Vilinga Via Vapostolo 15:1-41
15 Vamo vamala va tundile ku Yundeya va putukile ku longesa vamuanetu nguavo: “Kuliya na Masiko a Mosesa, kuvanga mu vose mu na lovoka, kati ngoco ka mu kovoka.”
2 Vunoni Paulu na Mbanambasa, va lingile navo vimpata na kulihoya navo ngeci vamuanetu va hanguile Paulu na Mbanambasa, na vamo va ku mutamba uavo, vatuale cimpande caco ku vapostolo na vakuluntu mu Yelusalema.
3 Kaha mu nima ya cikungulukilo ku va sindikiya kamo kantunda, va tualeleho na vungendzi vuavo. Va hitile mu Fenisia na mu Samaliya, oku va lumbununa mu vutuntu vati vakua vifuti valulukile kaha va vuisile vamuanetu vose ndzolela ya kama.
4 Omo va hetele mu Yelusalema, vamuanetu vakua cikungulukilo cize, vapostolo, hamolika na vakuluntu vava tambuile mua cili, kaha Paulu na Mbanambasa va tangele muzimbu ua viuma viose via lingile Njambi ku hitila muli vakevo.
5 Vunoni vamo vakua civunga ca vaFaliseu, vaze vapuile honi vakua kutsiliela, va katukile mu vituamo viavo naku handeka nguavo: “Citondeka ku va lovola naku va sika va niunge Masiko a Mosesa.”
6 Ngeci vapostolo na vakuluntu, va likunguluile linga va hilule ha cimpande caco.
7 Mu nima ya kulihoya cikuma ha cimpande caco, Petulu ua katukile naku handeka nguendi: “Enu vamuanetu, mu tantekeya ngecize ku matangua akatete, Njambi ua nji hanguile hakati kenu linga ku hitila muli yange, vakua vifuti vevue lizi lia muzimbu ua cili, kaha va tsiliele.
8 Kaha Njambi uze a tantekeya mitima ya vantu, ua muesele vukaleho mu ku va hana sipilitu santu ngue muze mua tu haneneyo yetu.
9 Kaha ka muesele kahangu hakati ketu navo, vunoni ua lelesele mitima yavo omo lia lutsilielo luavo.
10 Ngeci mukemuo, vika muesekela Njambi mu kutuika ha vintsingo via vandongesi mukambo ua kulinga, ambe vakukuluila vetu ni yetu, katuasele ku uambata?
11 Vunoni tua tsiliela nguetu, tu kovoka ku hitila mu ngozi ya kama ya Muangana Yesu, ngue mu va na tsiliela navo nguavo va kovoka.”
12 Ngeci ize mbunga yose ya holokele kulu, kaha va putukile ku halakana kuli Mbanambasa na Paulu, mu vakele naku handeka via vitantekeyeso na vikomoueso viavingi, via lingile Njambi kuli vakua vifuti ku hitila muli vakevo.
13 Kaha omo Mbanambasa na Paulu va manusuile ku handeka, Tiango ua kumbuluile nguendi: “Enu vamuanetu nji halakanenu,
14 Simeone* na tu lumbunuina mua cili vati Njambi na tuala mana kuli vakua vifuti lua katete, naku hangulaho vamo vava ka sanesa lizina liendi.
15 Kaha evi via litombola na mezi ava sonekele vapolofeto nguavo:
16 ‘Mu nima yevi viuma, nji ka hiluka naku tungulula naua mbalaka ya Ndaviti ize ina sihuka. Nji ka tungulula vize vi na vihia naku ihiluisa ngue muya fuile laza,
17 linga vantu vaze va salako va tonde mua kama Yehova,* hamolika na vantu vaku vifuti viose, vantu vaze vave kusana lizina liange, nguendi Yehova, uze ali na kulinga evi viuma viose,
18 viva tantekeya vantu tunde ku laza.’
19 Ngeci mukemuo, kuli yange, ka tua pandele ku kaluuisa miono ya vakua vifuti vali na kualuluka kuli Njambi,
20 vunoni tu va sonekelenu nguetu, vazile ku viuma vi na zuala na tumponya, ku vupangala,* ku via kutekenya naku maninga.
