Ku Hitila Muli Mateu 24:1-51
-
CITANTEKEYESO CA KUSOLOKA CA KILISTU (1-51)
24 Kaha omo Yesu ua kele na ku tuhuka mu tembele, vandongesi vendi vaile kuli ikeye, mu ku mu lekesa vindzivo via mu tembele.
2 Ua va lekele nguendi: “Mua mono viose evi? Nji mi leka vusunga nguange, hano ka ha ka sala livue na limo liahi helu lia likuavo. Ose vaka a uisila ha mavu.
3 Mua tumamene ha Muncinda ua Olivela, vandongesi vendi vezile kuli ikeye kua likaliavo, na ku muihula nguavo: “Tu leke, ntsimbu ika viuma evi vi ka lingika? Kaha citantekeyeso cika ci ka tu kuasa ku nongonona ku soloka cove* na kukotoka ca mavu?*
4 Yesu ua va kumbuluile nguendi: “Zangamenu linga na umo uahi ami hungumune,
5 muomu vavengi va keza mu lizina liange nguavo, ‘Yange Kilistu,’ kaha va ka hungumuna vavengi.
6 Mu kevua vindzita na mizimbu ya vindzita. Vunoni kati mu kevue liova, muomu evi viuma via pande ku soloka, vunoni ku kotoka ci ci li kanda.
7 “Muomu cifuti ci ka katukila cifuti na vuangana vu ka katukila vuangana, kaha ku ka kala ndzala na mandunduma ku vihela via ku liseza-seza.
8 Viose evi vi kapua vuputukilo vua visoti.
9 “Vantu va ka mi yandesa na ku mi tsiha, kaha va ka mi zinda kuli vakua vifuti viose, omo lia lizina liange.
10 Cikuavo naua, vavengi va ka suntsuka na ku lienda vungungu umo na mukuavo, na ku lizinda umo na mukuavo.
11 Ku ka kala vapolofeto va makuli vavengi, kaha va ka hungumuna vavengi;
12 Omo lia ku livuezelela ca vakua ku pokola masiko, cilemo ca vavengi ci ka tontola.
13 Vunoni uze a kolesa na ku ntsongo, ikeye a kovoka.
14 Kaha ou muzimbu ua cili ua Vuangana, va ka uambulula mu mavu ose, linga upue vukaleho kuli vakua vifuti viose, amba vuose ku kotoka ci keza.
15 “Ngeci mukemuo, omo mu ka mona cuma ca ku zuala cize ce ku neha ku nonga, ca handekele kapolofeto Ndaniele, cinemana ha cihela ca ku lela (mukua ku tanda, a nanguke),
16 Vaze vali mu Yundeya va putuke ku tinina ku mincinda.
17 Kaha muntu ali mu ndzivo, kati a suluke mu ku ka nona vitenga mu ndzivo,
18 na muntu ali mu lihia, kati aka hiluke ku ndzivo mu ku kambata cizalo ceni ca helu.
19 Ngongo ya vaze va kemita na kuamuesa ku matangua aco!
20 Tualelenuho ku vundila linga kutina cenu kati ci ka kaleko mu ntsimbu ya cisika cipue lia Sapalalo;
21 Muomu ku ka kala lamba ya kama ya ku linga kanda ici kaleko tunde ha kutanga ca mavu, kaha nga ina hiti, ka ika kalako naua.
22 Mua vusunga, nga matangua aco ku a kehesa kuahi, nga na umo uahi a kovoka. Vunoni omo lia vaze va va na hangula, matangua aco va ka a kehesa.
23 “Nga umo aka mi leka nguendi, ‘Kilistu uno ali kuno,’ ni nguendi, ‘Ali kuze’ kati mu ka mu tave.
24 Muomu ku keza vaKilistu va makuli na vapolofeto va makuli, kaha va ka linga vitantekeyeso via kama na vikomoueso mu ku sevuisisa, nga citava, cipue vene vaze va ku hangula.
