Ku Hitila Muli Mateu 4:1-25
4 Kaha sipilitu ya tualele Yesu ku mpambo linga vaka mueseke kuli Ndiavu.
2 Kaha mua likelele kulia mu matangua 40, mutana na vutsiki uavuile njala.
3 Kaha mukua kueseka, uezile kuli ikeye na ku muleka nguendi: “Nga u muana Njambi, tengulula aua mavue apue mbolo.”
4 Vunoni ikeye ua mu kumbuluile nguendi: “Vasoneka nguavo: ‘Kati mbolo lika i yoyesa muntu, vunoni na mezi ose a tunda mu kanua ka Yehova.’”
5 Kaha Ndiavu ua mu tualele mu mbonge ya ku lela, ua muimanesele helu* lia tembele
6 na ku muleka nguendi: “Nga u muana Njambi, tumbukila ha mavu, muomu vasoneka nguavo: ‘Ikeye aka tuma tungelo vendi mu ku kukavuila linga kati u vete ciliato cove ha livue.’”
7 Vunoni Yesu ua mu kumbuluile nguendi: “Vasoneka naua nguavo: ‘Kati ueseke Yehova Njambi yove.’”
8 Ku tundoho Ndiavu ua mu tualele ku umo muncinda ua laha cikuma, na ku mu muesa mavuangana ose aha mavu na vumpahu vuao.
9 Kaha ua mu lekele nguendi: “Tala! Viose evi nji ku hanavio nga u nji tsikamena na ku nji lemesa.”
10 Ngeci Yesu ua mu kumbuluile nguendi: “Tundomu ove Satana! Muomu vasoneka nguavo: ‘Ua pande ku lemesa Yehova Njambi na ku pangela lika ikeye.’”
11 Ngoco vene, Ndiavu ua mu sile kaha tungelo vezile na ku putuka ku mu pangela.
12 Omo Yesu ua vuile ngecize, Yoano va na mu soko mu kamenga, ua ile ku Ngalileya.
13 Kaha mua tundile ku Nazaleta, ua ka kele ku Kapenama, mbonge ya lihata na cisali, mu membo a Zembulone na Nafatali.
14 Linga ali puisemo mezi a handekele kapolofeto Isaya nguendi:
15 “A! Ove cifuti ca Zembulone na ca Nafatali, yenu mua kala mu njila ya ku cisali, mu sinia lia Yondau, mu Ngalileya ya vakua vifuti!
16 Vantu vakele mu milima va muene ceke ca kama, eyo, vaze vakele mu milima ya kutsa, ceke ca va tuililile.”
17 Ku tunda ha ntsimbu ize, Yesu ua putukile kuambulula nguendi: “Alulukenu, muomu Vuangana vua muilu vuli mu hiehi.”
18 Kaha omo Yesu ua kele na ku hita ku mukulo ua cisali ca Ngalileya, ua muene vantsongo na muntu, Simone uze uva luka Petulu na muanaye Anduleu. Vakele na kuta manda muomu vapuile vakua ku tsiha vantsi.
19 Ua va lekele nguendi: “Nji kavenu kaha nji ka mi puisa vakua ku kuata vantu.”
20 Haze vene va sile manda avo kaha va mu kavele.
21 Mua tundileho ua muene naua vana va Sembendeu, Tiango na muanaye Yoano. Vakele mu vuato mu ku viukisa manda avo na iseavo Sembendeu, ngeci ua va sanene.
22 Haze vene navo va sile vuato na ise, kaha va mu kavele.
23 Kaha Yesu ua ile na ku hitangana mu Ngalileya yose, mu ku longesa mu visinangonga viavo, na kuambulula muzimbu ua cili ua Vuangana, na ku kanguisa mavezi a vifua viose, na vose vakele na vulema.
24 Lutsimo luendi lua sandokele mu Silia yose, ngeci va mu nehelele vantu vakua mavezi aku liseza-seza, na vaze vakele na ku yanda na misongo, vaze vakele na vandemone, vakua kushinya, na vakua kalepa, kaha vose ua va kanguisile.
25 Ngeci vantu vavengi va mu kavele: vakua Ngalileya, Ndekapoli,* Yelusalema, Yundeya na vaze vakele mu sinia lia Yondau.
