Ku Hitila Muli Mateu 22:1-46
22 Yesu ua va lekele visimo vikuavo nguendi:
2 “Vuangana vua muilu vunapu ngue umo muangana ua lingilile munendi ua yala cilika ca vulo.
3 Kaha ua tumine vangamba vendi, vaka sane vantu vaze va lanyene ku cilika, vunoni vantu vaco va vianene kuiza.
4 Ua tumine naua vangamba vendi vakuavo nguendi: ‘Yenu muka leke vaze va nji na lanyene nguenu: “Talenu! Nji na vuahesa laza viakulia, nji na tsihi vangombe, na vimuna vange va kuhindala kaha viuma viose nja vi viukisa laza, tuayenu ku cilika ca vulo.’”
5 Vunoni vantu va a lanyene va mu sembuluile, ou uaile ku lihia liendi mukuavo ku mingoso yendi;
6 vunoni vaze va lisupileko, vakuatele vangamba vendi va va vuisile ntsuamua* na ku va tsiha.
7 Ngeci muangana ua nyenguele cikuma, na ku tuma masualale vendi, linga vaka tsihe vaze va tsihile vangamba vendi na ku uemeka mbonge yavo.
8 Amba vuose ua lekele vangamba vendi nguendi: ‘Cilika ca vulo ca ku vuahesa laza, vunoni vantu va tuna lanyene ka va fuililile ku kalako.
9 Ngeci mukemuo, yenu mu vinjila vitunda mu mbonge, kaha lanyeni uose-ouo u mu uana, ku cilika ca vulo.’
10 Ngeci mukemuo, vangamba vendi vaile muaya vitapalo na ku lanya vose va va uanene, vantu va cili na vakua vupi; kaha hondo ya ku lingila cilika ca vulo ya sulile na vantu va va lanyene.
11 Vunoni omo muangana ua kovelele na ku talesesa vaze va lanyene, ua muene umo yala kesi na vuzalo vua cilika ca vulo.
12 Ngeci ua muihuile nguendi: ‘Kavusamba, vati una hasa ku kovela muno ca ku hona vuzalo vua vulo?’ Vunoni ikeye ka hasele ku mu kumbulula.
13 Kaha muangana ua lekele vangamba vendi nguendi: ‘Mu kutenu ku mavoko na ku mikono, na ku mu mbila mu milima ya ha mbandza, hakeho ha ka kala kulila cendi na kulisumanga ku mazo.’
14 “Muomu vavengi va va na lanya, vunoni vavandende va va na hangula.”
15 Kaha vaFaliseu vaile, na ku likuminya vati va mu uanena mulonga ku mezi endi.
16 Ngeci va tumine vandongesi vavo kuli ikeye hamolika na vakua cikota ca Helonde nguavo: “Mulongisi, tu tantekeya ngecize u mukua vusunga kaha ue ku longesa njila ya Njambi mu vusunga. Cikuavo naua, ka ue ku tonda ku kusangala ku vantu muomu ka ue ku tuala mana ku cifua ci veku solokelamo vantu.
17 Ngeci mukemuo tu leke: Mu kumona cove, citava ku fueta lisimu lia muntu ku muntu kuli Sezale ni kuahi?”
18 Vunoni Yesu ua tantekeyele visinganieka viavo via kuvihia, ngeci ua handekele nguendi: “Eni vakua civembulu, vika muli na ku njesekela?
19 Nji mueseni lumbongo lua lisimu.” Ngeci va mu nehelele denariu imolika.
20 Kaha ua vehuile nguendi: “Cihanga ceya na lizina lieya va na hakaho?”
21 Va kumbuluile nguavo: “Via Sezale.” Ngeci ikeye ua va lekele nguendi: “Fueteni via Sezale, kuli Sezale. Vunoni via Njambi, kuli Njambi.”
22 Mu va vuile ngoco va komokele cikuma, kaha va mu sile na kuya.
23 Ha litangua liaco, vaSanduseu vaze ve ku handeka nguavo cisangukilo ka ca keleko, vezile kuli ikeye na ku muhula nguavo:
24 “Mulongisi, Mosesa ua handekele nguendi: ‘Nga yala atsa ca ku hona vana, muanaye na pande kuambata mpueyendi linga a mu semeneko vana.’
25 Kua kele vamo vamala 7 va puile vamuanaye. Ua ku livanga uambatele mpuevo, vunoni ua tsile ca ku hona vana, kaha mpueyendi ua salele kuli ntsongo yendi.
26 Evi via solokele naua kuli uze ua mu civali na ua mu citatu, ngoco lika noho vose 7 va tsile.
27 Mu ku manusuila mpuevo uaco nendi ua tsile.
28 Ngeci mukemuo, mu va ka sanguka vaze 7, uze mpuevo akapua ueya? Muomu vose ua puileho laza mpueyavo.”
29 Yesu ua va kumbuluile nguendi: “Mu na sevuka, muomu ka mu tantekeya cipue Visoneka ni ndzili ya Njambi.
30 Muomu ha cisangukilo, vamala ka va kambata, cipue vampuevo ku somboka, va kapua ngue tungelo muilu.
31 Ku tuala ha cisangukilo ca vatsi, ka mua tandele via mi lekele Njambi, nguendi:
32 ‘Yange Njambi ya Avilahama na Njambi ya Isake na Njambi ya Yakomba’ ni? Ikeye kati Njambi ya vatsi, vunoni ya vaze vali na muono.”
33 Omo vivunga via vuile ngoco, via komokele mua kama ku longesa cendi.
34 Omo vaFaliseu va vuile nguavo na payesa vaSanduseu, va likunguluile.
35 Kaha umo uavo a tantekeya vuino masiko, ua muesekele nguendi:
36 “Mulongisi, lisiko lika lia kama ku hiana Masiko ose?”
37 Yesu ua mu kumbuluile nguendi: “‘Ua pande ku lema Yehova Njambi yove na mutima uove uose, na muono uove uose, na mana ove ose.’
38 Eli likelio lisiko lia kama cikuma kaha lia katete.
39 Kaha lia mu civali, lia kulifua nalio, likelio eli: ‘Ua pande ku lema mukueni, ngue mu ua lilema ove vavenya.’
40 Ha masiko aa avali, hakeho hemana Masiko ose na Visoneka via Vapolofeto.”
41 Yesu mua muene vaFaliseu va na likungulula, ua vehuile nguendi:
42 “Mu ku mona cenu, Kilistu ua pua muneya?” Va mu kumbuluile nguavo: “Muna Ndaviti.”
43 Ngeci ua vehuile nguendi: “Omo lia vika honi Ndaviti va mu huiminine ku mu tumbula nguendi Muangana? Muomu ua handekele nguendi:
44 ‘Yehova ua lekele Muangana uange nguendi: “Tumama ku livoko liange lia cilio, noho nji na haka vitozi vove, muintsi lia viliato viove.”’
45 Kaha nga Ndaviti ue ku mu tumbula nguendi Muangana, vati honi ua pua naua munendi?”
46 Vunoni na umo uahi ua hasele ku mu kumbulula. Tunde tangua lize, na umo ueka naua uahi, ua hasele ku mu suena mu ku muihula vimo.
Matota
^ Ni “ntsoni.”
