Ku Hitila Muli Mateu 25:1-46
25 “Vuangana vua muilu citava ku vu setekesa na vahumbe* 10 vambatele vindeya viavo na kuya mu ku sesa sandungi.
2 Vatanu ha kati kavo va puile viheve, vakuavo vatanuco va puile vakua mana.
3 Muomu vaze va puile viheve, vambatele lika vindeya vunoni ka vambatele mazi.
4 Vunoni vaze vakua mana vambatele mazi mu vinjava viavo hamolika na vindeya.
5 Omo sandungi ua kele na ku simbula, vose va putukile ku nenguka na ku uila mu tulo.
6 Kaha mukati ka vutsiki, va vuile muntu a tambeka nguendi: ‘Sandungi na hete! Yenu mu ka liuane nendi.’
7 Kaha vaze vahumbe vose va katukile na ku viukisa vindeya viavo.
8 Vaze viheve va lekele vakua mana nguavo: ‘Tu haneniko amo mazi, muomu vindeya vietu vitonda kuzima.’
9 Vakua mana va va kumbuluile nguavo: ‘Nga tu mi hanako, halumo mazi ka apumo. Ngeci mukemuo, yenu kuli vaze vakua ku a landesa linga mu ka lande.’
10 Kaha mu vaile na kulanda, sandungi uezile. Vaze vahumbe va liviukisile laza, va kovelele nendi mu cilika ca vulo kaha va patele ku mbelo.
11 Munima yaco, vaze vakuavo vatanu navo vezile nguavo: ‘Muata, muata, tu sokololueniko!’
12 Vunoni ikeye ua va kumbuluile nguendi: ‘Nji mi leka vusunga nguange, ka nji mi tantekeya.’
13 “Ngeci mukemuo, tualelenuho ku vingila muomu ka mu tantekeya litangua cipue ola.
14 “Citava ku vu setekesa naua na yala ua kele na ku liviukisila vungendzi vua kuya ku cifuti ceka, kaha ua sanene vangamba vendi na ku va sila vupite vuendi.
15 Ua hanene vitalentu vitanu kuli ua kulivanga, vivali kuli uamu civali kaha imo kuli ua mu citatu, kuliya na vuhasi vuavo. Kaha uaile vungendzi.
16 Kaha ha ntsimbu oyo vene, uze ua tambuile vitalentu vitanu uaile na ku linga mingoso, kaha ua nganyalele vitalentu vikuavo vitanu.
17 Na uze naua ua tambuile vivali, ua nganyalele vikuavo vivali.
18 Vunoni uze ua tambuile imolika, uaile na ku hinda cina na ku sitika vimbongo via sukuluendi.
19 “Munima ya ntsimbu ya kama, sukulu ua vaze vangamba ua hilukile na ku va sana mu ku tanda navo vimbongo viendi.
20 Ngeci uze ua tambuile vitalentu vitanu, ua sueneneko na ku neha vitalentu vikuavo vitanu nguendi: ‘Sukulu, ua nji hanene vitalentu vitanu, tala, nji na nganyalelaho vikuavo vitanu.’
21 Sukuluendi ua mu lekele nguendi: ‘Una lingi vuino, u ngamba ua cili kaha u mukua kuononoka! U nononoka ku viuma via vindende, nji ka ku kundika viuma via vingi. Tuaya u viukilile hamo na sukuluove.’
22 Kaha uze ua tambuile vitalentu vivali, ua sueneneko na ku handeka nguendi: ‘Sukulu, ua nji hanene vitalentu vivali, tala, nji na nganyalelaho vikuavo vivali.’
23 Sukuluendi ua mu lekele nguendi: ‘Una lingi vuino, u ngamba ua cili kaha u mukua kuononoka! U nononoka ku viuma via vindende, nji ka ku kundika viuma via vingi. Tuaya u viukilile hamo na sukuluove.’
24 “Mu ku manusuila, uze ngamba ua tambuile talentu imolika ua sueneneko na ku handeka nguendi: ‘Sukulu, nji zivuka nguange u muntu ua mukalu, ue kutia haze ka ua kunine na ku kungulula haze ka ualelekelele.
