Vilinga Via Vapostolo 16:1-40
16 Kaha uaka hetele ku Ndeleve na Listala. Kuze, kuakele umo ndongesi lizina liendi Timoteu, naye uapuile kaYundeya mukua kutsiliela, vunoni ise uapuile kaNgelengu.
2 Timoteu uakele na lutsimo lua cili hakati ka vamuanetu va ku Listala na Ikoniu.
3 Paulu ua tondele kuya na Timoteu, ngeci ua mu lovuele omo lia vaYundeya vakele ku vihela vize muomu vose va tantekeyele ngecize ise uapuile kaNgelengu.
4 Mu vakele naku hitangana mu vimbonge, vakele na kuleka vamuanetu linga vononoke masiko a vapostolo hamolika na vakuluntu va mu Yelusalema.
5 Omo liaco, vikungulukilo via tualeleho kukola mu lutsilielo kaha tangua na tangua, vantu vakele naku livuezelela.
6 Kaha vahitile ku Filingia na mu cifuti ca Ngalata, muomu sipilitu santu ya va vindikile kuambulula lizi ku mitambela ya Asia.
7 Cikuavo naua, mu va hetele ku Misia, vesekele ku kovela mu Mbitinia, vunoni sipilitu ya Yesu kasi vene ya va vindikile kulingamo.
8 Ngeci va tuvakanene Misia, na kuya ku Toloase.
9 Ku vutsiki, Paulu uakele na cimo cimona. Ua muene umo yala nemana mu ku mu lambelela nguendi: “Tuaya kuno ku Masendonia ua ku tu kuase.”
10 Mu nima ya Paulu kukala neci cimona, tuesekele kuya ku Masendonia, muomu tua singaniekele nguetu, Njambi ikeye ali naku tusana linga tu ka vambuluile muzimbu ua cili.
11 Ngeci mukemuo, tua tundile ku Toloase na mbapolo kaha tuaile vene ye, naku Samotalase. Lia mukuavo, tua ka hetele ku Neopolisi.
12 Ku tundaho tuaile ku Filipu, mbonge yakele ku mavoko a vakua Loma kaha naua yapuile ya kama mu Masendonia, tua kelemo amo matangua.
13 Lia Sapalalo, tua tuhukile mu mbonge kaha tuaile ku mukulo ua ndonga, muomu tua singaniekele nguetu kukekuo kuakele cihela ca kuvundilila, tua tumamene kuze na kuputuka ku simutuila na vampuevo va likunguluileko.
14 Kuakele umo mpuevo uakele naku tu halakana, lizina liendi Lindia, uaku mbonge ya Tiatila uze uapuile mukua ku landesa vintanga na vizalo via kutila kaha naua, mukua ku lemesa Njambi. Yehova* ua sokoluele mutima uendi, linga a halakane vuino viuma viakele naku handeka Paulu.
15 Mu nima ya ku mu mbatiza hamolika na vakua ndzivo yendi, ua tu kakateyele nguendi: “Nga mue ku nji mona nguenu, nji mukua kuononoka Yehova, tuayenu mua ku kale ku ndzivo yange.” Kaha ua tu sindiyile noho tuaileko.
16 Tangua limo, mu tuakele na kuya ku cihela ca kuvundilila, tua liuanene na umo ngamba ua muanampuevo, uakele na umo sipilitu, ni nguetu ndemone mukua kutaha. Muanampuevo uaco, uakele naku fukisa mua kama vasukuluendi omo lia kutaha vi ka soloka ku lutue.
17 Kaha ua tualeleho kukava Paulu hamolika netu oku a tambakana nguendi: “Ava vamala vanapu vangamba va Njambi Mukua Kuhiana Viose kaha vali naku miambuluila njila ituala ku kuovoka.”
18 Kaha ua tualeleho ku lingamo mu matangua a engi. Ngeci Paulu ua vuile cisulila kaha ua tengulukile na kuleka uze sipilitu nguendi: “Mu lizina lia Yesu Kilistu, nji kuleka nguange, tunda muli ikeye.” Ngeci haze vene ua mu tundile.
19 Omo vasukuluendi, vamuene nguavo ka va fuku naua, vakuatele Paulu na Silase kaha vava kokangeyele naha citanda, ku meso a vakua kusika.
