Vilinga Via Vapostolo 13:1-52
13 Mu cikungulukilo ca mu Antioka muakele vapolofeto na valongisi. Muakele Mbanambasa, Simeone uze iva sanene naua nguavo Ningele,* Lusiu ua ku Silene, Manaene uze ua lilongesele hamo na Helonde* mukua kusika, na Saulu.
2 Omo vakele na kupangela Yehova naku livindika kulia, sipilitu santu ya va lekele nguayo: “Nji hanguilenu Mbanambasa na Saulu va kalinge cipanga ci nja va sanenene.”
3 Ngeci mu nima ya ku livindika kulia na kuvundila, vava salekele mavoko kaha vava tumine vaye.
4 Ngeci ava vamala va ya tumine sipilitu santu, vaile ku Seleusiya, mu nima yaco, vaile ku Sipulu mu mbapolo.
5 Kaha omo vaka hetele ku Salamisi, va putukile kuambulula lizi lia Njambi mu visingangona via vaYundeya. Na Yoano uakele hamo navo mu ku va kuasa.
6 Mu nima ya ku zinguluka nkundu yose, va hetele ku Pafose kaha va uaneneko umo kaYundeya lizina liendi, Mbaleyesu. Ou uaco uapuile mukua kupanda kaha naua kapolofeto ua makuli.
7 Uakele hamo na nguvulu Selengiu Paulu, yala mukua mana. Kaha ou nguvulu ua sanene Mbanambasa na Saulu muomu ua tondele ku halakana ku lizi lia Njambi.
8 Vunoni Elimase mukua kupanda (muomu vikevio vilia lumbunuka lizina liaco), ua putukile ku va luisa na vutumbe vua ku tangula nguvulu kati a tsiliele.
9 Kaha Saulu uze uva sanene naua nguavo Paulu, ua sulile na sipilitu santu, ua mu talele sui
10 naku mu leka nguendi: “Ove yala ua kusula na makuli na vilinga via kuvihia viose, muana Ndiavu, citozi ua viuma viose via vuviuke, nkuma kasi uci luisa vinjila viose via Yehova via ku sungama ni?
11 Halakana! Livoko lia Yehova lili hali yove, upua kapuputa, ka umono litangua mu imo ntsimbu.” Kaha haze vene, mbundu na milima via mu fuikile, ngeci ua putukile ku lizenga noku-noku mu ku puputiya muntu amu kuata ku livoko linga amu tuamenene.
12 Nguvulu mua muene viuma via solokele, ua tsilielele muli Muangana. Muomu ua komokele mua kama vilongesa via Yehova.
13 Kaha Paulu na vakuavo vendele nendi, va zavukile kutunda ku Pafose na kuya ku Pelenga mu Pamefiliya. Vunoni Yoano ua va sile kaha ua hilukile ku Yelusalema.
14 Ngeci vakevo va tualeleho vungendzi vuavo, kutunda ku Pelenga na kuya ku Antioka ya ku Pisindia. Kaha ha litangua lia Sapalalo va kovelele mu sinangonga, ngeci va tumamene.
15 Mu nima ya ku tandela mbunga Lisiko na Visoneka via Vapolofeto, vantuamena va mu sinangonga va tumine vantu vaka valeke nguavo: “Enu vamuanetu, nga muli na mezi aku kanyamesa mbunga, handekenu.”
16 Ngeci Paulu ua katukile ua va sovueyele na livoko linga va holoke kaha ua handekele nguendi:
“Enu vamala, enu vaIsaleli, nenu vose mua singimika Njambi, halakanenu kuno.
17 Njambi yava vantu, vaIsaleli, ua hanguile vakukuluila vetu kaha ua va hakele ku vukama mu vakele mu cifuti ca vungendzi mu Ingitu, naku va patulamo na livoko liendi lia ngolo.
18 Kampe mu miaka 40 yose mu likango, Njambi ua vecelele va linge muose-omuo mu va zangele.
19 Mu nima ya kunongesa miyati 7 mu cifuti ca Kanana, Njambi ua va haneneco mu kupua vusuana vuavo.
20 Viose evi via solokele mu miaka iheta ku 450.
“Mu nima yaco, ua va hanene vangazi kuheta na hali kapolofeto Samuele.
21 Vunoni va lilombelele muangana, ngeci Njambi uava hanene Saulu muana Kise, yala ua ku muyati ua Mbenjamini kaha ua sikile mu miaka 40.
22 Kaha omo Njambi ua mu tundisileho, uava hanguilile Ndaviti kupua muangana uavo. Hali ou vene, Njambi ua hanene vukaleho nguendi: ‘Nja uana Ndaviti muana Njese, yala ue ku njiya ku mutima; ikeye aka linga viuma viose vi nji tonda.’
23 Kuliya na cikulaheso cendi, Njambi na tundisa Yesu ku mbuto you yala, naku mu hana ku vaIsaleli mu kupua muovole.
24 Kaha ntsimbu kanda ou muovole ahete, Yoano ua livangele kuambuluila vaIsaleli vose via mbatizimu ize yapua citantekeyeso ca kualuluka ku vipi.
25 Vunoni Yoano muakele ku ntsongo ya cipanga cendi, ua handekele nguendi: ‘Muli naku singanieka nguenu yange iya? Kati yange umuli naku vandamena. Vunoni talenu! Kuli umo ali na kuiza mu nima yange kaha ku nja fuilile ku mu sulula ambe vinkaku viendi.’
