Vilinga Via Vapostolo 12:1-25
12 Ku matangua aze, muangana Helonde ua putukile ku yandesa vamo mu cikungulukilo.
2 Ua tsihile Tiango muanaye ya Yoano na mukuale.
3 Omo Helonde ua muane nguendi via lingile viaile vaYundeya ku mitima, ua kutile naua Petulu. (Evi via solokele ku matangua a Cilika ca Mbolo Kayesi na Cimbaluila.)
4 Ua mu kuatele naku mu haka mu kamenga kaha ua mu hana ku vivunga viuana via masualale. Civunga ku civunga cakele na masualale vauana vaze vakele naku mu niunga oku va lihinga-hinga muomu uakele na vutumbe vua ku mu tuhula* ku meso a mbunga mu nima ya Paskua.
5 Ngeci va tualeleho ku niungiliya Petulu mu kamenga, vunoni cikungulikilo cakele na kuvundila kusua kumo kuli Njambi omo liendi.
6 Helonde tele alingila ku mu tuhula, Petulu ua kosele hakati ka masualale vavali oku va na mukutu malienge avali kaha kumbelo ya kamenga kuakele vakua kuniunga.
7 Vunoni talenu! Haze vene kangelo ua Yehova* ua mu solokelele, kaha ceke kalanganja mu hondo ya kamenga. Uze kangelo ua ningangele Petulu ku vimpati naku mu leka nguendi: “Katuka vuasi!” Kaha aze malienge akele ku mavoko endi a hosomokele.
8 Uze kangelo ua lekele Petulu nguendi: “Zala vizalo na vinkaku viove.” Ngeci Petulu ua lingilemo. Kangelo ua mu lekele naua nguendi: “Zala na cikovelo cove ca helu kaha nji kave.”
9 Ngeci Petulu ua tuhukile naku tualelaho ku mu kava, vunoni ka tantekeyele nguendi, vize viuma viakele na kumona ku hitila muli kangelo viakele naku lingika mpundu. Ua singaniekele nguendi, capuile lika cimona.
10 Mu va hitile ha civunga ca tuniungi ca kulivanga na ca mu civali, va hetele ha mbelo ya lipito lia vutale ize ya tala mu mbonge. Kaha lipito lia lisokolokelele livenya, ngeci mu va tuhukile vaile mu imo njila, kaha haze vene uze kangelo ua sezele Petulu.
11 Petulu mua nongonuene nguendi, ka capuile cimona, ua handekele nguendi: “Njili na vusunga honi nguange, cili vene Yehova na tumu kangelo uendi kaha naku njovola mu mavoko a Helonde naku viuma viose vi vakele na kulavelela vaYundeya nguavo vi soloka.”
12 Mu via mu lumbunukile viuma, Petulu uaile ku ndzivo ya Maliya naye ya Yoano uze uva sanene naua nguavo Mako, kuze ku va likunguluile vamo na kuvundila.
13 Petulu mua ngonguele ha lipito, umo ngamba ua mpuevo lizina liendi Londa, uezile kua kutalako.
14 Mua vuile lizi lia Petulu, ua viukilile mua kama ngeci ka sokoluele kumbelo, vunoni ua tuntilile mukati naku va leka nguendi, Petulu ali kumbelo.
15 Ngeci va mu kumbuluile nguavo: “Una zaluka ove.” Vunoni ikeye ua tualeleho ku va leka nguendi, uakele naku handeka vusunga. Ngeci va mu lekele nguavo: “Mpano kangelo uendi ni.”
16 Vunoni Petulu ua tualeleho ku ngongota ha lipito. Mu va sokoluele, va mu muene ngeci va likomokelele mua kama.
17 Vunoni ua va sovueyele linga va holoke, kaha ua putukile ku va leka vati Yehova na mu tundisa mu kamenga, munima yaco, uava lekele nguendi: “Lekenuko Tiango na vamuanetu vakuavo uno muzimbu.” Ngeci ua tundile kuze na kuya ku cihela ceka.
18 Mukua cele, kua katukile kulihoya ca kama hakati ka masualale muomu vatondele ku tantekeya vika via solokelele Petulu.
19 Helonde ua tualeleho kutonda Petulu kuose vunoni ka mu uanene. Omo liaco, uehuile tuniungi kaha na kutuma va vahane kasitiku. Mu nima yaco, ua tundile mu Yundeya na kuya ku Sesaliya, kuze kua kakele mu imo ntsimbu.
20 Helonde ua nyenguele mua kama na vantu va ku Tile na Sindone. Ngeci mu vavuile ngoco, va likunguluile na kuya kuli ikeye. Mu nima ya ku kokueya Mbalastu, mukuluntu ku ndzivo ya muangana, va pingile nguavo hakati kavo hakale ciyulo muomu cifuti cavo ca kulahelele ha viakulia viakele na kutunda mu cifuti ca muangana Helonde.
21 Tangua limo, Helonde ua zalele vuzalo vuendi vua vuangana, ua tumamene ha cituamo cendi ca vuangana na kuputuka ku handeka ku mbunga.
22 Ngeci vantu va likunguluile, va putukile ku tambakana nguavo: “Eli linapu lizi lia Njambi kati lia muntu!”
23 Haze vene kangelo ua Yehova ua mu vetele muomu ka hanene vumpahu kuli Njambi, kaha mavuno va mulile ngeci ua tsile.
24 Vunoni lizi lia Yehova lia tualeleho kukola naku lisanduoka.
25 Kaha Mbanambasa na Saulu mu va manusuile cipanga ca kukuasa mu Yelusalema, va hilukile ku Antioka hamolika na Yoano, uze uva sana naua nguavo, Mako.
