Ku Hitila Muli Mateu 21:1-46
21 Mu va hetele ku hiehi na Yelusalema vemanene mu Mbetefanje ha Muncinda ua Olivela, Yesu ua tumine vandongesi vendi vavali,
2 na ku va leka nguendi: “Yeni muimbo limuli na ku mona, kaha mu ka uana cimulu va na mu kutiliya na munendi ali ku mukulo uendi. Va zituleni na ku va neha kuno.
3 Nga ku kala umo a mihula, mu lekeni nguenu: ‘Muangana a va tonda.’ Vuasi-vuasi aka mi tavesa ku va neha.”
4 Evi via solokele linga a lipuisemo mezi a handekele kapolofeto nguendi:
5 “Lekeni muana ua mpuevo ua Siono nguenu: ‘Muangana uove ali na kuiza. Uapua ua ku konkama, na tumama ha cimulu, ha muana cimulu, uze ue kuambata vitenga.’”
6 Ngeci vandongesi vaile na ku ka linga muose mua va sikile Yesu.
7 Va mu nehelele uze cimulu na munendi, kaha valele vuzalo vuavo vua helu ha vimulu vaco, kaha Yesu ua tumameneho.
8 Vantu vavengi valele vizalo viavo via helu mu njila, vakuavoco va tetele mintango ya miti na kuyala mu njila.
9 Kaha mbunga ikuavo ya kele ha lutue naize ya kele na kuiza mu nima yendi, ya kele na ku tambeka nguayo: “Tua ku vundila, ovola Muana Ndaviti!* Ua vezika uze eza mu lizina lia Yehova! Tua ku vundila ove ua kala muilu, nguetu, muovole!”
10 Mua kovelele mu Yelusalema, vantu vose mu mbonge va putukile ku ningita nguavo: ‘Nkuma iyou?”
11 Mbunga ya tualeleho ku handeka nguayo: “Ikeye uze kapolofeto Yesu, ua ku Nazaleta ya ku Ngalileya!”
12 Omo Yesu ua kovelele mu tembele ua sekuile vose va kele na kulanda na ku landesela mu tembele. Kaha ua fulumikile vimesa via vakua ku landakana* vimbongo na vituamo via vakua ku landesa mavembe.
13 Ua va lekele nguendi: “Va soneka nguavo, ‘Ndzivo yange va ka i sana nguavo ndzivo ya vivundilo,’ vunoni muli na ku i puisa ndzivo ya vezi.”
14 Cikuavo naua tupuputa na vakua ku tenguka vezile kuli ikeye mu tembele, kaha ua va kanguisile.
15 Omo vakuluntu va vasasendote na vakua kusoneka va muene viuma via ku komouesa via lingile Yesu, kaha na vanike va vamala va tambakana mu tembele nguavo: “Tua ku vundila, ovola Muana Ndaviti,” va nyenguele mua kama
16 na kuihula Yesu nguavo: “Unevu vivali na ku handeka ava?” Ngeci ua va kumbuluile nguendi: “Eyo. Kanda mutande mezi ava handeka nguavo: ‘Una lingisa mu tunua tua vanike na tukeke mu tunde visangala’?”
17 Mu nima yaco, Yesu ua tundile mu mbonge na kuya ku Mbetaniya, kaha kukekuo kua ka koselele.
18 Ku cimene-mene mua kele na ku hiluka mu mbonge, ua vuile ndzala.
19 Kaha ua muene umo muti ua mukuyu ku mukulo ua njila, ngeci ua hitileko, vunoni ka uaneneko na vimo viahi, mefo lika. Ngeci ua u singile nguendi: “Ku tunda litangua lia lelo, kati ukeme naua vusuka.” Kaha haze vene, mukuyu uaco uomine.
20 Vandongesi mu va vi muene va likomokelele mua kama, nguavo: “Vati ou mukuyu u nomu cau, aha vene?”
21 Yesu ua va kumbuluile nguendi: “Nji mi leka vusunga nguange: “Nga mu kala na lutsilielo na ku takania kuahi, ka muka lingi lika evi vi nji na lingi ku muti ou, vunoni muka leka ou muncinda nguenu: “Zunduka aha, ya uka limbile mu cisali,’ ci ka lingika vene ngoco.
22 Nga mu kala na lutsilielo viuma viose vi mu vundila, mu ka vi tambula.”
23 Yesu mua kovelele mu tembele, vakuluntu va vasasendote na vakuluntu va vantu, vezile kuli ikeye mua kele na ku longesa, nguavo: “Na mpoko ika uli na ku linga evi viuma? Kaha iya na ku hana mpoko yaco?”
24 Yesu ua va kumbuluile nguendi: “Nange nji mihula vimo. Nga mu nji kumbulula, kaha nange nji mi leka na mpoko ika njili na ku linga evi viuma.
