Ku Hitila Muli Mateu 27:1-66
27 Ku cimene, vakuluntu va vasasendote na vakuluntu va vantu vose, va likunguluile na ku simutuila vati va tsiha Yesu.
2 Munima ya ku mu kuta, va mu tualele na ku mu hana kuli nguvulu Pilato.
3 Kaha Yundasa uze ua muendele vungungu mua muene ngecize, va na mu tuika mulonga ua kutsa, ua vuile ku vavala ku mutima kaha ua hiluisile vimbongo 30 via palata kuli vakuluntu va vasasendote na vakuluntu,
4 nguendi: “Nji na vulumuna mu kuenda vungungu muntu kesi na mulonga.” Vunoni vakevo nguavo: “Ovio haka vi na likuatela netu? Limuene yove vavenya!”
5 Ngeci ua mbilile vimbongo via palata mu tembele, na ku tundako. Kaha ua ka lisukikile.
6 Vunoni vakuluntu va vasasendote va nononguele vimbongo viaco nguavo: “Ka ci tava ku vi haka mu cikasa ca kulela, muomu vinapu vimbongo via maninga.”
7 Kaha mu nima ya ku likuminya, va pangesele vimbongo viaco mu ku landa cihela ca umo ntsongi, linga cipue vihilo via vangendzi.
8 Ngeci mukemuo, cihela caco va ci luka nguavo, Lihia lia Maninga, na ka lelo.
9 Kaha via handekele kapolofeto Yelemiya via lipuisilemo, nguendi: “Kaha va nonene vimbongo 30 via palata, ndando iva tomenene yala uze uva tomenene vamo vana vaIsaleli ndando,
10 kaha va lihanene mu ku landa lihia lia ntsongi ngue muze mua nji sikile Yehova.”
11 Yesu uemanene ku meso a nguvulu, kaha nguvulu ua muihuile nguendi: “Yove Muangana ua vaYundeya?” Yesu ua kumbuluile nguendi: “Yove vavenya una handekamo.”
12 Vunoni mu va kele na ku mu vangeya kuli vakuluntu va vasasendote na vakuluntu, ka kumbuluileko na vimo viahi.
13 Kaha Pilatu ua handekele nguendi: “Ka uesi na kuivua kulana ca vimpande vi vali na ku ku vangeya ni?”
14 Vunoni ikeye ka mu kumbuluile lizi na limo liahi, ngeci nguvulu ua komokele cikuma.
15 Vunoni ha paskua na paskua, ka puile kalingo-lingo ka nguvulu kuecela umo cindzinda ku mbunga uose uva tondele.
16 Ha ntsimbu ize, kua kele umo cindzinda ua puile mbanditu ua kama, lizina liendi Mbalambasa.
17 Ngeci mukemuo, mu va kungulukile, Pilatu ua vehuile nguendi: “Mu tonda njecele iya? Mbalambasa ni Yesu uva tumbula nguavo Kilistu?”
18 Muomu Pilato ua tantekeyele ngecize, va mu hanene Yesu omo lia cipululu.
19 Cikuavo naua, mua kele ha citumamo ca ku sompesa, mpueyendi ua mu tumine muzimbu nguendi: “Kati u likovelese mu cimpande cou yala mukua vuviuke, muomu vutsiki vua lelo nji na yanda cikuma mu ku lota yala uaco.”
20 Vunoni vakuluntu va vasasendote na vakuluntu, va suangeyele mbunga linga va pinge Mbalambasa, vunoni Yesu va mu tsihe.
21 Kaha nguvulu ua va kumbuluile nguendi: “Mu tonda njecele iya?” Vakevo nguavo: “Mbalambasa.”
22 Pilato ua va lekele nguendi: “Ambaco ou Yesu uva tumbula nguavo Kilistu, nji mu linga vati?” Vakevo nguavo: “Mu sukike ha citi!”
23 Kaha ikeye nguendi: “Omo lia vika? Vupi vuka na lingi?” Vunoni vakevo va vuezeleleko ku tambakana nguavo: “Mu sukike ha citi!”
24 Pilato ua muene nguendi a lisina ngoco, muomu liuayanga lia kele na ku livuezelela. Ngeci ua nonene mema na ku tana ku mavoko ku meso a mbunga nguendi: “Yange ka njesi na mulonga ua maninga uou yala. Limuenenu yenu vavenya.”
25 Kaha vantu vose va kumbuluile nguavo: “Mulonga ua maninga endi uize hali yetu na hali vana vetu.”
26 Kaha uecelele Mbalambasa, vunoni ua tumine va vete Yesu makote, munima yaco ua va haneneye linga va ka mu sukike ha citi.
27 Masualale va nguvulu va tualele Yesu ku ndzivo ya nguvulu, kaha vose va mu zengelekele.
28 Va mu suluile vizalo na ku mu zika ntanga ya ku venguluka.
29 Kaha va tungile cilongo ca vimbimbo, va ci hakele ku mutue uendi na ku haka lihongo mu livoko liendi lia cilio. Kaha va mu tsikamenene na ku mu tsopa nguavo: “Tua mi meneka, Muangana ua vaYundeya!”
30 Va mu zekuilile na ku mu nyeka lihongo lia kele mu livoko liendi kaha va putukile ku mu veta ku mutue.
31 Mu nima ya ku tsopa cose cize, va mu suluile ntanga ya ku venguluka, na ku mu zika naua vizalo viendi, kaha va mu tualele linga va ka mu sukike ha citi.
32 Mu va kele na kuya, va uanene umo yala ua ku Silene, lizina liendi Simone. Ngeci va mu kakateyele kuambata citi ci ve ku sukikile Yesu.
