Vilinga Via Vapostolo 17:1-34
17 Kaha omo va tuvakanene Amefipolise na Apolonia, va hetele ku Tesalonika, kuze kuakele sinangonga ya vaYundeya.
2 Ngue ku kalingo-lingo kendi, Paulu ua kovelele mu sinangonga na kuputuka ku simutuila navo, kaha masapalalo atatu ose ua hiluile navo muku pangesa Visoneka.
3 Uava lumbunuinine naku va muesa vukaleho vua mu Visoneka nguendi, ca pandele Kilistu kuyanda na kusanguka ku vatsi, uava lekele nguendi: “Ou Yesu ikeye vene Kilistu, injili naku miambuluila.”
4 Omo liaco, vamo hakati kavo va putukile kutsiliela, naku lipandakana kuli Paulu na Silase kaha mbunga ya kama ya vaNgelengu vakua ku lemesa Njambi, navo va lingilemo hamolika na vampuevo vavengi va lutsimo.
5 Vunoni vaYundeya vavuile cipululu, ngeci va kunguluile vamala vakua vilinga via kuvihia vakele na kuendangana ha citanda, kaha ava vaco va likunguluile na kuputuka kulinga liuayanga mu mbonge. Va tuvile ndzivo ya Yasone na kuputuka kutonda-tondamo Paulu na Silase, linga vava nehe ku cize civunga ca luozi.
6 Mu kulinga ka vava uanenemo, va kokangeyele Yasone na vamo vamuanetu naku va tuala kuli vakua kusika mbonge, oku va tambakana nguavo: “Vaze vamala vakua kuneha liuayanga ha mavu va na hete honi na kuno,
7 kaha Yasone na va tambula ku ndzivo yendi, ava vamala vose ve kuluisa masiko a Sezale na kuamba nguavo, kuli muangana ueka, lizina liendi Yesu.”
8 Mu vavuile ngoco, mbunga yose na vakua kusika mbonge, vanyenguele mua kama.
9 Ngoco vene, mu nima ya ku tambula kapopo kuli Yasone na vakuavo, va vecele vaye.
10 Vunoni ku vutsiki vuze vene, vamuanetu va sevunuisile Paulu na Silase, linga vaye ku Mbeleya. Mu vaka heteleko, va kovelele mu sinangonga ya vaYundeya.
11 Vakua Mbeleya vakele na mutima ua cili cikuma ku tuvakana vakua Tesalonika, muomu va tavele lizi lia Njambi na mutima uose, kaha tangua na tangua va hiluile Visoneka na civando, linga va mone nga viuma viva lilongesele viapuile via vusunga.
12 Ngeci mukemuo, vavengi hakati kavo va tsilielele kaha vampuevo vavengi va lutsimo vaze vapuile vaNgelengu hamolika na vamo vamala, navo va tsilielele.
13 Vunoni vaYundeya va ku Tesalonika mu va vuile nguavo, Paulu ali na kuambulula lizi lia Njambi na kuli vakua Mbeleya naua, vaileko mu ku ka songangeya mbunga naku kakatula mbuanja.
14 Vunoni haze vene, vamuanetu vatumine Paulu asikumuke ku kalunga ndonga, vunoni Silase na Timoteu va salele kuze.
15 Vaze va sindikiyile Paulu, vaka mu hetesele naku Atena, kaha va hilukilemo mu nima ya ku va sika nguendi, Silase na Timoteu va pande kuiza vuasi-vuasi.
16 Ntsimbu uakele naku va vandamena ku Atena, Paulu ua nyenguele cikuma, mua muene ngecize ize mbonge ina sulu na tumponya.
17 Ngeci ua putukile kusimutuila na vaYundeya mu sinangonga na vakuavo vakele naku lemesa Njambi. Cikuavo naua, tangua na tangua uakele naku simutuila na vaze va liuanene nendi ha citanda.