25 Talenu, nji na mi lunguila vua lumo.
26 Ngeci mukemuo, nga vantu va mi leka nguavo, ‘Talenu! ali mu mpambo,’ kati mu ka yeko, ni nguavo ‘Ali mu hondo ya mukati’ kati mu ka va tave.
27 Muomu ngeci mua muhiato mu ue ku hiatuila ku vucelo, vunoni ceke caco ce ku soloka na ku vutokelo, ku soloka ca Muana muntu naco mukemuo mu ci kafua.
28 Kuose kua kala civimbi, kukekuo ku va ka likunguluila vihungu.*
29 “Mu nima ya lamba ya ku matangua aze, litangua li ka zivala na ngonde ka ika teteka naua. Kaha vintongonosi vi kaua muilu, na ndzili ya mu melu ika lininganga.
30 Citantekeyeso ca Muana muntu ci ka soloka muilu, na miyati yose ya ha mavu ika muesa vusiua, kaha va ka mona Muana muntu eza ha maselua na ngolo na vumpahu vua kama.
31 Kaha aka tuma tungelo vendi na lizi lia kama lia luneta, linga va ka kungulule vaze va ku hangula mu vimbango viuana via luhundzi, tunde ku ntsongo imo ya lilu ku tuala ku ntsongo ikuavo.
32 “Lilongesenu vimo ku cisimo ca muti ua mukuyu: Nga tumintango tu putuka ku sokolokela na mefo a putuka ku tuikilila, mu tantekeya ngecize ntondue ili mu hiehi.
33 Na vuno vene, omo mu ka mona viuma viose evi, tantekeyenu ngecize ali mu hiehi, ku mbelo vene.
34 Nji mi leka vusunga nguange, eci cisemunuino ka ci kahua, ku vanga viuma viose evi vi na soloka.
35 Melu na mavu vi ka hita, vunoni mezi ange ka aka hiti.
36 “Ku tuala ha litangua na ola ize na umo uahi a vi tantekeya, cipue tungelo va muilu, ni Muana, vunoni Tata lika.
37 Muomu ngue mua fuile matangua a Noa, mukemuo mu ci kafua na ha kusoloka ca Muana muntu.
38 Muomu ku matangua aze tele Livazi kanda lize, vantu valile, vanuine, vambatele, va sombokele, na ha litangua lia kovelele Noa mu vuato.
39 Ka va tualeleko mana, noho Livazi liezile kaha lia va kombele vose. Na kusoloka ca Muana muntu mukemuo mu ci kafua.
40 Vamala vavali va ka kala mu lihia, vunoni umo va kaya nendi, mukuavo va ka mu seza.
41 Vampuevo vavali va katua vunga hamo lika, vunoni umo va kaya nendi, mukuavo va ka mu seza.
42 Ngeci mukemuo, tualelenuho ku vingila, muomu ka mu tantekeya litangua lia keza Muangana uenu.
43 “Tantekeyenu ngecize: Nga vavenya ndzivo na zivuka ntsimbu* yeza muizi, a tualelelaho ku vingila, ka tavesa va punde mu ndzivo yendi.
44 Na vuno vene, liviukisilenu vua lumo, muomu ha ola ize ka mu singanieka, hakeho ha keza Muana muntu.
45 “Iya mpundu mukuamanda ua lutsilielo na mana, ya na hangula sukuluendi mu ku niunga vakua ku panga ku ndzivo yendi na ku va hana viakulia ha ntsimbu i na pande?
46 Na vezika mukuamanda uaco, nga mua ka hiluka sukuluendi a mu uana ali na ku lingamo!
47 Cili vene nji mi leka nguange, aka mu hangula linga a mu niungile vikuata viendi viose.
48 “Vunoni nga mukuamanda uaco, a handeka mu mutima nguendi, ‘Sukulu ali na ku simbula,’
49 kaha a putuka kuveta vakuavo vangamba na kulia na kunua hamo na vipenda,
50 sukuluendi a keza ha litangua lize ka mu lavelelele, na ola ize ka tantekeya.
51 Kaha aka mu hana kasitiku ka kama na ku mu haka hamo na vakua civembulu. Kuze kukekuo ku ka kala kulila na ku lisumanga ku mazo.
