Ku Hitila Muli Mateu 8:1-34
8 Yesu mua tundile ha muncinda, mbunga ya yingi ya mu kavele.
2 Kaha umo mukua mbumba uezile kuli ikeye na ku mu tsikamena, kaha nguendi: “Muangana, nga ua zange, nji lelese.”
3 Ngeci Yesu uoluele livoko liendi na ku mu kuata, nguendi: “Nja zange! Pua ua ku lela.” Haze vene ua kangukile ku mbumba.
4 Yesu ua mu lekele nguendi: ‘Kati u lekeko na umo uahi, ya uka lisolole kuli sasendote na ku hana vuana vua sikile Mosesa, linga va tantekeye nguavo u na kanguka.
5 Kaha Yesu mua kovelele mu Kapenama, umo kapitau ua masualale, uezile kuli ikeye na ku mu lambelela
6 nguendi: “Muangana, mukua ku panga ku ndzivo yange ali na ku vavala kalepa, ndandanda ha muhela, ali na ku yanda cikuma mukuendze uange.”
7 Kaha Yesu ua mu kumbuluile nguendi: “Nji ka mu kanguisa mu nji ka hetako.”
8 Vunoni kapitau ua mu kumbuluile nguendi: “Muangana, ka nja fuilile ku ku tambula mu ndzivo yange. Handeka lika lizi kaha mukuendze uange a kanguka.
9 Muomu nange ve ku nji tumina, kaha naua kuli masualale va kala muintsi liange. Nga nji leka umo uavo nguange: ‘Ya ku ngandi,’ aya. Nga nji sana mukuavo nguange: ‘Tuaya kuno,’ eza. Kaha nga nji leka ngamba yange nguange: ‘Linga vingandi,’ a vilinga.”
10 Yesu ua komokele cikuma mua vuile ngoco. Ngeci ua lekele vaze va kele na ku mu kava nguendi: “Nji mi leka vusunga nguange, muno mu Isaleli ka nja uanene muntu ua lutsilielo lua kama ngeci.
11 Vunoni nji mi leka nguange, vantu vavengi va ka tunda ku vucelo na ku vutokelo na ku tumama ku mesa hamo na Avilahama, Isake na Yakomba mu Vuangana vua muilu.
12 Vunoni vana va Vuangana vaka va mbila ha mbandza mu milima. Hakeho ha ka kala ku lila cavo na ku lisumanga ku mazo.”
13 Ngeci Yesu ua lekele uze kapitau, nguendi: “Ya. Mu ku linga u na muesa lutsilielo lua kama, vi lipuisemo viu na pingi.” Mu ntsimbu ize vene, ngamba yendi ua kangukile.
14 Kaha omo Yesu ua kovelele mu ndzivo ya Petulu, ua uanene nayemueno ya Petulu ali ha muhela, a vavala masika-sika.
15 Yesu ua mu kuatele ku livoko kaha ua kangukile. Ngeci ua hindukile na ku putuka ku va vuahesela viakulia.
16 Ku cinguezi va mu nehelele vantu vavengi va kele na vandemone. Ngeci na lizi lika, ua tundisile vandemone vaco na ku kanguisa vose va kele na ku vavala.
17 Evi via solokele linga a lipuisemo mezi a handekele kapolofeto Isaya nguendi: “Ikeye uambatele ku vavala cetu kaha ua lituikile mavezi etu.”
18 Yesu mua muene mbunga ya mu zengeleka, ua lekele vandongesi vendi va zavule vuato linga vaye mu sinia.
19 Kaha umo mukua ku soneka uezile kuli ikeye na ku mu leka nguendi: “Mulongisi, nji ka kukava kuose-oko ku uya.”
20 Vunoni Yesu ua mu kumbuluile nguendi: “Vambandze vali na vina na tuzila vali na masua. Vunoni Muana muntu kesi na hamo hahi ha ku satela mutue.”
21 Kaha ndongesi mukuavo ua mu lekele nguendi: “Muangana, nji tave nji ka tsinde tata ha katete.”
22 Vunoni Yesu ua mu kumbuluile nguendi: “Tualelelaho lika ku nji kava, ecela vatsi va tsinde vatsi vavo.”
23 Omo ua kovelele mu vuato vandongesi vendi va mu kavele.
24 Kaha va tungumuke, kua katukile luhundzi lua kama mu cisali na mancimba a kele na ku fuika vuato. Vunoni Yesu tele ali mu tulo.
25 Ngeci vaka mu hinduile na ku mu leka nguavo: “Muangana tuovole, tutsa!”
26 Vunoni ikeye ua va kumbuluile nguendi: “Enu vakua lutsilielo lua lundende, vika mu vuila liova?” Ngeci ua katukile na ku holuesa luhundzi na cisali, kaha kua holokele kulu.
27 Vandongesi va komokele cikuma na ku handeka nguavo: “Muntu ua kufua vati ou, ua ku linga luhundzi na cisali vi mu ononoka?”
28 Yesu mua hetele mu sinia, ku cihela ca Ngandala, kua kele vamala vavali va kele na vandemone. Mu ku linga va puile vakua vutenu cikuma, na umo uahi ua hasele ku hita njila yaco. Kaha mu va muene Yesu, va tundile ha vihilo na kuya kuli ikeye,
29 ngeci va putukile ku tambakana nguavo: “Vika u tonda, ove Muana Njambi? U neza mu ku tu yandesa, oku ntsimbu iva tu tomena kanda ici hete?
30 Ha laako navo, ha kele vutanga vua vangulu va kele na kulia.
31 Ngeci vaze vandemone va lambelele Yesu nguavo: “Nga u tonda ku tu tundisa, tuecele tu kovele mu vutanga vua vangulu.”
32 Kaha Yesu ua va lekele nguendi: “Yenu!” Ngeci va tundile na ku kovela mu vangulu. Vuno talenu! Vutanga vuose vua lupukilile ku mungenya-ngenya ua cisali, ngeci va uililile mu mema na kutsa.
33 Kaha tuniungi va vangulu va tinine, va kambuluile mu mbonge viose vi va muene, hamo lika na via vaze vamala vavali va kele na vandemone.
34 Omo liaco, vantu vose mu mbonge, vaile kuli Yesu, na ku mu lambelela a tunde muimbo liavo.