26 “Enu vamuanetu, vatekuluila va vusoko vua Avilahama na vaze ve ku singimika Njambi vali hakati kenu, uno muzimbu ua kuovoka va na utumu kuli yetu.
27 Muomu vantu va mu Yelusalema na vakua ku va sika, kava mu tavele nguavo ikeye Mesiya. Vunoni mu va mu sompesele, va puisilemo mezi ava handekele Vapolofeto ave kutanda Sapalalo ku Sapalalo.
28 Vutuhu kava mu uanene na mulonga ua ku mu tsihila, vunoni va kakateyele Pilato linga atume vantu va mu tsihe.
29 Kaha mu nima ya ku puisamo viuma viose viva sonekele kutuala hali ikeye, va mu tundisile ha citi naku mu haka mu mbumbo.
30 Vunoni Njambi ua mu sanguile ku vatsi.
31 Mu matangua a engi, ua solokele kuli vaze vendele nendi kutunda ku Ngalileya na kuya ku Yelusalema. Ava vakevo vanapu honi vakaleho vendi ku vantu.
32 “Ngeci mukemuo, tuli naku miambuluila muzimbu ua cili kutuala ha cikulaheso ca lingile Njambi ku vakukuluila vetu.
33 Njambi na puisamo vuino cikulaheso caco kuli yetu vana, mu ku sangula Yesu ngue mu va soneka ku samo ya mu civali nguavo: ‘Ove u muanange; lelo, yange njinapu iso.’
34 Kaha kutuala ha ku mu sangula ku vatsi linga kati avole, Njambi ua vi handekele laza nguendi: ‘Nji ka mi hana mezi a cilemo cayaye, a vusunga* aze anja kulahesele Ndaviti.’
35 Ku samo ikuavo va handekako naua nguavo: ‘Ka u kecelela mukua ku kakatela kuli yove avole.’
36 Ndaviti ua pangelele Njambi ku ntsimbu yendi, ua kosele tulo va kutsa, ngeci va mu tsindile hamo na vakukuluila vendi, kaha ua volele.
37 Vunoni uze ya sanguile Njambi, ka volele.
38 “Ngeci mukemuo vamuanetu, njili naku miambuluila ngecize, Njambi aka mi konekela vipi vienu, ku hitila muli uno yala.
39 Kaha ku hitila muli ikeye, uose uze a tsiliela, a sambua ku viuma viose viva tumbuile nguavo viapua mulonga, kuliya na Masiko a Mosesa.
40 Ngeci mukemuo, zangamenu linga viuma viva handekele Vapolofeto kati vize hali yenu. Va handekele nguavo:
41 ‘Talenu, enu vakua kayengu; likomokelenu kaha nongenu, muomu njili na kulinga cipanga ku ntsimbu yenu. Cipanga cize ca kulinga ka mu ka citava ambe nga muntu ami lumbunuinaco mu vutuntu.’”
42 Mu vakele na kutuhuka, vantu vava lambelele linga va ku handeke naua evi vimpande lia Sapalalo ya hateleko.
43 Mu ca huile ciuano mu sinangonga, vaYundeya vavengi na vaze va lipuisile vaYundeya vaze vakele na kulemesa Njambi, va kavele Paulu na Mbanambasa. Kaha mu vakele na kuhandeka navo, Paulu na Mbanambasa vava lekele nguavo, va tualeleho kukala mu ngozi ya kama ya Njambi.
44 Kaha lia Sapalalo ya hateleko, kampe vantu vose mu mbonge, va likunguluile linga va halakane ku lizi lia Yehova.
45 VaYundeya mu va muene viuma viose vize, vavuile cipululu. Ngeci vakele na kuviana na kasahuntu viuma viose viakele naku handeka Paulu.
46 Ngeci Paulu na Mbanambasa vava lekele na kusimpa cose nguavo: “Tele nga ca pandele kuambulula lizi lia Njambi kuli yenu ha katete. Vunoni mu kulinga muli na kuviana kaha mua limono nguenu ka mua fuililile kuyoya miaka yose, mukemuo! Tu kambuluila honi vakua vifuti.
47 Muomu Yehova na tu sika nguendi: ‘Nja ku hangula mu kupua ceke ku vakua mavu, linga uambulule muzimbu ua kuovoka na kuze kua lenga mavu.’”
48 Omo vaze vakua vifuti vavuile ngoco, va viukilile muakama na kuhana vumpahu lizi lia Yehova. Kaha vose vaze vakele na cizango ca ku ka tambula muono ka ue kuhua, va tsilielele.
49 Cikuavo naua, lizi lia Yehova liakele na kulisanduoka mu membo ose.
50 Vunoni vaYundeya va songangeyele vampuevo va lutsimo, vaze va singimikile Njambi kaha na vakuluntu va mu mbonge yaco. Ngeci va putukile kuluisa Paulu na Mbanambasa naku va sekuila hambandza ya vinginga viavo.
51 Ngeci Paulu na Mbanambasa va totomuene ku viliato viavo mu kupua vukaleho kaha vaile ku Ikoniu.
52 Kaha vandongesi va tualeleho kusula na ndzolela na sipilitu santu.
Matota
^ Ni “Kazivale”
^ Ou Helonde ikeye Helonde Antipa muana Helonde ua Kama.
^ Ni “a mu hasa ku kulahela”