21 Muomu tunde ku laza, kuli vantu ve kuambulula visoneka via Mosesa mu mbonge ku mbonge, kaha ku vi sapalalo viose ve ku vi tanda na lizi lia kama mu visinangonga.”
22 Ngeci vapostolo na vakuluntu, hamolika na cikungulukilo cose, va muene nguavo, cacili va hangule vamo vamala hakati kavo, va vatume ku Antioka, hamolika na Paulu na Mbanambasa. Va tumine Yundasa uva sanene naua Mbalasamba, na Silase, vamala vaze vakele na kutuamenena hakati ka vamuanetu.
23 Kaha va sonekele uno mukanda naku va hanauo va uambate nguavo:
“Tua mi meneka enu vamuanetu vakua vifuti muakala ku Antioka, ku Silia na Silisia! Tambulenu mukanda kuli yetu vamuanoko vapostolo hamolika na vakuluntu.
24 Tunevu nguavo, vamo hakati ketu, vaneza mu ku mi pindisa na viuma viva na handeka, mu ku seteka ku tanganesa lutsilielo luenu, vunoni etu ka tua va sikile na vimo viahi.
25 Ngeci mukemuo, tu vose tua litavasiana mu ku hangula vamala naku va tuma kuli yenu, hamolika na vamuanetu va tua lema, Mbanambasa na Paulu,
26 vamala ava va na hana miono yavo omo lia lizina lia Muangana uetu Yesu Kilistu.
27 Cikuavo naua, tuli naku mi tuma Yundasa na Silase, linga mua ku livuile naua mu tunua tuavo, viuma vi tua mi sonekela.
28 Muomu sipilitu santu hamolika netu, tua mono nguetu, ka tua pandele ku mi vuezelela ku citeli, kuvanga lika vino viuma vi na hatako vitondeka:
29 tualelenuho kuzila ku viuma viva na kombeleya ku tumponya naku maninga, naku viuma via kutekenya,* naku vupangala.* Nga mu liniunga vuino ku viuma vino, muka kala mua cili. Mitende yenu!”
30 Ngeci mu nima ya ku vasika, ava vamala vaile ku Antioka kaha vaka kunguluile civunga cose naku vahana mukanda.
31 Mu va manusuile ku utanda, vavuile ndzolela ya kama omo lia mezi aku va kaniamesa.
32 Mu kulinga Yundasa na Silase navo vapuile vapolofeto, va kaniamesele vamuanetu na vimpande viavingi.
33 Mu nima ya kukala navo imo ntsimbu, vamuanetu vava salesele na ciyulo, linga va hiluke kuli vaze vava tumine.
34 ——
35 Vunoni Paulu na Mbanambasa va salele mu Antioka, mu ku longesa na kuambulula muzimbu ua cili ua lizi lia Yehova hamolika na vamuanaye vavengi.
36 Mu nima ya amo matangua, Paulu ua lekele Mbanambasa nguendi: “Tu ci hiluke, mu vimbonge viose mu tuambuluilile lizi lia Yehova, tu ka mone vati vali vamuanetu.”
37 Mbanambasa ua tondele vaye hamolika na Yoano, uze uva sanene naua nguavo Mako.
38 Vunoni Paulu ka tondele vaye nendi, muomu Yoano uava sezele ku Pamefiliya, kaha kaile navo mu cipanga ca kuambulula.
39 Omo liaco, va putukile ku licokota mua kama ngeci va litepele. Kaha Mbanambasa uaile na Mako ku Sipulu.
40 Paulu co ua hanguile kuya na Silase, kaha vamuanetu mu va manusuile ku mu kundika mu ngozi ya kama ya Yehova, vaile.
41 Ngeci ua hitile mu Silia na Silisia oku a kaniamesa vikungulukilo.
Matota
^ Eyi inapu njila ikuavo ya ku sonekelamo lizina Simone Petulu.
^ Talenu Mizimbu ya ku Vuezako
^ Mu ciNgelengu “Porneia.” —Talenu Mezi ava Lombolola
^ Ni “viva na tsihi ca kuhona kumuanya maninga”
^ Mu ciNgelengu “Porneia.” —Talenu Mezi ava Lombolola