25 Ngeci nja vuile liova kaha nja ka suekele talentu yove mu livu. Tala, talentu yove eyi.’
26 Sukuluendi ua mu kumbuluile nguendi: ‘U ngamba ua ku vihia, u cilenda. Iya nguendi nje kutia haze ka nja kunine na ku kungulula haze ka nja lelekelele?
27 Nga ua hanene vimbongo viange kuli vakua ku tulika vimbongo, kaha mu nji na hiluka nga nji na ku vitambula na kakondueso.
28 “‘Ngeci mukemuo, mu tambulenu talentu yendi, i hanenu kuli uze ali na vitalentu 10.
29 Muomu uose uze ali navio, va ka mu vuezelela vikuavo kaha aka kala na viavingi. Vunoni uze kesi navio cipue vene vize viali navio va ka munyekavio.
30 Kuatenu ou cilinge ca ngoco na ku mu mbila mu milima hambandza. Kukekuo ku ka kala kulila cendi na ku lisumanga ku mazo.’
31 “Omo Muana muntu a keza mu vumpahu vuendi na tungelo vose hamolika nendi, aka tumama ha citumamo cendi ca vumpahu.
32 Vakua vifuti viose, va ka vakunguluila ku meso endi kaha aka tepesa cimo civunga ca vantu ku cikuavo, ngue omo kanyungi ue ku tepesa vampanga ku vampembe.
33 Aka haka vampanga ku livoko liendi lia cilio, vunoni vampembe ku cimosue.
34 “Kaha Muangana aka handeka na vaze vali ku cilio nguendi: ‘Tuayenu, enu va na vezikisa Tata, mu suane Vuangana vu va mi viukisila tunde ha kutanga ca mavu.
35 Muomu nja kele na ndzala, kaha yeni mua nji hanene viakulia; nja kele na mpuila kaha yeni mua nji hanene via kunua. Nja puile nji ngendzi kaha yeni mua nji tambuile na vuhuanga;
36 ka nja kele na vuzalo kaha yeni mua nji zikile. Nja vavalele kaha yeni mua nji nyungile. Nja kele mu kamenga kaha yeni mua ileko mu ku nji meneka.’
37 Kaha vakua vuviuke va ka muihula nguavo: ‘Muangana, tangua lika tua ku muene mu ndzala kaha tua ku hana viakulia? Ni tangua lika tua ku muene na mpuila kaha tua ku hana mema?
38 Tangua lika ua puile u ngendzi kaha tua ku tambula? Ni tangua lika ua kele mu muzi kaha tua ku hana via kuzala?
39 Tangua lika tua ku muene u vavala ni uli mu kamenga kaha tuayako mu ku kumeneka?’
40 Kaha Muangana aka va kumbulula nguendi: ‘Nji mi leka vusunga nguange, viose vi mua lingilile umo uava vantsongo vange va vandende, mua vi lingile kuli yange.’
41 “Kaha aka leka vaze vali ku cimosue cendi nguendi: ‘Tundenuomu, enu va va na singi, yenu mu tuhia tuayaye tu va viukisila Ndiavu na tungelo vendi.
42 Muomu nja kele na ndzala, vunoni ka mua nji hanene viakulia kaha nja kele na mpuila vunoni ka mua nji hanene mema akunua.
43 Nja puile ngendzi, vunoni ka mua nji tambuile na vuhuanga; nja kele mu muzi, vunoni ka mua nji hele vizalo; nja vavalele kaha nja kele mu kamenga, vunoni ka mua nji tualele mana.’
44 Kaha navo va ka handeka nguavo: ‘Muangana, tangua lika tua ku muene na mpuila, mu vungendzi, mu muzi, u vavala ni mu kamenga kaha ka tua ku pangelele?’
45 Kaha ikeye aka va kumbulula nguendi: ‘Mua vusunga nji mi leka nguange, mu ku linga kamua lingile viuma viaco kuli umo uava va vandende, ka mua vi lingile kuli yange.’
46 Kaha ava vakaya ku ku nonga cayaye,* vunoni vakua vuviuke ku muono uayaye.”