18 Vunoni vamo vakua mana, vava tumbula nguavo vaEpikuliu na vaSetoiku, va putukile kulinga nendi vimpata. Vamo va handekele nguavo: “Vika atonda ku handeka ou mukua ku tambangela?” Vakuavo nguavo: “A soloka ngue mukua kuambulula via vanjambi veka.” Va handekelemo, muomu va muene Paulu ambulula muzimbu ua cili kutuala hali Yesu na cisangukilo.
19 Ngeci va mu kuatele naku mu tuala ku muncinda ua Aleopangu kaha va handekele nguavo: “Aci tu lekeko evi vilongesa via viha viuli na kuambulula?
20 Muomu vimo viuma viuli naku handeka, keti via vundambo kuli yetu ngeci tu tonda ku tantekeya vulumbunuiso vua viuma viaco.”
21 Muomu vose vakua Atena na vakua vifuti vieka, ha ntsimbu yavo ya ku sikama ku vakele na kulinga viuma vieka, kuvanga ku lileka ni kuhalakana mizimbu ya iha.
22 Omo liaco, Paulu ua katukile hakati kavo ku muncinda ua Aleopangu naku handeka nguendi:
“Enu vakua Atena, nja mono nguange ku viuma viose, kutuala ha kuvuila vanjambi vuoma, yenu mua tuvakana vakuenu vose.
23 Ca ku muenako, mu nji na kala naku hitangana mu mbonge, naku talesesa vuino viuma vi mue kulemesa, nja uana umo mutula ha va soneka nguavo, ‘Kuli Njambi ku tu Tantekeya.’ Ou Njambi imue ku lemesa ca kuhona ku mu tantekeya, ikeye vene injili naku miambuluila.
24 Njambi uze ua tangele mavu na viose via kalaho, mu kupua Muangana ua melu na mavu kakele mu vitembele via kutunga na mavoko a vantu;
25 kaha naua ka citondeka mavoko a vantu amu pangele, ngue nguavo kuli vimo via mu kambela, muomu ikeye ue kuhana vose muono, na muku na viuma viose.
26 Ikeye ua tangele miyati yose ya vantu, ku tundilila ku muntu umolika, linga vakale hano ha mavu ose. Ua hangula vintsimbu via viuma viavingi kaha ua teta vinginga via vihela viva pande kukala vantu,
27 linga va tonde Njambi, nga va mu papateya, cili vene vaka mu uana, muomu ikeye kesi ku lahako netu vose.
28 Muomu omo liendi, tuli na kuyoya, kuenda kaha ku tua kala, ngue mu va handekele vamo vakua kusoneka venu nguavo, ‘Muomu netu vene tu vana* vendi.’
29 Ngeci mukemuo, mu kulinga tu vana va Njambi, ka tua pandele ku singanieka nguetu Njambi ua lifua na olu, palata ni livue liose olio lia seho ni cipue viuma via kusonga na mana a vantu.
30 Eyo, Njambi na suvu vintsimbu vize vi muakele ku ndzimba, vunoni hano honi ali na kuambuluila vantu vose, ku mitambela yose nguendi, vapande kualuluka.
31 Muomu ikeye ua hangula laza limo litangua lia ka sompesa mavu ose mu vuoloke, ku hitila muli yala uze ya hangula. Kaha na hana kutsiliela ku vantu vose mu ku mu sangula ku vatsi.”
32 Kaha mu vavuile a handeka via cisangukilo ca vatsi, vamo va putukile ku mu sembulula, vakuavo co va handekele nguavo: “Tua ku ku halakana litangua lieka.”
33 Ngeci Paulu uaile.
34 Vunoni vamo va lipandakanene kuli ikeye, va tsilielele. Vamo vaco vapuile Ndionisiu, ngazi ua mu mpunga ya ku muncinda ua Aleopangu, na umo mpuevo ua lizina Ndamalisi na vakuavo naua.
Matota
^ Ni “mbuto yendi”