33 Kaha mu va ka hetele ku cihela ci va luka nguavo Ngolongota, ni nguetu cihela ca cikola,
34 va mu hanene vinyu via ku pandakana na vindangele linga a nue, vunoni mua vi makelele, ua vi vianene.
35 Kaha va mu sukikile ha citi na ku litahela vizalo viendi,
36 ngeci va tumamene na ku mu lavelela.
37 Va hakele naua cimo citantekeyeso helu lia mutue uendi, ci va sonekele nguavo: “Ou ikeye Yesu Muangana ua vaYundeya.”
38 Kaha va sukikile naua vezi vavali ku mukulo uendi, umo ku cilio mukuavo ku cimosue.
39 Kaha vantu va kele na ku hitako va kele na ku mu tsopa, oku va pika ku mitue
40 na ku handeka nguavo: “Ove uambele nguove, u puzula tembele na ku i tunga mu matangua atatu, liovole yove vavenya! Nga cili u muana Njambi, tunda ha citi!”
41 Kaha vakuluntu va vasasendote na vakua ku soneka hamolika na vakuluntu, va putukile ku mu tsopa nguavo:
42 “Vakuavo ua hasele ku vovola, vunoni na hono ku liovola! Kati ikeye Muangana ua Isaleli? A li tundise ha citi kaha tu mu tsiliela.
43 Kati nguendi ua tsiliela muli Njambi? Kaha Njambi a muohieleni, nga a mu tonda. Muomu ua handekele nguendi, ‘Nji Muna Njambi.’”
44 Omo liaco, na vaze vene vezi va kele ku mukulo uendi, va putukile ku mu tsopa.
45 Kaha tunde 12 ola,* mu cifuti cose mua uililile milima ya kama noho 15 ola.*
46 Kaha ku vi 15 ola, Yesu ua tambakanene na lizi lia kama nguendi: “Eli, Eli, lama sabakitani?” ni nguetu, “Njambi yange, Njambi yange, vika una nji sezela?”
47 Mu va vuile ngoco, vaze va tumamene kuze va putukile ku handeka nguavo: “Ou yala ali na ku sana Eliya.”
48 Kaha ntsimbu ize umo uavo ua nonele cisampo, na ku ci mbuitika mu vinyu via ku kalumuka, kaha ua cihakele ku lihongo na ku mu hana linga anue.
49 Vunoni mbunga nguayo: “Muecele tu mone nga Eliya a hasa ku muohiela.”
50 Kaha Yesu ua tambakanene naua na lizi lia kama, mu nima yaco ua tsile.*
51 Kaha taleni! Ntanga ya tepele hondo ya ku hiana kulela na ya kulela ya mu tembele, ya tavukile ha kati tunde kuilu ku heta kuintsi. Kaha kua kele lindunduma na mavue a tavuokele.
52 Vihilo via fukukile kaha mivila ya vakua ku lela vaze va kosele mu tulo tua kutsa, ya tundilemo,
53 kaha vantu vavengi va imuene. (Vantu va tundile ku vihilo, munima ya ku sanguka ca Yesu va kovelele mu mbonge ya ku lela.)*
54 Vunoni omo mukuluntu ua masualale na vaze va kele na ku niunga Yesu, va muene lindunduma na viuma via lingikile tangua lize, va vuile liova lia kama na ku handeka nguavo: “Cili vene, ou ua puile Muana Njambi.”
55 Kaha kua kele vampuevo vavengi vakele na ku talela ha lahako, vaze va kavele Yesu tunde ku Ngalileya mu ku mu pangela.
56 Ha kati kavo ha kele Maliya Mandalena, na Maliya naye ya Tiango na Yosesi. Kaha naua ha kele naye ya vana va Sembendeu.
57 Ku cinguezi-nguezi, kuezile umo yala ua ku Alimateya lizina liendi Yosefe, ua puile mpite kaha ha ntsimbu ize nendi tele ua pua ndongesi ya Yesu.
58 Yala uaco ua ile kuli Pilato na ku vundila muvila ua Yesu, kaha Pilato ua tavesele va mu haneuo.
59 Yosefe ua ambatele muvila ua Yesu, ua u vungilile ha ntanga ya cili ya linyu.
60 Kaha va ka u langekele mu cihilo ca ciha, cize ca cokuele mu livue. Mu nima ya ku kundika livue lia kama ku mbelo ya cihilo, kaha ua tundileko.
61 Vunoni Maliya Mandalena na Maliya mukuavo ka va tundileko, va tumamene vene ku mukulo ua cihilo.
62 Ku tunda ha litangua lia ku Livuahesela, lia mukuavo lia puile lia Sapalalo. Kaha vakuluntu va vasasendote na vaFaliseu va likunguluilile kuli Pilato,
63 Nguavo: “Muata, tu na vuluka nguetu uze mukua lizangamena tele kanda atse, ua kele na ku handeka nguendi, ‘Munima ya matangua atatu nji ka sanguka.’
64 Ngeci mukemuo, nga citava sukulukambu, tuma vantu linga vaka nyunge ku cihilo naha litangua lia mu citatu. Linga vandongesi vendi kati vaka mu punde na ku kuisa vantu nguavo, ‘Na sanguka ku vatsi!’ Kati ngoco aa makuli aku manusuila, aka hiana honi na aze a katete.”
65 Pilato ua va lekele nguendi: “Citava muambate tunyungi. Kaha yenu mu ka nyunge mbumbo yaco ngue mu mu tonda.”
66 Ngeci mukemuo, vaile na kunyunga mbumbo kaha va silikileko cikuma livue na ku hakako tunyungi.
Matota
^ Mu ciNgelengu “ha ola 6.”
^ Mu ciNgelengu “ha ola 9.”
^ Ni “ua hanene cimbembesi cendi.”
^ Ni “Yelusalema.”
