Vilinga Via Vapostolo 10:1-48
10 Mu Sesaliya muakele umo yala, lizina liendi Koloneliu, uapuile kapitau ua masualale* va cimo civunga ci vasanene nguavo, civunga ca vakua Italia.*
2 Uapuile mukua ku lemesa Njambi naku mu singimika hamolika na vakua ndzivo yendi vose. Cikuavo naua, uapuile mukua ku tetela vihutu muku va hana vuana vua vuingi kaha naku lambelela kuli Njambi ntsimbu yose.
3 Tangua limo ku vi 15 ola,* umo kangelo ua Njambi ua mu solokelele mu cimona naku mu leka nguendi: “Koloneliu!”
4 Koloneliu uavuile liova, ngeci ua talele sui uze kangelo naku muihula nguendi: “Muangana, vika?” Kangelo ua mu kumbuluile nguendi: “Njambi na tava vivundilo viove na vukuasi vu ue kuhana ku vihutu, ngeci mukemuo naku vuluka.
5 Tuma vantu ku Yopa, vaka sane Simone uva sana naua nguavo Petulu.
6 Yala uaco ali ku ndzivo ya Simone mukua ku kotongola vilambu, uze ua tungila kuhiehi na kalunga ndonga.”
7 Mua ile uze kangelo uakele naku handeka nendi, Koloneliu ua sanene vangamba vendi vavali, na umo lisualale mukua ku lemesa Njambi hakati ka vose vakele naku mu pangela.
8 Ua va lekele viose via mu solokelele, ngeci uava tumine ku Yopa.
9 Lia mukuavo, omo vakele naku tualelelaho na vungendzi vuavo kaha tele va lingila kuheta mu mbonge, Petulu uaile helu lia ndzivo ku vi 12 ola* mu kuvundila.
10 Vunoni ua tsile mua kama ndzala kaha ua tondele kulia. Ntsimbu tele vacili naku vuahesa viakulia, ua uililile mu tulo
11 kaha ua muene lilu lia sokoloka na cimo cuma ca kulifua ngue ntanga ya kama ya liniu va ikutile ku mantsongo ayo auana kaha vali naku isikuluisa ha mavu;
12 mukati kayo muakele tusitu va mikono iuana va miyati yose na vakua ku likoka ha mavu na tuzila.
13 Kaha uavuile limo lizi ngualio: “Petulu hinduka, tsiha ulie!”
14 Vunoni Petulu ua kumbuluile nguendi: “Houe Muangana, kanda njilieho cuma ca mazilo ni ca kuzuala.”
15 Vunoni lize lizi lia mu lekele naua lua mu civali ngualio: “Kati usane viuma via na lelesa Njambi nguove via kuzuala.”
16 Eci ca solokele lutatu luose kaha haze vene ize ntanga va itualele muilu.
17 Ntsimbu Petulu na ci likomokela mu ku lihula vika ca lumbunuka cize cimona, vaze vamala va atumine Koloneliu, vehuile kuiko yakele ndzivo ya Simone kaha va kuimanene ha mbelo.
18 Va sanene umo ua ku ndzivo, naku muihula nga Simone uze iva sanene nguavo Petulu kuali.
19 Ntsimbu Petulu uakele naku singanieka ha cimona caco, sipilitu ya mu lekele nguayo: “Tala! Vamo vamala vatatu vali naku kutonda.
20 Ngeci mukemuo, katuka, suluka linga ukaye navo, kati ulinge vimpata muomu yange nji na vatumu.”
21 Kaha Petulu ua sulukile naku ka liuana navo, uava lekele nguendi: “Yange uno imuli na kutonda, vika mu nezila?”
22 Va mu kumbuluile nguavo: “Koloneliu kapitau ua masualale, yala mukua vuviuke uze ua singimika Njambi kaha vaYundeya vose va mu singimika, nguavo uapua muntu ua cili. Na tambuile Masiko kuli kangelo ua Njambi ua kulela, nguendi va kusane, linga uye ku ndzivo yendi aka halakane vi uhandeka.”
23 Ngeci Petulu ua va kovelesele mu ndzivo naku va tambula ngue vangendzi vendi.
Lia mukuavo, uaile navo kaha vamo vamuanaye vaku Yopa vaile nendi.
24 Kaha lia hateleko, vaka hetele mu Sesaliya, va uanene Koloneliu na va vandamena oku na kungulula vavusoko vendi vose na vavusamba vendi va ha mutima.
