Vilinga Via Vapostolo 14:1-28
14 Ku Ikoniu, Paulu na Mbanambasa va kovelele mu sinangonga ya vaYundeya kaha va handekele mu cifua ca kulinga, civunga ca kama ca vaYundeya na vaNgelengu va tsilielele.
2 Vunoni vaYundeya vaze ka va tsilielele, va songangeyele vakua vifuti linga valuise vamuanetu.
3 Ngeci mukemuo, Paulu na Mbanambasa va simbuileho ntsimbu ya kama mu kuambulula na kusimpa cose na ngolo ya Yehova, uze ua muesele vukaleho vua muzimbu ua ngozi yendi ya kama, mu ku va hana ngolo ya kulinga vitantekeyeso na vikomoueso.
4 Vunoni mbonge ya litepele hakati, vamo vakele ku mutamba ua vaYundeya vakuavo co ku mutamba ua vapostolo.
5 Ngeci mukemuo, vakua vifuti hamolika na vaYundeya na vakua ku va sika, va tondele ku sahula Paulu na Mbanambasa na kuvasanga mavue.
6 Vunoni mu vava lekele via vutumbe vuaco, va teuelele mu membo amu Likaonia, Listala na Ndeleve na membo akuavo a hateleko.
7 Kaha kuze, va tualeleho kuambulula muzimbu ua cili.
8 Mu Listala muakele umo yala, uakele na kutumama lika. Uapuile cilema ca mikono tunde ha ku semuka cendi.
9 Ou yala, uakele naku halakana Paulu muakele naku handeka. Ngeci Paulu mua mu talele sui, ua muene nguendi uakele na lutsilielo lue ku mu kuasele ku kanguka.
10 Ngeci ua mu lekele na lizi lia ku kanguka nguendi: “Katuka.” Haze vene, uze yala ua tumbukile na kuputuka kuenda.
11 Kaha mbunga muya muene via lingile Paulu, va tambakanene mu lilimi lia Likaonia, nguavo: “Vanjambi vaneza kuli yetu mu cifua ca vantu!”
12 Ngeci va putukile kusana Mbanambasa nguavo, Zeuse, vunoni Paulu co nguavo, Helemese muomu ikeye uakele naku handeka cikuma kuhiana mukuavo.
13 Vunoni sasendote ua Zeuse, uze uakele na tembele ku vukovelelo vua mbonge, ua nehele vangombe na vintemo ku vimbelo kaha ua tondele kuhana vikombelo hamolika na mbunga.
14 Vunoni vapostolo Mbanambasa na Paulu mu va vivuile, va tavuile vizalo viavo naku tuntila mukati kambunga kaha va tambakanene nguavo:
15 “Enu vamala vika muli naku vilingila evi? Netu tu vantu va kuzeya ngeci muenu. Tuli naku miambuluila lika muzimbu ua cili linga museze vilinga vienu via kuvihia, kaha mualuluke kuli Njambi ua muono uze ua tangele lilu, mavu, kalunga ndonga na viose via kalamo.
16 Ku mazimo aku nima, uecelele vakua vifuti viose va liendele mu vinjila viavo vavene.
17 Vutuhu ngoco, ua mi muesele vukaleho vua viuma via cili via lingile, ua mi hanene niondzi, vimbuto viavingi ha ntsimbu ya kutia kaha naku mi hana viakulia viavingi linga mitima yenu isule na ndzolela.”
18 Vutuhu vava lekele evi viuma, vunoni ca kaluuile cikuma ku vindika ize mbunga linga kati vava hane vikombelo.
19 Vunoni vaYundeya va tundile ku Antioka na Ikoniu, va songangeyele mbunga ngeci vasele Paulu mavue, naku mu kokela ha mbandza ya mbonge muomu va singaniekele nguavo natsi.
20 Vunoni vandongesi mu va mu zengelekele, ua hindukile naku hiluka naua mumbonge. Lia mukuavo, uaile ku Ndeleve na Mbanambasa.
21 Mu va manusuile kuambulula muzimbu ua cili muze mu mbonge, na kupuisa vantu vavengi vandongesi, va hilukile ku Listala, Ikoniu na Antioka.
22 Kaha kuze, va kaniamesele vandongesi naku va kolesa linga va tualeleho ku kakatela ku lutsilielo, mu ku va leka nguavo: “Tua pande kuhita mu tuyando tua tuingi, ntsimbu kanda tu kovele mu Vuangana vua Njambi.”
23 Cikuavo naua, vava hanguilile vakuluntu mu cikungulukilo ku cikungulukilo, va vundilile, vali vindikile kulia kaha vava kundikile mu mavoko a Yehova, uze uva tsilielele.
24 Mu nima yaco, va hitile mu Pisindia naku ka kovela mu Pamefiliya.
25 Kaha mu va manusuile kuambulula lizi ku Pelenge, vaile ku Atalia.
26 Mu nima yaco, va hilukile na vuato ku Antioka, kuze ku va vundilile vamuanetu linga Njambi ava vezikise, va puisemo eci cipanga ci va na manusula.
27 Mu va hetele, va kunguluile cikungulukilo cose naku va leka viuma viavingi via lingile Njambi ku hitila muli vakevo, na vati Njambi ua sokoluelele vakua vifuti njila* linga va tsiliele.
28 Kaha vakele kuze na vandongesi mu ntsimbu ya kama.
Matota
^ Mu ciNgelengu “mbelo ya lutsilielo”
