Ku Hitila Muli Mateu 26:1-75
-
Vasasendote va likuminya kutsiha Yesu (1-5)
-
Yesu va mu muanyena mazi a ndando ya kama (6-13)
-
Paskua ya ku manusuila na ku muenda vungungu (14-25)
-
Kutumbika Mulalelo ua Muangana (26-30)
-
Yesu a leka Petulu nguendi uka nji viana (31-35)
-
Yesu a vundila mu Ngetesemane (36-46)
-
Yesu va mu kuata (47-56)
-
Va mu sompesa ku meso a Mpunga (57-68)
-
Petulu a viana Yesu (69-75)
26 Yesu mua manesele ku handeka evi viuma viose, ua lekele vandongesi vendi nguendi:
2 “Tantekeyenu ngecize kua lisupu matangua avali ku Paskua, kaha Muana muntu va ka mu hana ku mavoko a vantu, linga va ka mu sukike ha citi.”
3 Kaha vakuluntu va vasasendote na vakuluntu va vantu va likunguluilile mu citali ca sasendote ua kama, lizina liendi Kayafase.
4 Va likuminyine ku pangesa amo makuli, linga va kuateleho Yesu na ku ka mu tsiha.
5 Vunoni va kele na ku handeka nguavo: “Kati tu ka lingemo ha litangua lia cilika, kutina vantu va ka linga mbuanja.”
6 Yesu mua kele mu Mbetaniya, mu ndzivo ya Simone mukua mbumba,
7 ntsimbu tele ali na kulia,* umo mpuevo uezile kuli ikeye na njava ya mazi a alambastru, a ndando ya kama na vueko vua cili, kaha ua suenene kuli Yesu na ku putuka ku mu muanyena mazi aco ku mutue.
8 Vandongesi vendi mu va vi muene, va nyenguele na ku handeka nguavo: “Vika ali na ku vihisila aa mazi?
9 Nga va na a landesele na ndando ya kama na ku hana vimbongo viaco ku vihutu.”
10 Yesu mua vi tantekeyele ua va lekele nguendi: “Vika mu pindisila ou mpuevo?
11 Vihutu muli navo ntsimbu yose, vunoni yange ka mu kakala nange ntsimbu yose.
12 Aa mazi a vueko vua cili ana muanyena ha muvila uange, na u viukisila ku nji tsinda.
13 Nji mi leka vusunga nguange, kuose ku va kambuluila muzimbu ua cili mu mavu ose, via na lingi ou mpuevo va ka vi handeka mu ku mu vulukilaho.”
14 Kaha umo ua vaze 12, Yundasa Iskaliota, ua ile kuli vakuluntu va vasasendote
15 na ku va leka nguendi: “Vika mu nji fueta linga nji miendeleye vungungu?” Ngeci va mu tomenene vimbongo 30 via palata.
16 Tunde haze, ua putukile ku tonda vukovelelo vua cili vua ku muenda vungungu.
17 Ha litangua lia ku livanga lia cilika ca Mbolo ya ku Hona Cimbaluila, vandongesi vezile kuli Yesu nguavo: “Kuiko u tonda tu ka ku viukisile Paskua?”
18 Ua va kumbuluile nguendi: “Yenu mu mbonge kuli Ngandi mu ka mu leka nguenu: Mulongisi nguendi: “Ntsimbu iva nji hanguila ili mu hiehi; Nja ku hitisila Paskua na vandongesi vange, ku ndzivo yove.”’”
19 Ngeci vandongesi va lingile ngue mua va lekele Yesu na ku viukisa Paskua.
20 Ku ntsimbu ya cinguezi, ua kele ku mesa na vandongesi vendi 12.
21 Mu va kele na kulia, ua handekele nguendi: “Nji mi leka vusunga nguange, umo ueni aka njenda vungungu.”
22 Mezi aco ava vuisile vusiua, ngeci muntu ku muntu ua putukile ku muihula nguendi: “Muangana, kati yange ni?”
23 Ua va kumbuluile nguendi: “Uose a haka livoko hamolika nange mu lilonga, ikeye aka njenda vungungu.
24 Cili vene Muana muntu ali na kuya, ngue mu va soneka ku tuala hali ikeye, vunoni ngongo ya muntu uze enda Muana muntu vungungu! Ca cili nga muntu uaco ka semukile.”
25 Yundasa uze ue ku muendele vungungu ua kumbuluile nguendi: “Lambi, nkuma yange?” Yesu ua mu lekele nguendi: “Yove vavenya una handekamo.”
26 Kaha omo va tualeleho kulia, Yesu ua nonele mbolo. Mu nima ya ku i vezikisa, ua i pazuile na ku hana ku vandongesi, nguendi: “Uaheni, lienu. Eyi yemanena muvila uange.”
