove.
15 Vuno ka citava nji pangese viuma viange muose-omo mu nji na zange? Ni uli na cipululu* muomu nji na va lingila via cili?’
16 Ngoco vene vaze va ku manesela va kapua va ku livanga, vaze va ku livanga va kapua va ku manesela.”
17 Mu va kele na ku kanduka ku Yelusalema, Yesu ua sanenene vandongesi vendi 12 ku mukulo, kaha mu njila ua va lekele nguendi:
18 “Halakanenu! Tuli na kuya ku Yelusalema, vunoni Muana muntu va ka mu hana mu mavoko a vakuluntu va vasasendote na kuli vakua kusoneka. Va ka mu sompesa na ku mu tomena kutsa.
19 Kaha va ka mu hana mu mavoko a vakua vifuti linga va ka mu tsope, ku mu veta makote, na ku mu tsihila ha citi; vunoni ha litangua lia mu citatu aka sanguka.”
20 Naye ya vana va Sembendeu uezile kuli Yesu na vana vendi va vamala, ua mu tsikamenene na ku mu vundila vimo viuma.
21 Ngeci Yesu ua muihuile nguendi: “Vika u tonda?” Ua mu kumbuluile nguendi: “Tavesa vana vange vavali va ka tumame umo ku livoko liove lia cilio, mukuavo ku livoko liove lia cimosue mu Vuangana vuove.”
22 Yesu ua mu kumbuluile nguendi: “Ka mu tantekeya viuma vimuli na ku vundila. Vuno mu hasa kunua ngandza i nji tonda kunua vuovuno ni?” Va mu kumbuluile nguavo: “Eyo tu hasa.”
23 Yesu ua va lekele nguendi: “Eyo mu hasa kunua ku ngandza yange vene, vunoni via ku tumama ku livoko liange lia cilio neli lia cimosue, ka via kele ku ndzili yange. Vihela viaco vinapu via vaze va na viukisila Tata.”
24 Ngeci vandongisi vakuavo 10, mu va vuile ngoco, va nyenguele cikuma na vaze vantsongo na muntu.
25 Vunoni Yesu ua va sanene na ku va leka nguendi: “Mua tantekeya nguenu, vamiangana veku sika vantu kuliya na cizango cavo, kaha vaze va kala na mpoko veku i pangesa mu ku zangamena vakuavo.
26 Vunoni yenu ka mua pandele kupua ngoco, muomu uose a tonda kupua ua kama hakati kenu, na pande kupua mukua ku mi pangela,
27 kaha uose a tonda kupua ua ku livanga ha kati kenu, na pande kupua ngamba yenu.
28 Na Muana muntu nendi, kezile mu ku mu pangela, vunoni uezile mu ku pangela vantu, na ku hana muono uendi, mu ku pua ndando linga a patule vavengi.”
29 Mu va tundile ku Yeliko, mbunga ya kama ya mu kavele.
30 Taleni! Ku mukulo ua njila kua tumamene tupuputa vavali, mu va vuile nguavo Yesu ali na ku hita, va mu tambakanene nguavo: “Muangana, Muana Ndaviti, tu vuileko cikeketima!”
31 Vunoni mbunga ya va tenukilile linga va holoke, vutuhu ngoco, vakevo va vuezeleleko ku tambakana nguavo: “Muangana, Muana Ndaviti tu vuileko cikeketima!”
32 Ngeci Yesu uemanene kaha ua va sanene na ku vehula nguendi: “Vika mu tonda nji mi lingile?”
33 Vaze tupuputa va mu kumbuluile nguavo: “Muangana, tonesa meso etu.”
34 Yesu ua va vuililile ngozi, ngeci ua va kuatele ha meso kaha haze vene va putukile kumona, mu nima yaco va mu kavele.
Matota
^ Mu ciNgelengu “ha ola ya mu 3.”
^ Mu ciNgelengu “ha ola ya mu 6.”
^ Mu ciNgelengu “ha ola ya mu 9.”
^ Mu ciNgelengu “ha ola ya mu 11.”
^ Mu ciNgelengu “liso liove lia lipi.”
