Ku Hitila Muli Mateu 3:1-17
3 Ku matangua aze, Yoano mukua ku mbatiza uezile mu kuambulula mu mpambo ya Yundeya,
2 nguendi: “Alulukenu, muomu Vuangana vua muilu vuli mu hiehi.”
3 Ou ikeye ya tumbuile kapolofeto Isaya nguendi: “Kuli lizi lia umo ali na ku tambeka mu mpambo nguendi: ‘Vuahesenu njila ya Yehova! Sungamesenu vitapalo viendi.’”
4 Yoano ua kele na kuzala vizalo via maka a kamelu na muiva ua cilambu mu mbunda. Viakulia viendi via puile vambimba na vuci.
5 Kaha vantu va mu Yelusalema na Yundeya yose, na vose va tungile ku hiehi na ndonga Yondau, va kele na kuya kuli ikeye.
6 Kaha ua kele na ku va mbatiza* mu ndonga Yondau, oku va litavela vipi viavo ca ku hona ku sueka.
7 Mua muene vaFaliseu na vaSanduseu vavengi va kele na kuiza ku cihela ca kele na ku mbatizila, ua va lekele nguendi: “Enu vana va mambuambua,* iya na mi leka nguendi mu kovoka ku vutenu vua Njambi?
8 Imenu vusuka vu muesa kualuluka cenu.
9 Kati mu lihalese nguenu, ‘yetu tu vana va Avilahama.’ Muomu nji mi leka vusunga nguange, Njambi a hasa kualulula aa mavue linga apue vana va Avilahama.
10 Ngimbu ili laza ku mizi ya muti. Ngeci muti uose ka uimi vusuka vua cili, vaka u teka na ku umbila mu tuhia.
11 Eyo, yange nji mi mbatiza na mema omo lia kualuluka cenu. Vunoni ou eza mu nima yange, ua nji tuvakana ku ngolo. Kaha ambe vinkaku viendi, ka nja fuililile ku mu sululavio. Ikeye aka mi mbatiza na sipilitu santu na tuhia.
12 Na kuata cilelekeso cendi, linga aka lelese vuino ha cizunguilo na ku kunguiya tiliku yendi mu cisete. Vunoni muzungu vaka u uemeka mu tuhia ka va hasa ku zima.”
13 Kaha Yesu ua tundile ku Ngalileya na kuya ku ndonga Yondau, linga Yoano aka mu mbatize.
14 Vunoni Yoano ua vianene na ku mu leka nguendi: “Tele nga yove ua pande ku nji mbatiza, ni yange naua nji ku mbatize?”
15 Ngeci Yesu ua mu kumbuluile nguendi: “Kati u viane, muomu ino ikeyo njila itu hasa ku puisilamo viuma viose via vuoloke.” Kaha Yoano ua tavele.
16 Omo Yesu va mu mbatizile, haze vene ua tuntukile mu mema; kaha talenu! Melu a sokolokele. Yoano ua muene sipilitu ya Njambi, i sikulukila hali Yesu ngue livembe.
17 Kaha muilu mua tundile lizi ngualio: “Ou ikeye Muanange i nja lema, ue ku nji vuisa ndzolela.”
