Ku Hitila Muli Mateu 7:1-29
7 “Kati mu hise vakuenu, linga nenu kati va mi hise.
2 Muomu cihiso ci mu hisa naco vakuenu, nenu cikeco ci vaka mi hisa naco. Kaha seteko imu seteka nayo vakuenu nenu ikeyo i vaka mi seteka nayo.
3 Vika u talela kacisuasua kali ha liso lia muanoko, vunoni u hona ku mona mukambo uli ha liso liove?
4 Ni vati u leka muanoko nguove: ‘Mana nji ku tundise kacisuasua kali ha liso liove, oku ni ha liso liove hali mukambo?
5 Ove mukua civembulu! Livange ku tundisa mukambo uli ha liso liove, amba u hase ku mona mua cili mua ku tundisila kacisuasua kali ha liso lia muanoko.
6 “Kati mu hane viuma via ku lela ku tutali, cipue ku mbila vupite vuenu ku vangulu, ku teua va vi liatangela kaha va mi tengulukila na ku mi vulumuna.
7 “Tualelenuho kupinga, kaha vaka mi hana; tualelenuho ku tonda kaha mu ka uana; tualelenuho ku ngongota kaha vaka mi sokoluela.
8 Muomu uose a pinga vaka mu hana, uose a tonda aka uana, na uze a ngongota vaka mu sokoluela.
9 Iya ha kati kenu nga muana a mu pinga mbolo, ikeye a mu hana livue?
10 Ni iya a hasa ku hana munendi linoka nga na mu pingi intsi?
11 Na vuno vene, nga yenu vakua vupi mu tantekeya ku hana viuma via cili ku vana venu, singaniekenu honi Isuenu ua muilu, nkuma ka ka hana viuma via cili kuli vaze va mu pinga ni?
12 “Viuma viose vi mu tonda vakuenu va mi lingilevio, nenu va lingilenuvio. Muomu, aha hakeho hemana Masiko na Visoneka via Vapolofeto.
13 “Kovelenu mu mbelo ya yindende, muomu mbelo ya kama na tapalo ya kama vi tuala ku ku nonga, kaha vavengi vali na ku kovelamo.
14 Vunoni mbelo ya indende na tapalo ya indende, vi tuala ku muono, kaha va vandende lika vali na ku i uana.
15 “Zangamenu na vapolofeto va makuli vaze veza kuli yenu ngue vampanga, vunoni mukati vanapu tungunga vali na ndzala.
16 Mu ka va tantekeyela ku vusuka vuavo. Vuno ve ku hela vusuka vua vinyu ku vimbimbo ni vinkuyu ku tundzata ni?
17 Na vuno vene, muti ua cili uima vusuka vua cili, vunoni muti ua ku vihia uima vusuka vua ku vihia.
18 Muti ua cili ka u hasa kuima vusuka vua ku vihia, kaha muti ua ku vihia ka u hasa kuima vusuka vua cili.
19 Muti uose ka uimi vusuka vua cili, vaka u teka na ku umbila mu tuhia.
20 Mua vusunga, vantu vaco mu ka va tantekeyela ku vusuka vuavo.
21 “Kati uose a nji tumbula nguendi: ‘Muangana, Muangana’ aka kovela mu Vuangana vua muilu, vunoni uze lika a linga cizango ca Tate ali muilu.
22 Ku litangua lize, vavengi va ka handeka nange nguavo: ‘Muangana, Muangana, ka tua polofetele mu lizina liove, ka tua tundisile vandemone mu lizina liove, kaha naua ka tua lingile vikomoueso via vingi mu lizina liove?’
23 Vunoni yange nji ka va leka nguange: ‘Ka nji mi tantekeya! Tundenuomu, enu vakua ku pokola masiko!’
24 “Ngoco vene, uose evua ano mezi ange na kuononoka, aka pua ngue yala mukua mana ua tungile ndzivo yeni ha livue.
25 Kaha mu kua nokele niondzi, mema a sindumukile na luhundzi lua kama lua vetele hali ize ndzivo, vunoni ka ya lundumukile muomu ua i tungilile ha livue.
26 Kaha uose evua ano mezi ange, vunoni ka ononoka, apua ngue yala ua ciheve ua tungilile ndzivo yeni ha museke.
27 Ngeci mu ya nokele niondzi, mema a sindumukile na luhundzi lua kama lua vetele ha ndzivo yaco kaha yose ya lundumukile.”
28 Kaha Yesu mua manusuile ku handeka aa mezi, vantu va likomokelele cikuma mu va vuile kulongesa cendi.
29 Muomu ua va longesele ngue muntu ali na mpoko ya ku tunda kuli Njambi, kati ngue vakua ku soneka vavo.
