Ku Hitila Muli Mateu 6:1-34
6 “Zangamenu kutina mu linge vuviuke vuenu ku meso a vantu mu ku limuesa. Nga mu lingamo, ka mu ka tambula fueto na imo yahi kuli Isuenu ua muilu.
2 Ngeci mukemuo, nga u hana vukuasi ku cihutu, kati u sike luneta* ngue mu veku linga vakua civembulu mu visinangonga na mu vitapalo, linga vantu va va sangale. Nji mi leka vusunga nguange, ava va na tambula laza fueto yavo mu vutuntu.
3 Vunoni nga una hana vimo ku cihutu, kati u lingise livoko liove lia cimosue, litantekeye vi lia lingi lia cilio,
4 linga vuana vuove vupue vua ku suekesa. Kaha Iso uze ue ku mona mu vusueke, aka ku fueta.
5 “Cikuavo naua, nga mu vundila kati mu linge ngue mu veku linga vakua civembulu, muomu va lema ku vundila vuimane mu visinangonga na ha mankano a vitapalo, linga vantu vose va va mone. Nji mi leka vusunga nguange, ava va na tambula laza fueto yavo.
6 Vunoni ove nga u tonda ku vundila, kovela mu hondo yove na ku soka ku mbelo, kaha vundila kuli Iso ua muilu, kaha Iso uze ueku mona mu vusueke aka ku fueta.
7 Nga mu vundila, kati mu hilukile mezi amolika kusua kumo ngue mu ve ku linga vakua vifuti, muomu ve ku singanieka nguavo Njambi evua lika vivundilo viavo nga va pangesa mezi a engi.
8 Kati mupue ngeci muavo, muomu Isuenu ua muilu na tantekeya laza via mi kambela* ntsimbu kanda mu mu vundilevio.
9 “Ngeci mukemuo, mua pande ku vundila ngecize:
“‘Tatetu uli muilu, va lelese lizina liove.
10 Vuangana vuove vuize. Cizango cove va ci linge hano ha mavu, ngue mu vali na ku ci linga muilu.
11 Tu hane viakulia* vi tu tondeka mu litangua lia lelo.
12 Kaha tuecele ku vipi* vietu, ngue mu tue kuecela vaze ve ku tu vulumuina.
13 Tu kuase ku vula vieseko kaha tuohiele ku mukua vupi.*
14 “Muomu nga muecela vakuenu ku milonga yavo, na Isuenu ua muilu aka miecela.
15 Vunoni nga ka muecela vakuenu ku milonga yavo, na Isuenu ua muilu ka ka miecela.
16 “Nga mu livindika kulia, kati mu muese cihanga ca vusiua ngue mu ve ku linga vakua civembulu. Muomu ve ku muesa vihanga via vusiua, linga vantu va mone nguavo va na livindika kulia. Nji mi leka vusunga nguange, ava va na tambula laza fueto yavo mu vutuntu.
17 Vunoni nga u livindika kulia, kuita mazi ku mutue uove na kutana ku meso,
18 linga vantu kati va ku mone nguavo una livindika kulia, kuvanga Iso lika uze ue ku mona mu vusueke, kaha aka ku fueta.
19 “Likelenu ku lilundikila vupite hano ha mavu ha kala tulongolo na nkalavue vi hasa ku vu vihisa kaha na vezi va hasa ku vu punda.
20 Vunoni lilundikilenu vupite muilu, muomu ka mua kele tulongolo, nkalavue ni ambe vezi va ku vu punda.
21 Muomu kuze kuli vupite vuove, kukekuo ku kala mutima uove.
22 “Ndeya ya muvila yapua liso. Nga liso liove li mona mua cili,* kaha muvila uove uose ukala na ceke.
23 Vunoni nga liso liove lia ku vihia, muvila uove uka sula na milima. Kaha nga ceke ci uli naco cinapu mpundu milima, kaha milima yaco ya kama cikuma!
24 “Na umo uahi a hasa ku pangela vasukulu vavali; muomu a zinda umo na ku lema mukuavo, ni alikata na umo na ku yengula mukuavo. Ka mu hasa ku pangela Njambi na ku pangela Vupite.
25 “Ngeci mukemuo, nji mi leka nguange: Likelenu ku lisosomua na muono uenu ku tuala ha viakulia, viakunua na mivila yenu, nguenu vika tu zala. Vuno muono kati ukeuo ua seho ku hiana viakulia kaha muvila ku hiana vuzalo ni?
26 Aci talenu tuzila, ka ve ku kuna cipue kutia, ni ku unguluila mu visete, vunoni Isuenu ua muilu ue ku va suka. Nkuma enu ka mua kele na seho ku tuvakana vakevo ni?
27 Iya ha kati kenu omo lia ku lisosomua a hasa ku vueza ku matangua a muono uendi?
28 Cikuavo naua, vika mu lisosomuena ku tuala ha vuzalo? Lilongeselenu ku vintemo via mu musenge, ka vie ku panga cipue ku litongela vuzalo.
29 Mua vusunga, nji mi leka nguange ambe vene Solomone mu vumpahu vuendi vuose, ka zalele ngue imo yavio.
30 Enu vakua ku tsiliela ca cindende, nga Njambi ue ku zika visoka via mu musenge, viliko lelo kaha imene va vi tsimika, nkuma yenu ka hasa ku mi zika ni?
31 Ngeci mukemuo, kati mulisosomue nguenu, ‘Vika tulia?’ ni ‘Vika tunua?’ ni ‘Vika tu zala?’
32 Muomu viuma viose evi, vikevio vi ve ku tonda ku kala navio vakua vifuti. Isuenu ua muilu a tantekeya ngecize mu tondeka viuma viose evi.
33 Ngeci mukemuo, ha katete, tualelenuho ku tonda na kutuameka Vuangana vua Njambi na vuviuke vuendi mu muono uenu, kaha evi viuma vikuavo viose aka mi vuezelelavio.
34 Na vuno vene, kati mu lisosomue na via imene, muomu litangua lia imene likeza na visoti vialio. Nkala litangua lia kala na visoti vialio.
Matota
^ Ni “kati u limuese.”
^ Ni “vi mua tondeka.”
^ Mu ciNgelengu “mbolo.”
^ Mu ciNgelengu “Makongo.”
^ Halumo “ku vipi.”
^ Ni “litala lika ha cuma cimo.”
