Vilinga Via Vapostolo 11:1-30
11 Kaha vapostolo hamolika na vamuanaye vakele mu Yundeya, vavuile nguavo vakua vifuti navo va na tambula lizi lia Njambi.
2 Ngeci Petulu muezile ku Yelusalema, vaze vakele naku hakuila cimpande ca kulovoka va putukile ku mu paya.*
3 nguavo: “Ua ka kovela mu ndzivo ya vantu va kuhona kulovoka na kulia hamo navo.”
4 Ngeci Petulu ua va lumbunuinine viose via solokele, nguendi:
5 “Yange njakele mu mbonge ya Yopa mu kuvundila. Kaha mu nja uililile mu tulo, njakele na cimo cimona. Nja muene cimo cuma ca kulifua na ntanga ya kama ya linyu, va ikutile ku mantsongo ayo auana kaha va isikuluisile ha hali yange.
6 Mu nja italele vuino, nja muene tusitu va mikono iuana, hamolika na va mu musenge, na vakua kulikoka ha mavu na tuzila.
7 Njavuile naua lizi li nji leka ngualio: ‘Petulu, katuka, tsiha ulie!’
8 Vunoni nja kumbuluile nguange: ‘Houe Muangana, muomu kanda njilieho cuma ca mazilo ni ca kuzuala.’
9 Ngeci lize lizi lia nji lekele naua lua mu civali ngualio: ‘Kati usane viuma via na lelesa Njambi nguove via kuzuala.’
10 Eci ca solokele lutatu luose, kaha haze vene ize ntanga va itualele muilu.
11 Cikuavo naua, ha ntsimbu ize vene vamala vatatu va vatumine kuli yange kutunda ku Sesaliya, va nji uanene ku ndzivo ku tuakele.
12 Ngeci sipilitu ya nji lekele nguayo, nja pande kuya navo ca kuhona kulinga vimpata. Kaha ava vamuanetu 6 navo vaile nange, tua ka kovelele mu ndzivo ya uze yala.
13 “Kaha ua tu lumbunuinine nguendi, umo kangelo ua mu solokelele ku ndzivo yendi naku mu leka nguendi: ‘Tuma vantu ku mbonge ya Yopa vaka sane Simone, uze uve kusana naua nguavo Petulu,
14 kaha aka kuleka viuma vi ua pande kulinga yove na vakua ndzivo yove vose, linga mu kovoke.’
15 Vunoni mu nja putukile ku handeka, sipilitu yezile kuli vakevo ngue mu yezile kuli yetu ha katete.
16 Eci ca nji vuluisile mezi a handekele Muangana nguendi: ‘Yoano ua mbatizile vantu na mema vunoni yenu vaka mi mbatiza na sipilitu santu.’
17 Ngeci mukemuo, nga Njambi ua va hanene vuana ngue vutua tambuile yetu tua tava muli Muangana Yesu Kilistu, yange iya honi linga nji vindike Njambi?”
18 Mu vavuile viuma evi, va likelele ku mu sompesa, kaha va zumbangeyele Njambi nguavo: “Ngoco ni, Njambi na hana vakua vifuti vukovelelo vua kualuluka linga vaka tambule muono.”
19 Kaha vaze va lisandokele omo lia kuluisa ca solokele mu nima ya kutsa ca Setefanu, vaka hetele naku Fenisia, ku Sipulu, na Antioka kaha vambuluilile lika ku vaYundeya.
20 Vunoni hakati kavo hakele vamo vamala va tundile ku Sipulu na Silene kaha vaputukile ku handeka na vakua ku handeka ciNgelengu naku vambuluila muzimbu ua cili ua Muangana Yesu.
21 Kaha livoko lia Yehova liakele navo ngeci vantu vavengi valulukile na kutsiliela muli Muangana.
22 Muzimbu uavo, ua hetele naku cikungulukilo ca mu Yelusalema ngeci va tumine Mbanambasa ku Antioka.
23 Mua ka heteleko, ua muene ngozi ya kama ya Njambi, ngeci ua viukilile cikuma na kuputuka ku kaniamesa vose va tualeleleho ku kakatela muli Muangana na mitima yavo yose,
24 muomu Mbanambasa uapuile muntu ua cili ua kusula na sipilitu santu kaha naua uakele na lutsilielo lua kama. Kaha mbunga ya kama ya putukile kutsiliela muli Muangana.
25 Ngeci Mbanambasa uaile ku Talusu mu kutonda Saulu.
26 Mua mu uanene uaile nendi ku Antioka. Kaha mu muaka ua mutuntu va kungulukile hamo na vamuanaye vose na kulongesa mbunga ya kama. Kaha kuliya na kutuamena ca Njambi, ku Antioka kukekuo ku va putukilile kusana vandongesi nguavo, Vakua Kilistu.
27 Ku matangua aze, vamo vapolofeto va tundile ku Yelusalema vezile ku Antioka.
28 Umo uavo lizina liendi Angavu, uemanene na kuputuka ku polofetala ku hitila mu sipilitu nguendi, hano ha mavu hose ha kakala ndzala ya kama. Kaha eyi ndzala, ya keleko vene ku matangua a Kalaundiu.
29 Ngeci mukemuo, vandongesi va lihakelele kapandi ka kutuma vukuasi kuli vamuanaye mu Yundeya, kuliya na muze mua haselele muntu ku muntu;
30 kaha mukemuo vene mu va lingile, va tumine vukuasi vuaco ku vakuluntu ku hitila muli Mbanambasa na Saulu.
Matota
^ Ni “ku muhisa.”