25 Mbatizimu ya Yoano kuiko ya tundile? Muilu ni ku vantu?” Vunoni va putukile ku handeka ha kati kavo nguavo: “Nga tu handeka nguetu ‘Ya tundile muilu,’ a handeka nguendi: ‘Amba honi omo lia vika ka mua mu tsilielele?’
26 Vunoni nga tu handeka naua nguetu, ‘Ya tundile ku vantu,’ tuli na liova lia mbunga, muomu vose va tsiliela nguavo Yoano ua puile kapolofeto.”
27 Ngeci va mu kumbuluile nguavo: “Yanini.” Kaha nendi nguendi: “Nga ngoconi, nange kanji mi leka kuiko nja uana mpoko ya ku linga evi viuma.
28 “Vika mu singaniekaho? Umo yala ua kele na vana vendi vavali. Ua ile kuli uze ua ku livanga nguendi: “Munange, lelo ya ka pange mu lihia lia vinyu.”
29 Muana ua mu kumbuluile nguendi, ‘Ku njiyiko,” vunoni mu nima ya ntsimbu ua liveyele, ngeci ua ile.
30 Ua ile naua ku muana ua mu civali na ku mu leka vize via lekele ua katete. Muana ua kumbuluile nguendi: ‘Njiya Tata,’ vunoni ka yileko.
31 Mu ku mona cenu, ha kati kava vana vavali, iya ua lingile cizango ca ise? Kaha nguavo: “Ua ku livanga.” Ngeci Yesu ua va lekele nguendi: “Nji mi leka vusunga nguange, vakua ku fuetesa lisimu na vikoyi* va ka livanga ku kovela mu Vuangana vua Njambi, ku hiana yenu.
32 Yoano uezile kuli yenu mu vuviuke, vutuhu ngoco ka mua mu tavele. Vunoni vakua ku fuetesa lisimu na vikoyi va mu tavele. Cipue mu mua muene via lingile, kasi ka mua liveyele na ku mu tava.
33 “Halakanenu cisimo cikuavo: Kua kele umo yala, ua limine lihia lia vinyu, kaha ua lizingilikile na citali. Ua hindililemo cina ca ku tikila vinyu na ku tunga ndzivo ya mukua kuniunga; kaha ua sile lihia kuli vakua ku lima na kuya vungendzi mu cifuti ceka.
34 Mu ya puileho ntsimbu ya kutia, ua tumine vangamba vendi kuli vakua kulima linga va ka hiange vusuka.
35 Vunoni vakua kulima va kuatele vaze vangamba, umo va mu pupile, mukuavo va mu tsihile, mukuavoco va muasangele mavue.
36 Ivene lihia ua tumine naua vangamba veka vavengi, ku hiana vaze va katete, vunoni va va lingile naua ngue muze mu va lingile vakuavo.
37 Ha ku manusuila, ua tumine honi munendi ua yala, nguendi: ‘Munangeni va ka mu singimika.’
38 Vunoni vakua kulima mu va muene munendi va lihandekesele ha kati kavo nguavo: “Ou ikeye suana. Tuyenu tu mu tsihe, linga tu sale na vusuana vuendi!’
39 Ngeci va mu kuatele, va mu mbilile ha mbandza ya lihia, na ku mu tsihilaho.
40 Kaha nga ivene lihia a keza, vati aka linga vaze vakua kulima?”
41 Va mu kumbuluile nguavo: “Aka va nongesa, muomu vali na mitima ya kuvihia. Kaha aka hana lihia liendi ku vakua kulima veka, vaze va kapua na ku mu hana vusuka, ha ntsimbu ya kutia.”
42 Yesu ua va lekele nguendi: “Nkuma ka mua tandele aa mezi? ‘Lize livue li va vianene vakua ku tunga likelio linapu livue lia seho lia mu mbango.* Yehova ikeye na vipuisamo, eci cinapu cuma ca cili cikuma ku meso etu.’
43 Ngeci mukemuo, nji mi leka nguange, Vuangana vua Njambi va ka mi nyekavuo na ku vuhana kuli vakua cifuti ceka, vaze vema vusuka vuavuo.
44 Cikuavo naua, muntu uose a kauila ha lino livue, aka sanyoka. Kaha uze i likauila, lika mu sanya.”
45 Vakuluntu va vasasendote mu vavuile visimo viendi, va nongonuene ngecize ali na ku handeka vakevo.
46 Vutuhu va tondele ku mu kuata,* va vuile liova lia mbunga, muomu mbunga ya mu muene kupua kapolofeto.
Matota
^ Mu ciNgelengu “Hozana.”
^ Ni “ku tolokala.”
^ Ni “vakua ku landesa mivila yavo.”
^ Mu ciNgelengu “linapu mutue ua mu mbango.”
^ Ni “ku mu kuta.”
