Ku Hitila Muli Mateu 9:1-38
9 Ngoco vene, Yesu ua kovelele mu vuato, ua zavukile na kuya muimbo liendi.
2 Kaha va mu nehelele umo yala ua kalepa ha cipoya.* Omo Yesu ua muene lutsilielo luavo, ua lekele uze yala mukua kalepa nguendi: “Simpa munange! Va na ku konekela vipi viove.”
3 Kaha vamo vakua ku soneka, mu va muene evi, va singaniekele nguavo: “Ou ali na ku sahula Njambi.”
4 Yesu mua tantekeyele visinganieka viavo, ua handekele nguendi: “Vika mu singaniekela via ku vihia?
5 Nkuma vika via viasi kuli yenu, ku handeka nguange: ‘Va na ku konekela vupi vuove’ ni ku handeka nguange: ‘Katuka, uende’?
6 Vunoni linga mu tantekeye nguenu, Muana Muntu ali na mpoko ya ku konekela vipi—” ngeci ua lekele mukua kalepa nguendi: “Katuka, ambata cipoya cove, ya ku ndzivo yove.”
7 Ngeci uze yala ua katukile na kuya ku ndzivo yendi.
8 Omo mbunga ya muene evi, va vuile liova, ngeci va zumbangeyele Njambi uze uahanene vantu mpoko yaco.
9 Yesu mua tundile haze, ua muene umo yala lizina liendi Mateu, na tumama ku seketa ya ku fuetela lisimu. Ngeci ua mu lekele nguendi: “Tuaya upue ndongesi yange.” Haze vene Mateu ua katukile na ku mu kava.
10 Mu nima ya ntsimbu, omo Yesu na vandongesi vendi va kele na kulia* mu ndzivo, vakua ku tambula lisimu na vakua vupi vavengi, vezile na kulia hamo navo.
11 Vunoni omo vaFaliseu va vimuene, vehuile vandongesi vendi nguavo: “Omo lia vika mulongisi uenu ali na kulia hamo na vakua ku tambula lisimu na vakua vupi?”
12 Yesu mua va vuile, ua va lekele nguendi: “Vakangule ka ve ku tonda mukua ku saka, vunoni vaze va vavala.
13 Yenu, mu ka lilongese vi a lomboloka aa mezi: ‘Nji tonda cikeketima kati vikombelo.’ Muomu ku njezile mu kutonda vakua vuviuke, vunoni vakua vupi.”
14 Kaha vandongesi va Yoano, vezile kuli ikeye na ku mu hula nguavo: “Omo lia vika yetu na vaFaliseu tue ku livindika kulia, vunoni vandongesi vove ka ve ku lingamo?”
15 Yesu ua va kumbuluile nguendi: “Nkuma vavusamba va sandungi, va hasa ku kala mu vusiua nga sandungi acili navo ni? Vunoni ika heta ntsimbu omo sandungi va ka va tambulaye, hakeho honi ha vaka livindikila kulia.
16 Na umo uahi a tongela citopeko* ca ntanga ya iha ha vuzalo vua laza, muomu citopeko caco, ci ka vu zamuna kaha vu ka tavuka cikuma ku hiana na muze mua laza.
17 Cikuavo naua, vantu ka ve ku longela vinyu via viha, mu njeke ya cilambu ya laza. Muomu nga va lingamo, njeke yaco ika tavuka na vinyu viose vi ka muania. Vunoni ve ku haka vinyu via viha mu njeke ya cilambu ya iha, kaha viose vivali vie ku kala vuino.”
18 Kaha tele ali na ku handeka evi viuma, kuezile umo mukua ku sika na ku mu tsikamena, ua handekele nguendi: “Ntsimbu ino halumo munange ua mpuevo natsi honi, tuye uka mu saleke livoko liove, linga ayoye naua.”
19 Ngeci Yesu ua katukile, hamo na vandongesi vendi na ku kava uze yala.
20 Kaha tenu! Umo mpuevo ua kele na ku pinda na musongo ua ku hita maninga mu miaka 12, ua suenene kuli Yesu na ku kuata ku ntsongo ya vuzalo vuendi,
21 muomu ua kele na ku singanieka nguendi: “Ambe nga nji kuata lika ku vuzalo vuendi, nji kanguka.”
22 Kaha Yesu mua tengulukile, ua mu muene ngeci ua mu lekele nguendi: “Kati u lisosomue munange! Lutsilielo luove lua ku kanguisa.” Ku tunda haze vene, uze mpuevo ua kangukile.
23 Yesu mua ka hetele ku ndzivo ya uze mukua ku sika, ua uanene vakua kuimba miaso ya ku linyenga,* na mbunga ya kele na ku linga muyoyo.
24 Ngeci Yesu ua handekele nguendi: “Tuhukenu ha mbandza, muomu ou muanampuevo ka tsile na kosa lika.” Mu va vuile ngoco, va putukile ku mu zola na ku mu sembulula.
25 Mbunga mu ya tuhukile mu ndzivo, Yesu ua kovelelemo, ngeci ua kuatele ku livoko lia muanampuevo kaha ua hindukile.
26 Ou muzimbu, ua lisandokele mu mbonge yose.
27 Kaha Yesu mua tundileko, vamala vavali va tupuputa, va mu kavele oku va mu tambakana nguavo: “Tu vuileko cikeketima, ove muana Ndaviti.”
28 Yesu mua kovelele mu ndzivo, vaze tupuputa vezile kuli ikeye, ngeci ua vehuile nguendi: “Mua tsiliela nguenu nji hasa ku mi kanguisa ni?” Va mu kumbuluile nguavo: “Eyo Muangana.”
29 Ngeci Yesu ua va kuatele ha meso na ku valeka nguendi: “Ci lingiue vene ngoco, kuliya na lutsilielo luenu.”
30 Haze vene va putukile ku mona, vunoni Yesu ua va vindikile* nguendi: “Kati mu ka vi handeke.”
31 Vunoni mu va tuhukile, va sanduele muzimbu mu mbonge yose.
32 Yesu na vandongesi vendi, tele vali na kuya, talenu! Vantu va vanehelele umo yala ua kaveveve, ua kele na ndemone.
33 Mu va mu tundisile ndemone, uze yala ua kaveveve ua putukile ku handeka, kaha mbunga ya likomokelele na ku handeka nguavo: “Muno mu Isaleli, viuma via cifua eci kanda tu ci vimone.”
34 Vunoni vaFaliseu va handekele nguavo: “Ou muntu ali na ku pangesa ngolo ya muangana ua vandemone, linga a tundise vandemone.”
35 Yesu ua hitanganene muaya vimbonge viose, na membo ose, oku a longesa vantu mu visinangonga, na kuambulula muzimbu ua cili ua Vuangana, na ku kanguisa mavezi eka na eka na misongo yose.
36 Omo ua muene mbunga, ua va vuililile cikeketima muomu va kele na kuva yandesa kaha va lisandokele ngue vampanga kavesi na kaniungi.
37 Ngeci ua lekele vandongesi vendi nguendi: “Mua vusunga, vimbuto* vi na lana vunoni vakua kutia vavandende.*
38 Ngeci mukemuo, vundilenu vavenia vipanga, linga a tume vakua ku panga vavengi va ku linge cipanga cendi.”
Matota
^ Muhela ua undende ua kuambatela muvezi.
^ Ni “ua tumamene navo ku mesa.”
^ Ni “cikamba; limendo.”
^ Ni “vakua ku sika zimbendo.”
^ Ni “ua va mamuine.”
^ Ni “vipanga.”
^ Ni “vakua ku panga vavandende.”