25 Omo Petulu ua kovelele, Koloneliu ua mu sesele kaha ua uililile ku mikono yendi naku mu tsikamena.
26 Vunoni Petulu ua mu katuile naku muleka nguendi: “Katuka, nange nji muntu ngeci muove.”
27 Petulu mua kovelele mu ndzivo oku tele a simutuila na Koloneliu, ua uanene vantu vavengi va na kunguluka.
28 Petulu ua va lekele nguendi: “Mu tantekeya vuino nguenu Masiko ka a tavesele kaYundeya ku likata na muntu mukua muyati ueka ni ambe vene ku musuena. Vunoni Njambi na nji muesa nguecize, ka nja pandele ku tumbula muntu na umo uahi nguange ua mazilo ni ua kuzuala.
29 Ngeci mukemuo mu mua nji sana ka nja vianene vunoni njineza. Nji lekenu honi vika mua nji sanena.”
30 Kaha Koloneliu ua mu kumbuluile nguendi: “Matangua auana ku nima, ngeci mua ntsimbu ino vene, njakele mu ndzivo yange ku ma 15 ola,* haze vene umo yala ua zalele vuzalo vua ku viakula ua nji solokelele
31 naku njileka nguendi: ‘Koloneliu, Njambi na halakana vivundilo viove kaha na vuluka vukuasi vuose vu ue kuhana ku vihutu.
32 Ngeci mukemuo, tuma vantu ku mbonge ya Yopa va kasane Simone, uze uve kusana naua nguavo Petulu. Yala uaco na tulila ku ndzivo ya Simone mukua kukotongola vilambu, uze ua tungila kuyehi na kalunga ndonga.’
33 Ngeci haze vene, nja tumine vantu vaka ku sane, kaha una lingi vuino kuiza. Hano honi tu vose tuneza ku meso a Njambi linga tu halakane viuma viose via naku siki Yehova.”
34 Petulu mua vuile ngoco, ua handekele nguendi: “Mua vusunga, nji nevuisisa honi nguange nkuma Njambi kati mukua kahangu.
35 Vunoni ku miyati yose ue kutava muntu uose-ouo amu singimika na kulinga via cili.
36 Njambi ua tumine lizi liendi ku vana vaIsaleli, mu ku vambuluila muzimbu ua cili ua ciyulo ku hitila muli Yesu Kilistu. Kaha ou Yesu ikeye vene Muangana ua vose.
37 Mu tantekeya cimpande ci vakele naku handeka vantu mu Yundeya yose, ku putukila vene ku Ngalileya mu nima ya kumbatiza cambuluile Yoano.
38 Cize cimpande, ca handekele via Yesu ua ku Nazaleta, kutuala ha vati Njambi ua mu vuavesele na sipilitu santu naku mu hana ngolo. Kaha uaile na kuendangana muaya membo ose na kulinga viuma via cili naku kanguisa vose va a yandesele Satana, muomu Njambi uakele nendi.
39 Kaha etu tu vakaleho va viuma viose via lingile mu cifuti ca vaYundeya na Yelusalema, vunoni vakevo va mu tsihile mu ku mu sukika ha citi.
40 Kaha Njambi ua mu sanguile ha litangua lia mu citatu naku mu tavesa linga a soloke,
41 kati ku vantu vose vunoni kuli yetu, vakaleho vaze va a hanguile vualumo Njambi, vaze valile na kunua nendi mu nima ya kusanguka ku vatsi.
42 Cikuavo naua, ua tu sikile ngueni, tuambuluile vantu na kuhana vukaleho mu vutuntu nguetu, ikeye ya hanguile Njambi apue ngazi ya vaze vali na muono na vatsi.
43 Vapolofeto vose va hanene vukaleho kutuala hali ikeye nguavo uose amu tsiliela, vaka mu konekela vipi viendi ku hitila mu lizina liendi.”
44 Tele Petulu acili naku handeka evi viuma, sipilitu santu yezile hali vose vakele naku halakana lizi.
45 Kaha vakua kutsiliela* vaze vaile na Petulu, va likomokelele cikuma, muomu vuana vua sipilitu santu va vu muanyenene hali vakua vifuti.
46 Muomu va vavuile va handeka mu malimi aku liseza-seza naku sangaziala Njambi. Kaha Petulu ua handekele nguendi:
47 “Ava va na tambula sipilitu santu ngeci muetu, nkuma kuli umo ahasa ku vindika ku vambatiza na mema ni?
48 Ngeci ua tumine va vambatize mu lizina lia Yesu Kilistu. Kaha va lambelele Petulu akale navo mu amo matangua.
Matota
^ Ni “ua tuamenenene masualale 100”
^ Ni “civunga ca masualale va Loma va kupua 600 .”
^ Mu ciNgelengu “ola ya vu 9”
^ Mu ciNgelengu “ha ola ya vu 6”
^ Mu ciNgelengu “ha ola ya vu 9”
^ Ni “vakua kutsiliela va kulovoka”