27 Kaha ua nonele naua ngandza, ua santselele na ku i hana kuli vakevo nguendi: “Nuenumo mu vose.
28 Muomu eyi vinyu yemanena ‘maninga ange a litavasiano,’ aze aka muanya mu ku konekela vipi via vantu vavengi.
29 Vunoni nji mi leka nguange, yange ka nji kanu naua vinyu, na ha litangua lize li nji kanua hamo nenu vinyu via viha mu Vuangana vua Tata.”
30 Mu va manusuile kuimba miaso, vaile ku Muncinda ua Olivela.
31 Yesu ua va lekele nguendi: “Mu vose mu suntsuka, mu mu mona viuma vi va nji linga lelo. Muomu va soneka nguavo: ‘Nji ka tsiha kaniungi kaha vampanga va ka lisanduoka.’
32 Vunoni mu nima ya ku sanguka cange, nji ka tuama ku Ngalileya.”
33 Vunoni Petulu ua mu kumbuluile nguendi: “Ambe nga vakuetu vose va ka suntsuka omo liove, ange ka nji ka suntsuka!”
34 Yesu ua mu lekele nguendi: “Nji ku leka vusunga nguange, ku vutsiki vua lelo, ntsimbu kanda ndemba a tambeke, unji viana lutatu.”
35 Petulu ua mu lekele nguendi: “Ka nji ku viana. Ambe kutsa njasa kutsa nove.” Kaha vandongesi vose navo mu va handekele.
36 Yesu uezile ku cihela ci va luka nguavo Ngetesemane, kaha ua lekele vandongesi vendi nguendi: “Tumamenu hano, ntsimbu njiya kuze mu ku vundila.”
37 Ngeci uaile na Petulu na vana vavali va Sembendeu, ua putukile kuivua vusiua na ku lisosomua mua kama.
38 Mu nima yaco, ua va lekele nguendi: “Njili mu vusiua vua kama, mu nji zivila ngue njitse. Kalenu hano na ku tualelelaho ku vingila hamo nange.”
39 Kaha mua suenene kamandende ha lutue ua tsikamene na ku vundila nguendi: “Tata, nga citava, eyi ngandza i hitile ku lahako nange. Vunoni ci lingike cizango cove, kati cange.”
40 Ua hilukile ku vandongesi vendi, vunoni ua va uanene va na kosa, ngeci uehuile Petulu nguendi: “Nkuma ka mua hasele ku tualelelaho ku vingila, ambe mu ola imolika?
41 Tualelenuho ku vingila na ku vundila, linga kati mu kovele mu ceseko. Cili vene, mutima* u tonda, vunoni muvila* una zeye.”
42 Kaha ua ile naua lua mu civali, mu ku vundila, nguendi: “Tata nga ka citava eyi ngandza i hitile ku lahako kuvanga njinuemo, ci lingike cizango cove.”
43 Mua hilukile, ua ku va uanene va na kosa naua, muomu meso avo a lemene na tulo.
44 Ngeci ua va sile naua, na kuya mu ku vundila lua mu citatu. Ua vundilile naua viuma vize vene.
45 Mu nima yaco, ua hilukile naua ku vandongesi vendi na ku va leka nguendi: “Ha ntsimbu ya kufua ngeci, eni mu na kosa na ku huima! Talenu! Ola i napumo linga muana Muntu va muende vungungu, na ku mu hana ku mavoko a vakua vupi.
46 Katukenu, tuyenu. Talenu! Mukua ku njenda vungungu ali mu hiehi.”
47 Kaha mua kele na ku handeka vene, Yundasa, umo ua vaze 12, uezile hamo na civunga ca kama, cambetele mikuale na vimbueti. Vantu vaco va va tumine kuli vakuluntu va vasasendote na vakuluntu va vantu.
48 Mukua ku muenda vungungu, ua va hanene citantekeyeso, nguendi: “Uose i nji ka tsemba ikeye vene. Citava mu ka mu kuate na kuya nendi.”
49 Ngeci ua sungamene vene hali Yesu na ku handeka nguendi: “Lambi, uli vuino?” Kaha ua mu tsembele.
50 Vunoni Yesu ua mu lekele nguendi: “Ove mukuetu vutumbe vuka vu na ku neha kuno?” Mu nima yaco, vaze vezile navo va sueneneko na ku mu kuata, kaha vaile nendi.
51 Vunoni umo ua vaze va kele na Yesu, ua somuene mukuale ueni, na ku vatula lituitui lia umo ngamba ua sasendote ua kama.
