Ku Hitila Muli Mateu 23:1-39
23 Kaha Yesu ua handekele na vandongesi vendi nguendi:
2 “Vakua kusoneka na vaFaliseu va tumamaho laza ha citumamo ca Mosesa.
3 Ngeci mukemuo, viose vi va mileka vilingenu na ku viononoka, vunoni kati mu temunuine vilinga viavo, muomu ka ve kulinga vi ve ku longesa.
4 Veku kuta viteli via ku lema na ku vituika ha vitsili via vantu, vunoni vakevo ka ve kutava cipue ku vi saleka munye.
5 Viose vi ve ku linga, ve ku vi lingila linga va va mone ku vantu. Muomu ve ku hamesa vikasa via mezi vi ve kuzala ha maholo avo mu ku liniunga na ku lahesa vintsongo via vizalo viavo.
6 Va lema kukala ha vihela via vukama ku vilika na ku tumama ha vituamo via kulutue mu visinangonga,
7 na ku va meneka ha vitanda na ku va sana Lambi ku vantu.
8 Vunoni yenu kati va mi sane Lambi, muomu Mulongisi uenu umolika kaha enu muvose mu vamuanaye.
9 Cikuavo naua, kati mu sane na umo uahi hano ha mavu nguenu Tata, muomu Isuenu umolika kaha ua kala muilu.
10 Kati va mi tumbule vantuamena, muomu Ntuamena uenu umolika Kilistu.
11 Vunoni uze ua kama ha kati kenu, na pande kupua mukua ku mi pangela.
12 Muomu uose a lihaka ku vukama va ka mu kehesa kaha uose a likehesa va ka mu haka ku vukama.
13 “Ngongo yenu* enu vakua kusoneka na vaFaliseu, mu vakua civembulu! Muomu mue ku zikinina vantu ku Vuangana vua muilu, vunoni enu ka mu tondo ku kovelamo kaha ka mue ku tavesa vaze va tonda va kovele.
14 ——
15 “Ngongo yenu enu vakua kusoneka na vaFaliseu, mu vakua civembulu! Muomu mue ku hitangana muaya visali na vintunda mu kualuluisa muntu umo kaha nga naluluka mue ku mu puisa muana Ngehena mu ku mi hiana enu luvali.
16 “Ngongo yenu enu vantuamena va vupuputa. Mue ku handeka nguenu ‘Nga muntu a lisingila ha tembele vitanga viahi; vunoni nga a lisingila ha olu ya mu tembele a kala na mulonga.’
17 Eni viheve na tupuputa! Vika via hiana seho, olu ni tembele ize ye ku lingisa olu kupua ya kulela?
18 Cikuavo naua, mue ku handeka nguenu, ‘Nga muntu a lisingila ha mutula vitanga viahi, vunoni nga a lisingila ha vuana vuli ha mutula a kala na mulonga.’
19 Eni tupuputa! Vika via seho, vuana ni mutula ue ku lelesa vuana vuaco?
20 Ngeci mukemuo, uose a lisingila ha mutula na lisingila hali ukeuo na viuma viose viliho.
21 Kaha uose a lisingila ha tembele na lisingila hali ikeyo na hali Uze ua kalamo.
22 Cikuavo naua, uose a lisingila ha lilu a lisingila ha cituamo ca Vuangana ca Njambi na hali Uze ua tumamaho.
23 “Ngongo yenu enu vakua kusoneka na vaFaliseu, mu vakua civembulu! Muomu mue ku hana cimo ku likumi ca oletela, endulu na kominyu, vunoni mue ku sembulula viuma via seho via ku masiko ngeci mua vuoloke, nkeke, na lutsilielo. Evi vikevio tele via pandele ku vi linga, ca ku hona ku sembulula vikuavo.
24 Eni vantuamena va vupuputa, mue ku zekula kalongolo ua mundende* vunoni mue ku lehula kamelu!
25 “Ngongo yenu enu vakua kusoneka na vaFaliseu, mu vakua civembulu! Muomu mue kukusa ha mbandza ya ngandza na ya lilonga, vunoni mukati mua sula lizangamena* na ku hianesamo masungu.
26 Ove kaFaliseu ua kapuputa, livange kukusa mukati ka ngandza na lilonga, linga na ha mbandza hapue ha kulela.
27 “Ngongo yenu enu vakua kusoneka na vaFaliseu, mu vakua civembulu! Muomu mua lifua na vihilo via ku toka, vize vie ku soloka kuvuaha helu vunoni mukati mua sula vitsiha via vantu na mazilo a vifua viose.
28 Na vuno vene, ha mbandza mue ku soloka ngue mu vakua vuviuke vunoni mukati mua sula na civembulu na ku pokola masiko.
29 “Ngongo yenu enu vakua kusoneka na vaFaliseu, mu vakua civembulu! Muomu mue kutunga vihilo via vapolofeto na ku vuahesa ha vimbumbo via vakua vuviuke,
30 na ku handeka nguenu, ‘Nga tua yoyele ku matangua a vakukuetu nga ka tua lipandakanene navo mu kutsiha vapolofeto.’
31 Vunoni muli na kulihisa yenu vavenya nguenu, mu vana va vaze va tsihile vapolofeto.
32 Ngeci mukemuo, manusulenu vi va putukile vakukuenu.
33 “Enu vana va mambuambua, vati muka tina ku ku sompesa ca Ngehena?
34 Ngeci mukemuo, njili na ku mi tuma vapolofeto, vakua mana na valongisi. Vamo muka va tsiha na ku va sukika ha viti, vakuavo muka va veta makote mu visinangonga vienu na ku va luisa mbonge ku mbonge,
35 linga maninga a vakua vuoloke ve kutsa ha mavu, aka kale hali yenu, tunde ha maninga a mukua vuoloke Avele kutuala ha maninga a Zakaliya muana Mbalakiya uze u mua tsihilile ha kati ka tembele na mutula.
36 Nji mi leka vusunga nguange, viose evi vikeza helu lia uno muyati.
37 “Yelusalema, Yelusalema, mukua ku tsiha vapolofeto, na kuasa mavue vaze va ve kumu tuma. Vintsimbu via vingi nja tondele ku kungulula vana vove, ngue kasumbi mue ku kungulula tupiyo vendi mu mavava! Vunoni ka ua tavele.
38 Tala! Ndzivo yove isala mu ngundu.
39 Muomu nji ku leka nguange, ka uka nji mono naua noho ha uka handekela nguove, ‘ua vezika uze eza mu lizina lia Yehova!’”
