Vilinga Via Vapostolo 1:1-26
1 Mu muzimbu ua ku livanga ove Teofilu, nja ku sonekelele viuma viose via putukile kulinga Yesu na vize via longesele
2 kuheta na ha litangua li va mu tualele muilu mu nima ya kuhana masiko ku hitila mu sipilitu santu ku vapostolo vaze va hanguile.
3 Kaha mu nima ya kuyanda na ha kutsa, Yesu ua lisoluele naku va leka vukaleho vua vuingi vua muesa nguavuo ali na muono. Va mu muene mu matangua 40 ose kaha uakele naku va longesa via Vuangana vua Njambi.
4 Mua likunguluile navo ua va sikile nguendi: “Kati mu tunde mu Yelusalema vunoni tualelenuho ku vandamena via na mi kulahesa Tata, ngue muze mu nja mi lekele;
5 Muomu nji mi leka vusunga nguange: “Yoano ua mbatizile vantu na mema vunoni mu nima ya amo matangua lika, enu vaka mi mbatiza na sipilitu santu.”
6 Ntsimbu tele va na ci likungulula, vandongesi vehuile Yesu nguavo: “Muangana ino ikeyo ntsimbu i uhiluisila Isaleli Vuangana ni?”
7 Yesu ua va kumbuluile nguendi: “Ka ca mi pandele ku tantekeya vintsimbu ni miaka, ya na lihanguila Tata ku ndzili yendi.
8 Vunoni omo sipilitu santu ikeza hali yenu, muka tambula ngolo kaha mu kapua vakaleho vange mu Yelusalema, na mu Yundeya yose, na mu Samaliya na kua lenga mavu.”
9 Mu nima ya ku manusula ku handeka evi viuma, Yesu va mu tualele muilu ha meso avo vene kaha liselua lia mu fuikile, ngeci ka va mu muene naua.
10 Kaha ntsimbu vakele na kutala sui muilu mua kele na kuya, va tungumuke vamala vavali va na zala via kutoka va nemana ku mukulo uavo,
11 va handekele nguavo: “Enu vamala va ku Ngalileya, vika mu nemanena hano hanga mua talela muilu? Ou Yesu iva na tundisa hakati kenu naku mu tuala muilu aka hiluka naua ngue muze vene muanayi muilu.”
12 Haze vene vandongesi va tundile ha Muncinda ua Olivela naku hiluka ku Yelusalema, muncinda uaco uakele mu hiehi na mbonge ya Yelusalema kaha ntunda ya keleho va itavesele ku yenda lia sapalalo.
13 Mu vaka hetele, va londele mu hondo ya kuilu iva tulilile, mu hondo yaco muakele Petulu, Yoano, Tiango na Anduleo, Filipu na Tomasi, Mbatolomeu na Mateu, Tiango muana Alefeu, Simone mukua ntuima na Yunda muana Tiango.
14 Vose va uisilile kumo naku tualelelaho ku vundila kaha hakati kavo hakele Maliya naye ya Yesu na vampuevo vakuavo kaha na vantsongo va Yesu.
15 Ha matangua aze, Petulu ua katukile hakati ka vamuanaye, (vantu vose vakeleko vapuile 120) kaha ua handekele nguendi:
16 “Enu vamuanetu ca pandele visoneka vi lipuisemo. Eyo, vize viya polofetele sipilitu santu ku hitila muli Ndaviti ku tuala hali Yundasa, uze ua tuamenenene vaze vakutile Yesu, via pandele ku lipuisamo.
17 Muomu nendi uapuile umo uetu. Kaha va mu hanguile alinge cino cipanga.
18 (Yala uaco ua landele lihia na fueto ya uanene mu vilinga viendi via ku vihia. Kaha ua uile na mutue, lifu liendi lia tavukile, ngeci via muzimo viose via tuhukile.
19 Vantu vose mu Yelusalema va tantekeyele muzimbu uaco, ngeci va lukile lize lihia mu lilimi liavo nguavo Akelendama, lia lomboloka, “Lihia lia Maninga.”)
20 Muomu va soneka ku livulu lia Visamo nguavo: ‘Limbo liendi lipue ngundu kaha na umo uahi a tungemo.’ Cikuavo naua, ‘Cipanga cendi ca vuniungi va cihane ku muntu ueka.’
21 Ngeci mukemuo, ci na pande hali vamala vaze vendele netu ntsimbu yose omo Muangana Yesu uakele na kulinga vipanga* viendi hakati ketu,
22 tunde ha mu mbatizilile Yoano kuheta na ha litangua li va mu tundisile hali yetu muku mu tuala muilu, ha kale umo alipandakana kuli yetu mu kuhana vukaleho vua kusanguka ca Yesu.”
23 Ngeci va hanguile vamala vavali: Yosefe uze iva luka nguavo Mbalasamba kaha naua i vakele na kusana nguavo Yustu; mukuavo Matiya.
24 Mu nima yaco, va vundilile nguavo: “A Yehova!* Yove u tantekeya mitima ya vantu vose. Tu muese iya una hangula hali ava vamala vavali,
25 linga ahinge ha cipanga na vupostolo vua sile Yundasa, na kuya kuendi.”
26 Ngeci va pangesele citantekeyeso,* linga va mone hakati ka ava vamala vavali, iya ya na hangula Njambi. Kaha vava muesele ngecize va pandele ku hangula Matiya, kaha va mu pandakanene kuli vaze vapostolo 11.
Matota
^ Mu ciNgelengu “ua kovelele na ku tuhuka”
^ Talenu Mezi ava Lombololola
^ Va pangesele vimo vinjila via va kuasele ku nongonona cizango ca Njambi ha muzimbu uaco.