52 Mu nima yaco, Yesu ua mu lekele nguendi: “Hiluisa mukuale mu cindalu cauo, vose va ka kuata ku mukuale, va ka nonga ku mukuale.
53 Mu ku mona cove, nkuma ka nji hasa ku vundila kuli Tata linga a nji tume vivunga 12 via tungelo mu ntsimbu ino vene?
54 Vunoni nga nji lingamo, vati vi ka lipuisamo Visoneka via muesa ngecize viuma viaco via pande ku soloka?”
55 Ha ntsimbu ize, Yesu ua lekele mbunga nguendi: “Vuno mu neza mu ku nji kuata na mikuale na vimbueti ngue mu neza mu ku kuata muizi? Tangua na tangua nja kele na ku tumama mu tembele mu ku longesa, vunoni ka mua nji kuatele.”
56 Vunoni viose evi vi na soloka linga viuma vi va sonekele vapolofeto vi lipuisemo.” Kaha vandongesi vose va mu sevunukile na ku tina.
57 Kaha vaze va kuatele Yesu, va mu tualele kuli sasendote ua kama Kayafase, kuze ku va likunguluilile vakua ku soneka na vakuluntu.
58 Vunoni Petulu ua kele na ku mu kavela ha lahako cikuma, noho ua ka hetele vene na ku citali ca sasendote ua kama. Ngeci ua kovelele mu citali na ku tumama hamo na vangamba linga a mone vati vienda viuma.
59 Vakuluntu va vasasendote na Mpunga* yose, va kele na ku tonda vukaleho vua makuli, linga va uane ha ku mu tsihila.
60 Vunoni ka va uanene na vimo viahi via ku mu vangeya, vutuhu kua kele vakaleho va makuli vavengi. Mu nima ya ntsimbu kuezile vavali
61 kaha va handekele nguavo: “Ou yala ua handekele nguendi, ‘Nji hasa ku puzula tembele ya Njambi na ku i tunga mu matangua atatu.’”
62 Ngeci sasendote ua kama ua katukile na ku muihula nguendi: “Na vimo vi u kumbululako viahi? Ka ua zivile vi vali na ku ku vangeya ava vantu?”
63 Vunoni Yesu ua holokele kulu. Ngeci sasendote ua kama ua handekele nguendi: “Nji ku singisa hali Njambi ua muono, utu leke nga yove u Kilistu, Muana Njambi!”
64 Yesu ua mu kumbuluile nguendi: “Yove vavenya una handekamo. Vunoni nji ku leka nguange: Tunde hano uka mona Muana muntu na tumama ku livoko lia cilio lia ndzili kaha ali na kuiza na maselua a muilu.”
65 Ngeci sasendote ua kama ua tavuile vizalo viendi via helu na ku handeka nguendi: “Na sahula Njambi! Vukaleho vueka vuka mu tonda? Mu na ziviko mua na sahula Njambi.
66 Vika mu handekaho?” Va mu kumbuluile nguavo: “Na pande kutsa.”
67 Va mu zekuilile ku meso na ku mu veta vinkome. Vakuavo va mu vanduile vimbanda ku cihanga,
68 nguavo: “Kilistu, nongonona.* Iya na ku vete?
69 Kaha Petulu ua tumamene mu citali, ngeci umo ngamba ua mpuevo uezile kuli ikeye na ku handeka nguendi: “Nove una kala hamo na Yesu mukua Ngalileya!”
70 Vunoni ikeye ua vianene ku meso a vose nguendi: “Ka nji tantekeya vi uli na ku handeka.”
71 Kaha ua tundileho na ku suena ku kandzivo ka ku mbelo. Vunoni umo mpuevo mukuavo ua mu nongonuene na ku handeka na vaze va keleko nguendi: “Ou yala na kala hamo na Yesu Mukua Nazaleta.”
72 Vunoni ikeye ua vianene naua, na ku lisinga nguendi: “Ka nji tantekeya ou yala!”
73 Mu nima ya ntsimbu ya indende, vaze vemanene mu citali vezile kuli Petulu nguavo: “Mua vusunga vene, nove u umo uavo, muomu handekesi yove ikeyo ina kuambulula.”
74 Vunoni ikeye ua putukile ku lisinga na ku likunkula nguendi: “Ka nji tantekeya ou yala!” Haze vene ndemba ua tambekele.
75 Kaha Petulu ua vulukile via mu lekele Yesu nguendi: “Ntsimbu kanda ndemba a tambeke, uka nji viana lutatu.” Ngeci ua ile hambandza na kulila cikuma-kuma.
Matota
^ Ni “tele na tumama ku mesa.”
^ Ni “sipilitu.”
^ Ni “ntsitu.”
^ Ni “Ndzango ya Kama.”
^ Ni “polofeta.”