20 Mu va hetele ku meso a vakua kusika, va handekele nguavo: “Ava vamala vali na kuneha liuayanga lia kama mu mbonge yetu. Vapua vaYundeya
21 kaha vali na kulongesa yoyesi ka citava tukale nayo cipue ku ikava muomu yetu tu Vakua Loma.”
22 Ngeci mbunga yose yava kungulukilile kaha vakua kusika va tavuile vizalo via Paulu na Silase na kutuma vaka vapupe na vimbueti.
23 Mu nima ya ku vapupa cikuma, vava sokele mu kamenga kaha va lekele mukua kuniunga kamenga ava niunge vuino.
24 Mu kuononoka eli lisiko, ua va hakele mu hondo ya mukati ka kamenga kaha ua pandekele mikono yavo na mavaya.*
25 Vunoni mukati ka vutsiki, Paulu na Silase vakele na kuvundila naku sangaziala Njambi na miaso kaha vindzinda vakuavo vakele na kuivuako.
26 Haze vene, kua katukile lindunduma lia kama ngeci luvula lua kamenga lua linikile, kaha tungumuku! Vimbelo viose via kamenga via sokolokele na malienge a vindzinda vose azitukile.
27 Kaniungi mua nyangumukile ku tulo, ua muene vimbelo via kamenga viose via casi, ngeci ua somuene mukuale uendi na kutonda ku litsihia, muomu ua singaniekele nguendi vindzinda vose va na teua.
28 Ngeci Paulu ua mu tambakanene nguendi: “Kati uli vulumune, tuvose mutuli muno!”
29 Ngeci uze kaniungi ua pingile vindeya naku tuntila mukati oku alizazela, kaha ua tsikamene ku mikono ya Paulu na Silase.
30 Ngeci ua va tuhuile naku vehula nguendi: “Vakuluntu, vika nja pande kulinga mangana nji kovoke?”
31 Kaha va mu kumbuluile nguavo: “Tsiliela muli Muangana Yesu kaha nove na vakua ndzivo yove mu kovoka.”
32 Ngeci va muambuluilile lizi lia Yehova, hamolika na vakua ndzivo yendi.
33 Ha ola ize vene ya vutsiki, uaile navo naku ka va kusa ha vimbandu. Kaha haze vene, va mu mbatizile hamolika na vakua ndzivo yendi vose.
34 Ngeci ua va tualele ku ndzivo yendi naku vahana viakulia, kaha ua viukililile cikuma hamolika na vakua ndzivo yendi vose, omo lia kutsiliela muli Njambi.
35 Mu kua cele, vaze vakua kusika va tumine tupaso* vavo, vaka leke uze kaniungi nguavo: “Zitula ava vamala vaye.”
36 Ngeci uze kaniungi ua lekele aa mezi kuli Paulu nguendi: “Vakua kusika va na tumu tupaso vavo nguavo, enu mu vavali nja pande ku miecela muye. Ngeci mukemuo, tuhukenu hano vene, endenu na ciyulo.”
37 Vunoni Paulu ua mu kumbuluile nguendi: “Va tu pupilile ha mbunga naku tu soka mu kamenga ntsimbu kanda va tu uane na mulonga* vutuhu tu Vakua Loma. Vuno va tonda honi ku tu tuhula mu vusueke? Kuahi! Veze vene vakevo, vaku tu tuhulemo.”
38 Tupaso va kambuluile aa mezi kuli vakua kusika, ngeci vakua kusika vakele na liova muomu vavuile nguavo vaze vamala navo vapuile Vakua Loma.
39 Ngeci vaileko na kupinga ku konekela, mu nima yaco, vava tuhuisile mu kamenga naku va sindikiya kaha vava pingile va tuhuke mu ize mbonge.
40 Vunoni Paulu na Silase, mu va tuhukile mu kamenga, vaci ile ku ndzivo ya Lindia. Kaha mu vamuene vamuanaye, vava kanyamesele, mu nima yaco, vaile.
Matota
^ Talenu Mizimbu ya ku Vuezako
^ Ni “mu vinkuli.”
^ Ni “misipayi”
^ Ni “ntsimbu kanda va tu sompese”
